ភ្នំពេញ ៖ បុរសម្នាក់ត្រូវបានអ្នករើសអេតចាយពីរនាក់ប្តីប្រពន្ធប្រទះឃើញចង់ ក សម្លាប់ខ្លួននៅដើមប្រេងខ្យល់ សង្ស័យករណីឃាតកម្ម ។ ហេតុការណ៍នេះដែរ បានបង្កឲ្យមានការភ្ញាក់ផ្អើលឡើង កាលពីវេលាម៉ោង៨និង ១០នាទី ព្រឹក ថ្ងៃទី២៨ ខែកុម្ភៈ ឆ្នាំ២០២១ នៅចំណុចដីឡូត៍ខាងជើងវត្តឬស្សីសាញ់ ផ្លូវ៥០ម៉ែត្រ ភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។
សពជនងគ្រោះមានឈ្មោះ បូ សុជាតិ អាយុ ២៨ឆ្នាំ មុខរបរដឹកទំនិញអេតចាយ ស្នាក់នៅផ្ទះជួល សង្កាត់ចោមចៅ ១ ខណ្ឌពោធិ៍សែនជ័យ មានស្រុកកំណើត ស្រុកពាមរ៍ ខេត្តព្រៃវែង។
តាមប្រភពព័ត៌មានពីលោកចៅសង្កាត់រងព្រៃសបានឲ្យដឹងថា មានប្រជាពលរដ្ឋដើរចូលចំណុចដីឡូត៍បត់ជើងតូចក៏ ប្រទះឃើញ សពបុរសម្នាក់ចងកនឹងដើមប្រេងខ្យល់ស្លាប់បាត់មិនដឹងតាំងពីពេលនោះទេ ទើបប្រញាប់រាយការណ៍ជូនដល់សមត្ថកិច្ចមូលដ្ឋាន ដើម្បីចុះមកត្រួតពិនិត្យកន្លែងកើតហេតុ។
ដោយឡែកបើតាមសម្ដីបុរស ដែលជាអ្នកលក់សាំងម្នាក់ សុំមិនបញ្ចេញឈ្មោះបានឲ្យដឹងថា មុនពេលកើតហេតុ នៅវេលាម៉ោង៤ទៀបភ្លឺ គាត់ជិះរឺម៉កដឹកសាំងឲ្យប្រពន្ធលក់ក៏បានឃើញ បុរស៥នាក់ រួមទាំងជនរងគ្រោះបានបើកម៉ូតូ សណ្តោងរ៉ឺម៉កដឹកជនរងគ្រោះ យកមកកន្លែងកើតហេតុ ទាំងសភាពជនរងគ្រោះ ទន់ដៃជើង ហើយភ្លាមៗនោះមានបុរស ២នាក់ នៅចាំម៉ូតូ ហើយបុរស២នាក់ទៀត បានគ្រាជនរងគ្រោះចូលទៅក្នុងដីឡូត៍បាត់ទៅ ។ ប្រភពដដែលបានបញ្ជាក់ ប្រាប់ថា ដោយសារតែទីតាំងខាងលើតែងតែមានមនុស្ស មកឈប់សម្រាកជាហូរហែរនឹងរ៉ឺម៉កដឹកសម្រាមយកមកបោះចោល ទើបរូបគាត់មិនចាប់អារម្មណ៍ លុះមកដល់ព្រឹក ឡើងទើបបង្កការភ្ញាក់ផ្អើលថា មានមនុស្សចង់កសម្លាប់ខ្លួន ទើបគាត់ត្រឡប់មកមើលវិញឃើញបុរស ដែលគេដឹកមកនៅពេលយប់នេះឯង។
តាមការរៀបរាប់ពីក្រុមគ្រួសារសាច់ញាតិ របស់សពបុរសខាងលើ បានឲ្យដឹងថា បុរសខាងលើនេះធ្លាប់មានប្រពន្ធ២នាក់ មកហើយនិងទើបតែលែងលះប្រពន្ធទី២ បានរយៈពេលជាង១ខែ ហើយនៅពេលកើតហេតុរូបគេបានឲ្យម្តាយបង្កើត ទៅខ្ចីលុយធនាគារ១០០០០ដុល្លារ យកមកទិញរថយន្តមួយគ្រឿង សម្រាប់ដឹកអេតចាយនៅល្ងាចថ្ងៃទី២៧ខែកុម្ភៈ ក្រោយពេលរូបគេបានទិញរថយន្តរួចរាល់ហើយ ក៏បាននាំបងប្អូនមិត្តភក្តិរៀបចំជប់លៀងផឹកស៊ី លុះម៉ោងប្រហែល៩យប់ជនរងគ្រោះ ក៏បានចេញពីវង់ផឹកស៊ីបាត់មិនឃើញត្រឡប់ទៅផ្ទះវិញទេ ដោយរូបគេយកលុយដែលសល់ពីទិញរថយន្តចំនួន៤០០ដុល្លារ និងចិញ្ជៀនត្រា១វង់ និងទូរស័ព្ទដៃមួយគ្រឿងផងដែរ តែពេលស្លាប់មិនបានបន្សល់ទុកអ្វីនៅក្បែរខ្លួននោះទេ។
ក្រោយមកសមត្ថកិច្ចមូលដ្ឋាន បានចុះមកធ្វើការត្រួតពិនិត្យនៅកន្លែងកើតហេតុ និងទំនាក់ទំនងទៅសមត្ថកិច្ចជំនាញ កោសល្យវិច័យបច្ចេកទេស វិទ្យាសាស្ត្រ រាជធានីភ្នំពេញ ដើម្បីចុះមកធ្វើកោសល្យវិច័យសព ដោយសមត្ថកិច្ចជំនាញមិនបញ្ជាក់ប្រាប់ថា បុរសខាងលើស្លាប់ដោយសារមូលហេតុអ្វីពិតប្រាកដនោះទេ គ្រាន់តែបានធ្វើកំណត់ហេតុប្រគល់សពជូនក្រុមគ្រួសារ ដឹកយកទៅធ្វើបុណ្យតាមប្រពៃណីតែប៉ុណ្ណោះ៕ រក្សាសិទ្ធិដោយ៖សួង សាម
