ភ្នំពេញ-រឿង “ក្រមុំចាស់ប៉ះក្មេងស្ទាវ” ត្រូវបានដាក់សម្ពោធជាផ្លូវការហើយ កាលពីល្ងាចថ្ងៃទី២៧ កុម្ភៈ ក្រោមវត្តមានរបស់តារាសម្តែង ជាច្រើនដួង នៅផ្សារទំនើបសុវណ្ណា ខណៈពេលដែលរឿងមួយនេះ ត្រូវបានសម្រិតសម្រាំងអស់រយៈពេលជាច្រើនឆ្នាំ។
លោកអ៊ិន សុភិន ថៅកែផលិតកម្មមហាហង្សបានថ្លែងឲ្យដឹងថា រឿង “ក្រមុំចាស់ប៉ះក្មេងស្ទាវ” ដែលតួឯកស្រីសម្ដែងដោយអ្នកនាងសុខ សោម៉ាវត្តី ប៉ះជាមួយតួឯកប្រុសលោកខេ គឺជារឿងបែបកំប្លែង កាច់កុង ឌឺដង និងមនោសញ្ចេតនាចាក់ដោតអារម្មណ៍ទស្សនិកជន ជាពិសេសស្រទាប់យុវវ័យ។ លោកថា រឿងនេះបានសម្រិតសម្រាំងការផលិតយ៉ាងយកចិត្តទុកដាក់បំផុត ដោយផ្ដោតលើគុណភាពជាចំបងដែលបានចំណាយអស់ជាង៤ម៉ឺនដុល្លារ។
លោកអ៊ិន សុភិន អះអាងថា ដើម្បីតម្រូវទីផ្សារមហាហង្សបានពង្រឹងការផលិតជាខ្លាំងដោយផ្ដោតលើគុណភាពខណៈដែលមហាហង្សមិនផ្ដោតលើការចំនេញជាធំនោះទេគឺមានឆន្ទះក្នុងការលើកស្ទួយវិស័យភាពយន្តខ្មែរឲ្យមានភាពរីកចម្រើន។
ផលិតកម្មមហាហង្សបានត្រៀម ៦រឿង សម្រាប់ដាក់បញ្ចាំងនៅឆ្នាំ២០១៨ រឿង “ក្រមុំចាស់ប៉ះក្មេងស្ទាវ” នេះមានដូចជារឿង “អនុស្សាវរីយ៍ថ្ងៃចូលឆ្នាំ” “ផ្លូវមរណៈ” “កញ្ចក់” “ផ្ទះចុងភូមិ” “ព្រលឹង” និងរឿងណូលីណូឡា” ជាដើមគឺបានផលិតរួចរាល់ហើយដោយត្រៀមតែថ្ងៃដាក់បញ្ចាំងតែប៉ុណ្ណោះ។
សូមបញ្ជាក់ថា រឿង “ក្រមុំចាស់ប៉ះក្មេងស្ទាវ” នឹងចាប់ផ្ដើមដាក់បញ្ចាំងចាប់ពីថ្ងៃទីថ្ងៃទី១ ខែមីនា ឆ្នាំ២០១៨ តទៅនៅគ្រប់រោងភាពយន្តទំនើបទាំងអស់ទាំងនៅរាជធានីភ្នំពេញនិងខេត្តសៀមរាប៕ ដោយ-គីមស្រីរ័ត្ន