ភ្នំពេញ ៖ កាលពីពេលថ្មីៗនេះ មានករណីប្លន់ប្រដាប់អាវុធគួរឲ្យភ្ញាក់ផ្អើល ដោយចោរម្នាក់បានជិះម៉ូតូស្កុបពី១គ្រឿង ផ្លាកលេខ 1BX-5216 និងប្រដាប់ដោយកាំភ្លើងខ្លីមួយដើម បានចូលប្លន់ម្ចាស់ផ្ទះវីងមួយកន្លែង ស្ថិតនៅត ាមបណ្តោយផ្លូវ ២១៧ ភូមិទ្រា៣ ក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ កាលពីវេលាម៉ោង ៤ និង ៣០ នាទី ល្ងាចថ្ងៃទី២៦ ខែកុម្ភៈ ឆ្នាំ២០២១។
តែយ៉ាងណា ដោយសារតែចោររូបនេះ ប្រហែលមានបទពិសោធន៍នៅស្ទើរ និងចិត្តមិនសូវសឿង បានបោះថង់លុយរត់ចេញក្រៅទាំងព្រលឹងចុងសក់ ដោយបន្យល់ទុកម៉ូតូរបស់ខ្លួននៅកន្លែងកើតហេតុ ក្រោយម្ចាស់វីងប្រតាយប្រតប់របូតកាំភ្លើងពីដៃ ហើយម្ចាស់ផ្ទះដេញបាញ់វិញ ប៉ុន្តែ បាញ់ពុំផ្ទុះនោះទេ។
នេះបើយោងតាមវីដេអូកាមេរ៉ាសុវត្ថិភាព បានបង្ហាញឲ្យឃើញចោរម្នាក់នោះ បានឈរជាមួយម៉ូតូស្កុបពី នៅចិញ្ចើមផ្លូវ និងបន្ទាប់មក ក៏បានសម្រេចចិត្តដើរចូលទៅក្នុងផ្ទះវីង ហើយដកកាំភ្លើងភ្ជង់ម្ចាស់ផ្ទះ រួចប្រមូលលុយពីក្នុងថតតុដាក់ចូលស្បោងខ្មៅ។ ប៉ុន្តែ នៅពេលធ្វើប្រមូលអស់ បម្រុងចាកចេញ ក៏ត្រូវម្ចាស់វីងដែលមានភាពក្លាហាន បានប្រតាយប្រតប់រហូតដណ្តើមបានកាំភ្លើងពីដៃ ជាហេតុធ្វើឲ្យចោររូបនេះ ភ័យស្លន់ស្លោ បោះចោលថង់លុយវិញ រត់យករួចខ្លួនចោលម៉ូតូទាំងព្រលឹងចុងសក់៕ រក្សាសិទ្ធិដោយ៖ លឹម ហុង
