តាកែវ៖ ថ្ងៃចាប់ផ្តើមយុទ្ធនាការចាក់វាសាំងការពារជំងឺកូវីដ១៩ នាថ្ងៃទី ១ ខែ មីនា ឆ្នាំ ២០២១នេះ ខេត្តតាកែវបានចាប់ផ្ដើមយុទ្ធនាការចាក់វ៉ាក់សាំងការពារជំងឺកូវីដ១៩ ស៊ីណូវ៉ាក់ដែលជាជំនួយរបស់រដ្ឋាភិបាលចិន ដល់មន្ត្រីជួរមុខគឺមន្ត្រីសុខាភិបាលនិងនគបាល ក្នុងនោះប្រធានមន្ទីរសុខាភិបាលខេត្តតាកែវ ក៏បានធ្វើការអំពាវនាវដល់មន្ត្រីក៏ដូចជាបងប្អូនប្រជាពលរដ្ឋ ដែលនឹងត្រូវចាក់វ៉ាក់សាំងការពារជំងឺកូវីដ១៩ទាំងអស់ សូមកុំមានការព្រួយបារម្ភបន្ទាប់ពីការចាក់វ៉ាក់សាំងរួច ព្រោះថ្នាក់ដឹកនាំជាន់ខ្ពស់យើងជាច្រើនាក់ បានចាក់ធ្វើជាគំរូមុនគេ ហើយមិនទាន់មានអ្នកណាម្នាក់មានបញ្ហាអ្វីនោះទេ ម្យ៉ាងទៀតមុននឹងចាក់វ៉ាកសាំង ក្រុមគ្រូពេទ្យបានធ្វើការពិនិត្យសុខភាពបងប្អូនជាមុនទើបសម្រេចថាចាក់ឬមិនចាក់។
លោកវេជ្ជបណ្ឌិត នុត ស៊ីណាត ប្រធានមន្ទីរសុខាភិបាលខេត្តតាកែវ បានឲ្យដឹងថា សម្រាប់ខេត្តតាកែវបានទទួលវ៉ាក់សាំងការពារជំងឺកូវីដ១៩ ចំនួន៩ពាន់ដូស សម្រាប់ចាក់មនុស្សចំនួន៤៥០០ នាក់ ហើយយុទ្ធនាការចាក់វ៉ាក់សាំងនៅថ្ងៃនេះ ធ្វើឡើងនៅមន្ទីរពេទ្យបង្អែកខេត្តតាកែវ ដោយដំបូងយើងចាក់ចំពោះមន្ត្រីសុខាភិបាល និងកងកម្លាំងនគរបាលហើយនៅថ្ងៃបន្តបន្ទាប់យើង និងបន្តចាក់ដល់មន្ត្រីសុខាភិបាល និងកងកម្លាំងនគបាលទាំងនៅតាមមន្ទីរពេទ្យបង្អែកទាំងអស់នៅក្នុងខេត្ត។
លោកប្រធានមន្ទីរសុខាភិបាលខេត្តតាកែវ បានបន្តថា ការចាក់វ៉ាក់សាំងការពារជំងឺកូវីដ១៩នេះ គឺចាក់ចំពោះមនុស្សដែលមានអាយុ១៨ឆ្នាំដល់៥៩ឆ្នាំហើយ ក្នុងមនុស្សម្នាក់ៗត្រូវចាក់ចំនួន២ដង ទើបមានប្រសិទ្ធភាព៕ រក្សាសិទ្ធិដោយ៖ តាកែវ
