ភ្នំពេញ ៖ យុវជនម្នាក់ជិះម៉ូតូជ្រេចុះៗជ្រេឡើងបណ្តាលឲ្យទាក់ដៃចង្កូត ខ្ទាតចូលក្រោមរថយន្តរងរបួសបែកប្រអប់ជើងខាងឆ្វេង។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង៤និង៤៥នាទីល្ងាច ថ្ងៃទី១ខែមីនាឆ្នាំ២០២១ ស្ថិតនៅតាមបណ្តោយផ្លូវ២៧១ សង្កាត់បឹងសាឡាង ខណ្ឌទួលគោក រាជធានីភ្នំពេញ។
តាមប្រភពព័ត៌មានពីសាក្សីដែលបានឃើញហេតុការណ៍ នៅកន្លែងកើតហេតុបានឲ្យដឹងថា៖ មុនពេលកើតហេតុគេឃើញយុវជនរងគ្រោះខាងលើ ជិះម៉ូតូហុងដាសេ១២៥ពណ៌ខ្មៅមួយគ្រឿងពាក់ផ្លាកលេខភ្នំពេញ1GE 9408 ធ្វើដំណើរពីទិសដៅពីកើតទៅលិចក្នុងល្បឿនលឿន បើកជ្រេចុះជ្រេឡើងក៏ទាក់ដៃចង្កូតជាមួយរថយន្តបែនដឹកដីពាក់ផ្លាកលេខភ្នំពេញ3B 8482 ធ្វើដំណើរស្របទិសគ្នាបណ្តាលឲ្យយុវជនខាងលើ បានខ្ទាតចូលក្រោមកង់រថយន្ត RANGROVER ពាក់ផ្លាកលេខភ្នំពេញ 2AZ 3853 ដែលកំពុងធ្វើចរាចរណ៍នៅខាងមុខទិសដៅស្របគ្នា បណ្តាលឲ្យចូលក្រោមកង់រថយន្តត្រូវបានរថយន្តកិនបែកប្រអប់ជើងខាងឆ្វេ រងរបួសធ្ងន់ត្រូវបានបញ្ជូនទៅតាមរថយន្តសាមុយ ទៅកាន់មន្ទីរពេទ្យដើម្បីធ្វើការសង្គ្រោះ។
ក្រោយពេលកើតហេតុកម្លាំងនគរបាលប៉ុស្តិ៍រដ្ឋបាលសង្កាត់បឹងសាឡាង សហការជាមួយកម្លាំងនគរបាលជំនាញចរាចរណ៍ខណ្ឌ ចុះមកវាស់វែងនិងជួយសម្រួលចរាចរណ៍នៅកន្លែងកើតហេតុ ដើម្បីបញ្ជៀសការកកស្ទះចរាចរណ៍ បន្ទាប់ពីធ្វើការវាស់វែងរួចសមត្ថកិច្ចបានយករថយន្តទាំង២គ្រឿង រួមនឹងម៉ូតូជនរងគ្រោះទៅរក្សាទុកនៅអធិការដ្ឋាននគរបាលខណ្ឌទួលគោក រង់ចាំដោះស្រាយគ្នានៅពេលក្រោយ៕ រក្សាសិទ្ធិដោយ៖សួង សាម
