ភ្នំពេញ ៖ បុរសម្នាក់ស្រវឹងស្រឿងៗបានមកចូលម៉ាស្សា ដើម្បីឲ្យស្រួលខ្លួនបន្តិច ដឹងអីស្រាប់តែម៉ាស្សារួច ចេញមកវិញបាត់ម៉ូតូ ស្លន់ស្លោរត់ទៅប្តឹងសមត្ថកិច្ចឲ្យជួយអន្តរាគមន៍។
ហេតុការណ៍ភ្ញាក់ផ្អើលនេះដែរ បានកើតឡើងនៅវេលាម៉ោង៣ និង០០នាទីទៀបភ្លឺថ្ងៃអង្គារ៍ទី២ ខែមីនា ឆ្នាំ ២០២១ ស្ថិតនៅតាមបណ្តោយផ្លូវភ្នំពេញ ហាណូយ ក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ។
ជនរងគ្រោះ មានឈ្មោះ សុធី ភេទប្រុសអាយុ២៥ ឆ្នាំ មានស្រុកកំណើតនៅស្រុករមាសហែក ខេត្តស្វាយរៀង។ ចំណែកម៉ូតូម៉ាកហុងដាទ្រីមសង់ស៊េរីឆ្នាំ២០២០ ពណ៌ខ្មៅពាក់ផ្លាកលេខ ស្វាយរៀង 1-Q 8356 ។
ប្រភពព័ត៌មានពីជនរងគ្រោះបានរៀបរាប់ឲ្យដឹងថា មុនពេលកើតហេតុខ្លួនបានជួបជុំហូបអីជាមួយមិត្តភក្តិតិចតួចរាងស្រវឹងស្រឿងៗ បែកគុំនិតចង់ទៅម៉ាស្សាចេញ ដើម្បីឲ្យស្រួលខ្លួនហើយក៏បានជិះម៉ូតូចូលទៅកន្លែងម៉ាស្សាឈ្មោះហេង ហេង១៦៨ រយៈពេលមួយម៉ោង រួចទុកម៉ូតូនៅក្រៅបន្ទប់ ខណៈពេលម៉ាស្សារួចចេញមកវិញស្រាប់តែអត់ឃើញម៉ូតូក៏សួរម្ចាស់ហាង ខណៈពេលម្ចាស់ហាងសំរាកលង់លក់នៅខាងក្នុងបន្ទប់ថាអត់បានឃើញ ហើយក៏សុំឲ្យសមត្ថកិច្ចចុះជួយអន្តរាគមន៍ភ្លាមៗ។
ក្រោយពេលកើតហេតុខាងលើសមត្ថកិច្ចបានចុះមកដល់កន្លែងកើតហេតុ រួចឲ្យជនរងគ្រោះទៅដាក់ពាក្យបណ្តឹង ដើម្បីឲ្យសមត្ថកិច្ចងាយស្រួលតាមស្រាវជ្រាវរកមុខសញ្ញា ដើម្បីយកមកចាត់ការទៅតាមផ្លូវច្បាប់៕ រក្សាសិទ្ធិដោយ៖ សា មេត