កំពង់ឆ្នាំង៖ ជនសង្ស័យ២នាក់ ត្រូវបានសមត្ថកិច្ចកងរាជអាវុធហត្ថខេត្តកំពង់ឆ្នាំង ឃាត់ខ្លួនបញ្ជូនទៅកាន់តុលាការនៅព្រឹកថ្ងៃទី២ខែមីនាឆ្នាំ២០២១ បន្ទាប់ពីប្រើអំពើហិង្សាទាញដាវនិងកាំបិត កាប់ចាក់ទៅលើជនរងគ្រោះរួមនិងម៉ូតូ បណ្ដាលឱ្យរងការខូចខាត។
ហេតុការណ៍នេះបានកើតឡើង នៅចំណុចមុខក្លោងទ្វារ(វត្តលាជ) ស្ថិតក្នុងភូមិលាជ ឃុំអូរឫស្សី ស្រុកកំពង់ត្រឡាច ខេត្តកំពង់ឆ្នាំង កាលពីវេលាម៉ោង១២យប់ក្នុងថ្ងៃទី២៨កុម្ភៈឆ្នាំ២០២១។
ជនសង្ស័យមានគ្នា២នាក់ទី១៖ឈ្មោះ សាំង វាសនា ភេទប្រុស អាយុ២០ឆ្នាំ រស់នៅភូមិចំការស្វាយ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង។
២៖ឈ្មោះ ផាន់ រិទ្ធី ហៅ(ឃ្លោក)ភេទប្រុស អាយុ១៩ឆ្នាំ រស់នៅភូមិឧកញ៉ាប៉ាង ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង។
រីឯជនរងគ្រោះឈ្មោះ ង៉ែត ចិត្រា ភេទប្រុស អាយុ២៤ឆ្នាំ រស់នៅភូមិលាជ ឃុំសេដ្ឋី ស្រុកកំពង់ត្រឡាច។
នៅមុនពេលកើតហេតុជនរងគ្រោះនិងជនសង្ស័យបានឈ្លោះប្រកែកគ្នា ភ្លាមនោះជនសង្ស័យទាំងពីរនាក់ខាងលើ ។
ម្នាក់កាន់ដាវ ម្នាក់កាន់កាំបិត ស្ទុះកាប់ទៅលើជនរងគ្រោះឈ្មោះ ង៉ែត ចិត្រា ត្រូវចំខ្នងផ្នែកខាងក្រោយចំនួន៣ដាវ បណ្ដាលឲ្យរងរបួសជាទម្ងន់
និងបន្តកាប់ម៉ូតូជនរងគ្រោះបណ្ដាលឱ្យរងការខូចខាតយ៉ាងដំណំផងដែរ។
ក្រោយកើតហេតុជនរងគ្រោះ បានមកដាក់ពាក្យបណ្ដឹង ទើបកម្លាំងអាវុធហត្ថស្រុកកំពង់ត្រឡាចចំនួន០៥នាក់
ដឹកនាំដោយលោកវរសេនីយ៍ត្រី រស់ វុទ្ធា មេបញ្ជាការមូលដ្ឋានអាវុធហត្ថស្រុកកំពង់ត្រឡាច ដោយយោងតាមបទល្មើសជាក់ស្ដែង និងពាក្យបណ្ដឹងរបស់កម្លាំងអាវុធហត្ថស្រុកបានចុះឃាត់ខ្លួនជនសង្ស័យចំនួន០២នាក់ខាងលើមកធ្វើការសាកសួរបន្ត
តាមចម្លើយរបស់ជនសង្ស័យទាំង២នាក់ខាងលើបានសារភាពប្រាប់សមត្ថកិច្ចថាពួកគេពិតជាបានកាប់ទៅលើជនរងគ្រោះពិតប្រាកដមែន
ទើបសមត្ថកិច្ចកសាងសំណុំរឿង បញ្ជូនទៅកាន់តុលាការចាត់ការតាមនីតិវិធី៕ រក្សាសិទ្ធិដោយ៖សួង សាម