ភ្នំពេញ៖ អភិបាលខេត្តកោះកុង លោកជំទាវ មិថុនា ភូថង បានឱ្យដឹងថ្មីៗនេះថា ការពង្រីកផ្លូវជាតិលេខ៤៨ នឹងធ្វើឲ្យ ខេត្តកោះកុង កាន់តែរីកចម្រើន និងមានសក្តានុពលថែមទៀត ខណៈក្រុមហ៊ុនកាន់តែច្រើនបានមកវិនិយោគនៅក្នុងខេត្ត មួយនេះ។
លោកជំទាវ បានមានប្រសាសន៍ថា បើសិនជាគ្មានការប្រែប្រួលអ្វីនោះទេ ការពង្រីកផ្លូវជាតិលេខ៤៨ ជាបួនគន្លងក្រោម ជំនួយរបស់សាធារណៈរដ្ឋកូរ៉េ នឹងចាប់ផ្តើមនៅខែមីនានេះ។ លោកជំទាវ បានមានប្រសាសន៍ថា ក្រសួងសាធារណៈការ និងដឹកជញ្ជូនបានដេញថ្លៃ ក្រុមហ៊ុន ដើម្បីស្ថាបនាផ្លូវនេះរួចរាល់ហើយ ដោយការពង្រីកផ្លូវនឹងធ្វើនៅក្នុងខែមីនានេះ ។
សូមជម្រាបថា កាលពីពេលកន្លងទៅ ក្នុងពិធីសម្ពោធបើកឱ្យប្រើប្រាស់ជាផ្លូវការមជ្ឈមណ្ឌលត្រួតពិនិត្យលក្ខណៈបច្ចេកទេសយានយន្ត (ឆៀក) សាខាកំបូល នាថ្ងៃទី០៧ តុលា ឆ្នាំ២០២០ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការ និងដឹកជញ្ជូនបាន ឱ្យដឹងថា ផ្លូវជាតិលេខ៤៨ ពីស្រែអំបិល ទៅកោះកុង នឹងត្រូវលើកកម្រិតគុណភាពផ្លូវទៅជា បេតុងកៅស៊ូ AC ខណៈក្រសួង កំពុងពិភាក្សាជាមួយភាគីកូរ៉េ និងរៀបចំដាក់ដេញថ្លៃហើយ។ ក្នុងនោះ មាន៤កន្លែង នឹងត្រូវពង្រីកដល់ ៤គន្លង។
គួរកត់សម្គាល់ថា ផ្លូវជាតិលេខ៤៨ ដែលមានប្រវែងសរុបចំនួន ១៥០គីឡូម៉ែត្រ គិតចាប់ពីផ្លូវ បំបែកស្រែអំបិលដល់ទីរួមខេត្តកោះកុង កន្លងមក ត្រូវទទួលរងការខូចខាតដោយជំនន់ទឹកភ្លៀង ការដឹកជញ្ជូនលើសទម្ងន់កម្រិតកំណត់ និងកត្តាធម្មជាតិផ្សេងៗផងដែរ។
ដោយសារផ្លូវនេះ ជាច្រករបៀងសេដ្ឋកិច្ចប្រកបដោយសក្ដានុពល សម្រាប់ការនាំចេញ-នាំចូលរវាងកម្ពុជា និងប្រទេសក្នុងតំបន់ រាជរដ្ឋាភិបាល បានសម្រេចពង្រីក និងលើកកម្រិតគុណភាពផ្លូវជាតិនេះពីប្រភេទផ្លូវក្រាលកៅស៊ូពីរស្រទាប់ (DBST) ទៅជាផ្លូវក្រាលបេតុងកៅស៊ូ(AC) ដើម្បីបង្កើនសកម្ម ភាព ដឹកជញ្ជូនបន្ថែម រួមចំណែកដល់ការលើកកម្ពស់សេដ្ឋកិច្ចជាតិ សម្រួលដល់ការធ្វើដំណើរក្នុងតំបន់ និងកាត់បន្ថយភាពក្រីក្រតាមផែនការយុទ្ធសាស្ត្រ របស់រាជរដ្ឋាភិបាលផងដែរ៕ រក្សាសិទ្ធិដោយ៖CEN
