ភ្នំពេញ ៖ ក្នុងកម្មវិធីការប្រកួតនិយាយជាសាធារណៈ តាមរយៈប្រធានបទ ការផ្សាយពាណិជ្ជកម្មគ្រឿងស្រវឹង កាលពីរសៀលថ្ងៃទី២៨ខែកុម្ភៈឆ្នាំ២០១៨ នៅមន្ទីរពេទ្យកុមារជាតិ លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា បានថ្លែងថា ក្នុងស្រាបៀរគឺជាប្រភេទគ្រឿងស្រវឹងដែលប្រជាពលរដ្ឋកម្ពុជានិយមសេពរហូតដល់៨៤ភាគរយ។
លោកបន្តថា ប្រជាពលរដ្ឋកម្ពុជាទទួលឥទ្ធិពលពីការផ្សាយពាណិជ្ជកម្មគ្រឿងស្រវឹងក្នុងការជ្រើសរើសម៉ាកគ្រឿងស្រវឹង ក្នុងនោះ ៣៨ភាគរយ ដោយសាររសជាតិឆ្ងាញ់ ២៨ភាគរយដោយសារម៉ាកល្បី ១៦ភាគរយដោយសារតែតម្លៃថោក និង១១ភាគរយដោយសារចង់ត្រូវរង្វាន់។ ហេតុផលទាំងនេះសុទ្ធតែជាសារទាក់ទាញដែលគេប្រើក្នុងការផ្សាយពាណិជ្ជកម្មគ្រឿងស្រវឹង។
បើតាមលោកវេជ្ជបណ្ឌិត ៖ រាជរដ្ឋាភិបាលគួរកំណត់ទីតាំងលក់គ្រឿងស្រវឹងឲ្យបានសមស្របដើម្បីកាត់បន្ថយលទ្ធភាពងាយរកទិញគ្រឿងស្រវឹង ហើយកន្លែងលក់គ្រឿងស្រវឹងគួរតែមានអាជ្ញាប័ណ្ណអនុញ្ញាតពីស្ថាប័នមានសមត្ថកិច្ច។ លោកបន្តថា ប្រជាពលរដ្ឋកម្ពុជា៩៣ភាគរយ ចង់ឲ្យរាជរដ្ឋាភិបាលហាមឃាត់ការផ្សាយពាណិជ្ជកម្មគ្រឿងស្រវឹង ហើយពួកគាត់យល់ថាការប្រើប្រាស់គ្រៀងស្រវឹងបណ្តាលឲ្យមានបញ្ហាអវិជ្ជមានច្រើន ដូចជា ៩៩ភាគរយយល់ថាពាក់ព័ន្ធនឹងអំពើហិង្សា ៩៩ភាគរយយល់ថាបង្កឲ្យមានគ្រោះថ្នាក់ចរាចរ ៩៨ភាគរយយល់ថាប៉ះពាល់ដល់សេដ្ឋកិច្ចគ្រួសារ និង៩៩ភាគរយយល់ថាបង្កជំងឺ។
ក្នុងការឱកាសនោះដែរ លោកវេជ្ជបណ្ឌិតមុំ គង់ បានលើកឡើងពីផលប៉ះពាល់នៃគ្រឿងស្រវឹងផងដែរ ដូចជា គ្រឿងស្រវឹងគឹជាមូលហេតុទី៣ដែលបណ្តាលឲ្យមានអ្នកស្លាប់នៅលើពិភពលោកប្រមាណ២,៥លាននាក់ក្នុង១ឆ្នាំៗ និងបង្កឲ្យមានជំងឺប្រមាណ២០០មុខរួមមានជំងឺមហារីកបំពង់កអាហារ មហារីកថ្លើម ជំងឺលើសសម្ពាធឈាម ជំងឺស្ទះសរសៃឈាមបេះដូង ខួរក្បាល ជំងឺក្រិនថ្លើម រលាកលំពែង វិកលវិបល្លាសជាដើម។ ក្រៅពីនេះគ្រឿងស្រវឹងជាដើមហេតុនៃគ្រោះថ្នាក់ចរាចរ ការបាត់បង់សណ្តាប់ធ្នាប់សង្គម អំពើហិង្សាក្នុងគ្រួសារ និងបញ្ហាសង្គមជាដើម។ លោកបានបន្ថែមថា នៅកម្ពុជាគ្រឿងស្រវឹងជាមូលហេតុទី២ ដែលបណ្តាលឲ្យគ្រោះថ្នាក់ចរាចរ។ កម្ពុជាខាតបង់ថវិកាប្រមាណ៤៤លានដុល្លារជារៀងរាល់ឆ្នាំដោយសារគ្រោះថ្នាក់ចរាចរ ដែលបណ្តាលមកពីការបើកបរក្រោមឥទ្ធិពលគ្រឿងស្រវឹង។ លោកបានលើកឡើងទៀតថា ប្រជាពលរដ្ឋកម្ពុជា៧៥ភាគរយ គាំទ្ររាជរដ្ឋាភិបាលក្នុងការដំឡើងពន្ធលើផលិតផលគ្រឿងស្រវឹង។ ការដំឡើងពន្ធលើផលិតផលគ្រឿងស្រវឹងគឺជាយុទ្ធសាស្ត្រសកលដែលមានប្រសិទ្ធភាពបំផុតដើម្បីកាត់បន្ថយការប្រើប្រាស់គ្រឿងស្រវឹង។
ជាមួយគ្នានោះដែរតាមរយៈប្រធានបទ “ការផ្សាយពាណិជ្ជកម្មគ្រឿងស្រវឹង” ក្នុងកម្មវិធីការប្រកួតនិយាយជាសាធារណៈ កញ៉ា ម៉ក់ ទេវិន្ទ ប្រធានគម្រោងអង្គការចលនាដើម្បីសុខភាពកម្ពុជា បានបញ្ជាក់ថា ការប្រកួតនិយាយជាសាធារណៈរហូតមកដល់ពេលនេះមានបេក្ខជនទាំង១០បានចូលរួមប្រកួតក្នុងវគ្គពាក់កណ្តាលផ្តាច់ព្រ័ត្រ ដែលទទួលបានពិន្ទុខ្ពស់ជាងគេលើវិញ្ញាសារសរសេរអត្ថបទ។ ហើយបេក្ខជនទាំង១០រូបនឹងប្រកួតគ្នាដោយជ្រើសរើសយកតែ៥នាក់ប៉ុណ្ណោះ ហើយឈានដល់ផ្តាច់ព្រ័ត្រនឹងប្រកួកអ្នកជាប់លេខ១ លេខ២ និងលេខ៣។ គួរបញ្ជាក់ថាការដាក់ពិន្ទុគឺធ្វើឡើងប្រកបដោយភាពសុក្រឹត្យនិងតម្លាភាព ដោយមានការចូលរួមពីតំណាងក្រសួងនិងអង្គការពាក់ព័ន្ធ។ ការផ្ដល់ពិន្ទុគឺផ្អែកទៅលើអត្រាកំណែយ៉ាងច្បាស់លាស់។ ដើម្បីបញ្ចេញសមត្ថភាពក្នុងការសរសេរនិងនិយាយ រួមទាំងទទួលឱកាសក្នុងការក្លាយជាជ័យលាភីជាមួយរង្វាន់ដូចខាងក្រោម៖
លេខ១ ទទួលបានពាន១ និង ទឹកប្រាក់ “១លាន២សែន” លេខ២ ទទួលបានពាន១ និង ទឹកប្រាក់ “៨សែន” និង លេខ៣ ទទួលបានពាន១ និង ទឹកប្រាក់ “៤សែន”។
លោកវេជ្ជបណ្ឌិត មុំ គង់ បានបញ្ជាក់ថា ការប្រកួតនេះធ្វើឡើងក្នុងគោលបំណង កាត់បន្ថយគ្រោះថ្នាក់ដែលកើតឡើងពាក់ព័ន្ធនឹងការប្រើប្រាស់គ្រឿងស្រវឹងនៅកម្ពុជា និងផ្តល់ឱកាសដល់យុវជនក្នុងការបញ្ចេញសមត្ថភាពនិយាយជាសាធារណៈ ដោយសារតែយុវជនមួយចំនួនមានទេព្យកោសលនិងមានការស្រាវជ្រាវច្រើនលើបញ្ហាគ្រឿងស្រវឹង អីចឹងគឺជាវេទិកាមួយដែលអាចអនុញ្ញាតឲ្យយុវជនបញ្ចេញនូវសមត្ថភាពរបស់ពួកគាត់ដែលសិក្សាស្រាវជ្រាវនាពេលកន្លងមក៕ ដោយ៖កូឡាប
