ភ្នំពេញៈ រដ្ឋបាលខេត្តបន្ទាយមានជ័យបានឲ្យដឹងថា កាលពីថ្ងៃទី០១ ខែមីនា ឆ្នាំ២០២១ វេលាម៉ោង១៤:០០ នាទីមានករណីបុរសម្នាក់ អាយុ២៥ឆ្នាំ មានទីលំនៅភូមិថ្មី ម៉ាឡៃ ស្រុកម៉ាឡៃ ខេត្តបន្ទាយមានជ័យ បានទទួលមរណៈភាព។ ករណីបុរសដែលទទួលមរណភាពខាងលើ មិនមែនស្លាប់ ដោយសារជំងឺកូវីដ១៩ទេ ។
រដ្ឋបាលខេត្តបន្ទាយមានជ័យបានបន្តថា អ្នកជំងឺជាពលករខាងលើ បានចូលមកកម្ពុជា តាមច្រកសង្កែ ស្រុកម៉ាឡៃ កាលពីថ្ងៃទី២៦ ខែកុម្ភៈ ឆ្នាំ២០២១ វេលាម៉ោង ១៥:៣០នាទី ហើយត្រូវបានបញ្ជូនមកសង្គ្រោះ និងព្យាបាលនៅមន្ទីរពេទ្យបង្អែកម៉ាឡៃសន្តិភាព ដោយមូលហេតុពិបាកដកដង្ហើម (ហត់ដង្ហក់ខ្លាំង) ខ្សោយខ្លាំង និងមិនអាចដើររួច ហើយត្រូវបានក្រុមគ្រូពេទ្យ ជួយសង្គ្រោះដោយផ្តល់អុកស៊ីសែនជំនួយផ្លូវដង្ហើម។ ដោយស្ថានភាពអ្នកជំងឺមិនបានធូរស្បើយទើបធ្វើការ បញ្ជូនមកសង្គ្រោះ និងព្យាបាលបន្តនៅមន្ទីរពេទ្យខេត្តមិត្តភាព កម្ពុជា-ជប៉ុន មង្គលបូរី វេលាម៉ោង ២០:៥០នាទី ថ្ងៃខែឆ្នាំដដែល។
តាមការពិនិត្យ និងសួរប្រវត្តិអ្នកជំងឺរបស់គ្រូពេទ្យនៅមន្ទីរពេទ្យខេត្តមិត្តភាពកម្ពុជា-ជប៉ុន មង្គលបូរីបាន បញ្ជាក់ថា៖ អ្នកជំងឺមានប្រវត្តិជក់បារី ពិសាស្រា និងធ្លាប់កើតជំងឺរលាកសួត តែទទួលការព្យាលបាលមិន ត្រឹមត្រូវ ព្រោះអ្នកជំងឺគ្មានលទ្ធភាពក្នុងការព្យាបាល ហើយនៅពេលមានបញ្ហាធ្ងន់ធ្ងរ ទើបក្រុមគ្រួសារសម្រេច ចិត្តវិលត្រឡប់មកស្រុកកំណើត វិញ។ អ្នកជំងឺមានអាការៈ និងរោគសញ្ញា ហត់ដង្ហក់ខ្លាំង ពិបាកដកដង្ហើម ហើម ពេញខ្លួន ឡេះឡះ និងមានទឹកនោមតិច។ ក្រុមគ្រូពេទ្យបានធ្វើការសង្គ្រោះព្យាបាល និងតាមដានអ្នកជំងឺដោយ យកចិត្តទុកដាក់តាមលក្ខណៈបច្ចេកទេស។ លទ្ធផលនៃការវិភាគឈាមបានបង្ហាញថា គ្រាប់ឈាមក្រហម កំហាប់ឈាម និងមុខងារតម្រងនោមថយចុះខ្លាំង (Creatinine 24.2mg dl)។ ស្ថានភាពអ្នកជំងឺមិនបានធូរ / ស្បើយ និងមានការវិវត្តន៍កាន់តែធ្ងន់ធ្ងរជាលំដាប់ ទោះបីក្រុមគ្រូពេទ្យប្រឹងប្រែងព្យាបាល និងសង្គ្រោះអស់ពី លទ្ធភាព រហូតដល់ថ្ងៃទី០១ ខែមីនា ឆ្នាំ២០២១ វេលាម៉ោង ១៦:៥០ នាទី អ្នកជំងឺបានទទួលមរណភាព ដោយ មូលហេតុ ជំងឺហើមសួត (Pulmonary oedema) និងខ្សោយតម្រងនោម ដំណាក់កាលចុងក្រោយ (Rernal failure end stage)។
រដ្ឋបាលខេត្ត សូមបញ្ជាក់ជូនផងដែរថា ករណីបុរសដែលទទួលមរណភាពខាងលើ មិនមែនស្លាប់ ដោយសារជំងឺកូវីដ១៩ទេ ៕ រក្សាសិទ្ធិដោយ៖ចេស្តារ
