ភ្នំពេញ ៖ រថយន្តដឹកខ្សាច់ធុនធំមួយគ្រឿងបើកលឿនពេកមិនប្រយ័ត្នបាន រេចង្កូតឡើងខឿនផ្លូវជ្រុលទៅបុកស្លាកប៉ាន់ណូរបស់ក្រុមហ៊ុន Smart បណ្ដាលឲ្យបាក់អស់១ដើម និងខូចខាតទ្រូងផ្លូវយ៉ាងដំណំ ។ ចំណែកតៃកុងរថយន្តបង្កត្រូវសមត្តកិច្ចឃាត់បាន។
ហេតុការណ៍នេះបានកើតឡើង កាលពីវេលាម៉ោង ១១និង០០នាទីយប់ថ្ងៃទី ០២ ខែ មីនា ឆ្នាំ២០២១ នៅតាមបណ្ដោយផ្លូវ វេងស្រេង ត្រង់ចំណុច ស្តុបសេះមាស ក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។
បើតាមប្រភពព័ត៌ពីកន្លែងកើតហេតុ បានឲ្យដឹងថា មុនពេលកើតហេតុ គេឃើញរថយន្តម៉ាកហីយ៉ាន់ដាយដឹកខ្សាច់ធុនធំមួយគ្រឿង ក្បាលពណ៌ស ពាក់ផ្លាកលេខ ភ្នំពេញ 3F-0973 ធ្វើដំណើរបណ្ដោយផ្លូវវេងស្រេង ក្នុងទិសដៅពីកើតទៅលិចក្នុងល្បឿនយ៉ាងលឿន ខណៈមកដល់ចំណុចកើតហេតុខាងលើ ទំនងជាងងុយដេកបានរេចង្កូតទៅខាងធ្វេងដៃ ឡើងលើខឿនផ្លូវជ្រុលទៅបុកបង្គោលស្លាកប៉ាន់ណូ របស់ក្រុមហ៊ុន Smart បាក់អស់១ដើម ចំណែកខឿនផ្លូវនិងឥដ្ឋការ៉ូឡា រងការខូចខាតយ៉ាងដំណំ ។
តែសំណាងល្អ មិនបង្កឲ្យនរណាម្នាក់រងរបួសនោះទេ ។
ក្រោយកើតហេតុ សមត្ថកិច្ចមូលដ្ឋានបានចុះមកដល់ ហើយទាក់ទងទៅសមត្ថកិច្ចជំនាញក្រុង ធ្វើការវាស់វែងយករថយន្តបង្កខាងលើទៅរក្សាទុក នៅខាងការិយាល័យចរាចរណ៍នៃស្នងការរាជធានីភ្នំពេញ រង់ចាំដោះស្រាយតាមច្បាប់ ៕ រក្សាសិទ្ធិដោយ៖សា មេត
