ភ្នំពេញ ៖ កាលពីថ្ងៃទី០១ ខែមីនា ឆ្នាំ២០២១ វេលាម៉ោងប្រមាណ ១១ នាទី មានករណីប្លន់ជំរិតលុយ ១ លានដុល្លារ ដ៏រន្ធត់ នៅចំណុចភូមិគ្រឹះមួយក្នុងបុរីអង្គរភ្នំពេញ ប៉ុន្តែ ទោះយ៉ាងណា អំពើប្លន់ប្រដាប់អាវុធនេះ គឺពុំបានសម្រេចនោះទេ ដោយឧក្រិដ្ឋជនជាចោរប្លន់ទាំង៤នាក់ ត្រូវបានបាញ់សម្លាប់នៅនឹងកន្លែង ដោយកម្លាំងអាវុធហត្ថរាជធានីភ្នំពេញ។
លុះមកដល់ថ្ងៃទី០២ ខែមីនា ឆ្នាំ២០២១ ម្សិលមិញ សាកសពឧក្រិដ្ឋជនទាំង៤នាក់ ត្រូវបានដឹកបញ្ជូនមកតម្កល់នៅវត្តទឹកថ្លា ដើម្បីរង់ចាំសាច់ញាតិមកទទួលធ្វើបុណ្យ។ ហើយក្នុងនោះ គេក៏បានសង្កេតឃើញមានតែសាកសពជនល្មើសចំនួន ៣ នាក់ ប៉ុណ្ណោះ ដែលត្រូវបានក្រុមគ្រួសារមកទទួលស្គាល់ និងយកធាតុរៀងៗខ្លួន ក្រោយអាចារ្យភ្លុកបូជារួច។
តែដោយឡែក សាកសពមេខ្លោងនៃករណីប្លន់ជំរិតឈ្មោះ អុឹម សុវណ្ណរិទ្ធ គឺពុំត្រូវបានសាច់ញាតិណាម្នាក់ មកទទួលដឹងឮឡើយ ដែលប្រហែលខ្លាចអាប់កិត្តិយស? ហេតុទើបលោកតាអាចារ្យភ្លុក សម្រេចបូជាចុងក្រោយគេ។
យ៉ាងណាមិញ ក្រោយសាកសពមេខ្លោងខាងលើ ត្រូវបានបូជារួច គេក៏ស្រាប់តែបានប្រទះឃើញមានគណនីហ្វេសប៊ុកមួយ ដែលប្រហែលត្រូវជាបងប្រុសរបស់មេខ្នោងឧក្រិដ្ឋជន អ៊ឹម សុវណ្ណរិទ្ធ បានភ្ជាប់សារទី១ថា៖ «I’m Sorry» រីឯសារទី២ បានសរសេរថា «I can not accept the truth sorry» និងសារទី៣ បានបង្ហោះនូវរូបភាពថតអង្គុយជុំគ្រួសារ ដែលមានឪពុកម្តាយ និងក្មេងប្រុស២នាក់ ដែលក្នុងនោះមានម្នាក់អាក់អក្សរ RIP និងពាក្យថា «លារហូតហើយ»។
តែទោះយ៉ាងណា មកទល់ពេលនេះ អត្តសញ្ញាណឪពុកម្តាយរបស់មេខ្នោងវ័យក្មេងខាងលើនេះ គឺពុំទាន់ត្រូវបានប្រភពណាមួយបញ្ចេញឲ្យដឹងនៅឡើយទេ៕ រក្សាសិទ្ធិដោយ៖ លឹម ហុង
