ភ្នំពេញ ៖ បុរសម្នាក់បានបើករថយន្តម៉ាក range rover មួយគ្រឿងក្នុងល្បឿនលឿន ខ្វះការប្រុងប្រយ័ត្នជ្រុលទៅបុករថយន្តម៉ាក ford កំពុងតែឆ្លងស្តុបចំពីចំហៀងខាងមុខពេញទំហឹង បណ្ដាលឲ្យរថយន្តម៉ាក ford រងការខូចខាតផ្នែកខាងមុខទាំងស្រុង។ ចំណែកឯរថយន្តបង្កបន្តបើកទៅមុខរត់គេចខ្លួន ចូលក្នុងសាលារចនាបាត់ស្រមោល។
ហេតុការណ៍នេះដែរបានកើតឡើងនៅវេលាម៉ោង ០០និង៣០នាទីយប់ឈានចូលថ្ងៃទី០៤ ខែមីនា ឆ្នាំ២០២១ ស្ថិតនៅតាមបណ្ដោយផ្លូវព្រះនរោត្តមកែងនឹងផ្លូវ២១៤ ក្នុងក្រុងចតុមុខ ខណ្ឌដូនពេញ រាជធានីភ្នំពេញ។
បើយោងតាមប្រភពព័ត៌មានពីជនរងគ្រោះនៅកន្លែងកើតហេតុ បានឲ្យដឹងថា មុនពេលកើតហេតុ គាត់បានបើករថយន្តម៉ាកfordមួយគ្រឿងពណ៌ស ពាក់ផ្លាកលេខភ្នំពេញ 2-AS 7632 បើកបរដោយគាត់ម្នាក់រួមដំណើរដោយស្ត្រីម្នាក់ទៀត ធ្វើដំណើរតាមបណ្ដោយផ្លូវព្រះនរោត្តម ក្នុងទិសដៅពីត្បូងទៅជើងក្នុងល្បឿនមធ្យម ខណៈមកដល់ចំណុចកើតហេតុ ស្តុបផ្លូវបំបែកជា៤ស្រាប់តែមានរថយន្តមួយគ្រឿងទៀតម៉ាកrang roverពណ៌ខ្មៅមិនចាំផ្លាកលេខបើកបរដោយបុរសម្នាក់ ធ្វើដំណើរតាមបណ្តោយផ្លូវ២១៤ ក្នុងទិសដៅពីលិចមកកើតក្នុងល្បឿនលឿនទាំងបំពានស្តុបក្រហម ជ្រុលមកបុកចំពីចំហៀងខាងមុខរថយន្តគាត់ពេញទំហឹង បណ្តាលឲ្យរងការខូចខាតផ្នែកខាងមុខយ៉ាងដំណំ។ ចំណែកឯរថយន្តបង្កវិញ បន្តបើកទៅមុខរត់ចូលទៅក្នុងសាលារចនា រួចឲ្យសន្តិសុខចាក់ទ្វារជាប់។ ហើយសំណាងល្អក្នុងហេតុការណ៍គ្រោះថ្នាក់ចរាចរណ៍នេះ មិនបង្កឲ្យមានគ្រោះថ្នាក់ទៅដល់មនុស្សនោះទេរងការខូចខាតតែរថយន្ត។
ក្រោយពេលកើតហេតុសមត្ថកិច្ចមូលដ្ឋាន ចុះមកដល់រួចក៏សួរជនរងគ្រោះ ដើម្បីឱ្យទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលសង្កាត់ចតុមុខ ដោយជនរងគ្រោះមិនចង់វែងឆ្ងាយ ក៏សុំសមត្ថកិច្ចបើករថយន្តយកទៅផ្ទះវិញ ដើម្បីជួសជុលដោយខ្លួនឯង៕ រក្សាសិទ្ធិដោយ៖សាមេត
