ភ្នំពេញ ៖ ខេត្តកណ្តាលជាខេត្តមួយនៅជាប់និងរាជធានីភ្នំពេញ ខេត្តនេះមានតំបន់ទេសចរណ៍បែបវប្បធម៌ប្រវត្តិសាស្ត្រ និងធម្មជាតិសំខាន់ៗ រួមនិងតំបន់ទេសចរណ៍កែច្នៃជាច្រើន ដូចជា៖ ភ្នំព្រះរាជទ្រព្យ ភ្នំប្រសិទ្ធ កៀនស្វាយក្រៅ ស្អាងភ្នំ ស្កាយលែន ចំការស្នេហ៍ អ្នកតាចិន និងគោលដៅទេសចរណ៍មួយចំនួនទៀត។
ឆ្នាំ២០២០កន្លងទៅថ្មីៗនេះ រដ្ឋបាលខេត្តកណ្តាល បានយកចិត្តទុកដាក់ជំរុញវិស័យទេសចរណ៍ ដោយទទួលបានការវិនិយោគ នៅទីតាំងថ្មីៗជាច្រើនដូចជា ៖ ព្រីនម៉ាណឺរ 7NG និងភូមិផ្កាត្រកួនជាដើម។
បើយោងតាមរបាយការណ៍ពីរដ្ឋបាលខេត្តកណ្តាល បានបញ្ជាក់ថា វិស័យទេសចរណ៍នៅខេត្តកណ្តាល ជាទេសចរណ៍ វប្បធម៌ប្រវត្តិសាស្ត្រ និងធម្មជាតិ ដោយបានរួមចំណែកយ៉ាងសកម្ម ក្នុងការអភិវឌ្ឍសេដ្ឋកិច្ចខេត្ត ស្មើនឹង២៦,៧% នៃចំណូលថវិកាខេត្ត និងបានផ្តល់ការងារមួយផ្នែកធំជូនប្រជាពលរដ្ឋកម្ពុជានៅទីនោះផ្ទាល់។
ដោយសារតែរងផលប៉ះពាល់ ពីវិបត្តិជំងឺកូវីដ-១៩ ធ្វើឱ្យភ្ញៀវទេសចរណ៍ នៅខេត្តកណ្តាល ក្នុងឆ្នាំ២០២០ មានចំនួនត្រឹមតែជាង ១ម៉ឺន២ពាន់នាក់ប៉ុណ្ណោះ គឺមានអត្រាថយចុះ៨៨.៣៤ភាគរយ បើធៀបនឹងឆ្នាំ២០១៩។ចំពោះផ្នែកសេវាកម្ម, ខេត្ត មានសណ្ឋាគារ០២កន្លែង ផ្ទះសំណាក់៧៦កន្លែង មណ្ឌលកម្សាន្តមនុស្សពេញវ័យ៦៤កន្លែង ភោជនីយដ្ឋាន៤៧កន្លែង និងទីតាំងអាជីវកម្មផ្សេងជាច្រើនទៀត។
គួរបញ្ជាក់ថា រដ្ឋបាលខេត្តកណ្តាល បានរៀបចំអភិវឌ្ឍទីក្រុងតាខ្មៅ និងបានទទួលពានរង្វាន់ទីក្រុងទេស ចរណ៍ស្អាតអាស៊ានលើកទី២ សុពលភាពឆ្នាំ២០២០-២០២២ នៅរាជធានីម៉ង់ដាសេរីបេហ្គាវ៉ាន់ ប្រទេសព្រុយណេដារូសាឡឹម នៅថ្ងៃទី១៦ ខែមករា ឆ្នាំ២០២០ និងពិធីដង្ហែក្បួនអបអរសាទរនៅថ្ងៃទី១៥ ខែកុម្ភៈ ឆ្នាំ២០២០កន្លងទៅផងដែរ៕
រក្សាសិទ្ធិដោយ៖CEN
