ភ្នំពេញ ៖ ដូចដែលប្រិយមិត្ត និងមហាជនបាន បានទទួលជ្រាបរួចហើយ កាលពីថ្ងៃទី០១ ខែមិនា ឆ្នាំ២០២១ កន្លងទៅថ្មីៗនេះ បានកើតមានការភ្ញាក់ផ្អើល និងរន្ធត់ជាខ្លាំង បន្ទាប់ពីមានករណីក្រុមឧក្រិដ្ឋជន៤នាក់ បានសម្រុកចូលប្លន់ជំរិតប្រាក់ ១លានដុល្លារ មិនបានសម្រេច ពីម្ចាស់ផ្ទះភូមិគ្រឹះមួយកន្លែង ដែលមានទីតាំងស្ថិតនៅក្នុងបុរី អង្គរភ្នំពេញ ក្នុងភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ។
ក្រោយក្រុមឧក្រិដ្ឋជនជាចោរប្លន់ទាំង៤នាក់ ត្រូវបានកម្លាំងរាជអាវុធហត្ថធ្វើការបង្ក្រាប ឲ្យដេករដូករណែលក្នុងថ្លុកឈាម ហើយសាកសពរបស់ពួកគេក៏ត្រូវបានរំលាយអស់រួចហើយ នៅពេលនេះ សមត្ថកិច្ចក៏បានធ្វើការស្រាវជ្រាវបន្តពីទីកន្លែងស្នាក់នៅរបស់ក្រុមឧក្រិដ្ឋជនទាំង៤នាក់ និងក៏បានកំណត់អត្តសញ្ញាណពួកគេលម្អិតបន្ថែមផងដែរ។
ក្នុងនោះ ទី១- ឈ្មោះ អ៊ឹម សុវណ្ណរិទ្ធ ជាមេក្លោង កាន់កាំភ្លើង AK47 កើតថ្ងៃទី 28-10-1999 មានស្រុកកំណើតនៅ ស្រុកស្វាយប៉ោ ខេត្តបាត់ដំបង មានទីលំនៅបច្ចុប្បន្ន ភូមិក្តីចាស់ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ និងបានជួលបន្ទប់មួយទុកចោលលេខ៣១៤ ផ្លូវលំ ភូមិបុរី១០០ខ្នង សង្កាត់ទឹកថ្លា ខណ្ឌសែនសុខ រាជធានីភ្នំពេញ ដោយចេញចូលម្តងម្កាលប៉ុណ្ណោះ។ ទី២- ឈ្មោះ រី ពីសី កាន់កាំភ្លើងខ្លីម៉ាក សូរ៉ាគី កើតថ្ងៃទី 27-10-1991 មានស្រុកកំណើត សង្កាត់វឌ្ឍនភាព ទីរួមខេត្តកណ្តាល ទីលំនៅបច្ចុប្បន្ន ផ្ទះលេខ១២៨ ផ្លូវលំ ភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល។ ទី៣- ឈ្មោះ ម៉ូវ ផានិត កើតថ្ងៃទី 27-10-1998 មានស្រុកកំណើត ភូមិព្រៃពង្រ ឃុំរការកោះ ស្រុកគងពិសី ខេត្តកំពង់ស្ពឺ ទីលំនៅបច្ចុប្បន្ន ភូមិព្រៃពង្រ ឃុំរការកោះ ស្រុកគងពិសី ខេត្តកំពង់ស្ពឺ ស្នាក់នៅផ្ទះជួល ក្រោយវត្តតាខ្មៅ ក្រុងតាខ្មៅ ខេត្តកណ្តាល។ និងទី៤- ឈ្មោះ រ៉ន ភារុន កាន់កាំភ្លើងខ្លីម៉ាកCZ P09 កើតឆ្នាំ២០០០ មានស្រុកកំណើត ភូមិព្រែកសំរោង ឃុំតាខ្មៅ ក្រុងតាខ្មៅ ខេត្តកណ្តាល ទីលំនៅបច្ចុប្បន្ន ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល ។
យ៉ាងណាមិញ ក្រោយពីបានឃើញថ្ងៃខែឆ្នាំកំណើតរបស់ពួកគេ មហាជនពិតជាមានការចាប់អារម្មណ៍ជាខ្លាំង និងនាំគ្នាលើកឡើងចាក់បណ្តោយតាមៗគ្នាបែបនេះថា៖ «កើតថ្ងែដូចគ្នាទើបងាប់ដោយសារគេបាញ់ដូចគ្នាហាសហាហា, មេក្លោងកើតថ្ងៃ២៨ ចំណែក២នាក់ផ្សេងទៀតកើតថ្ងៃទី២៧ គ្រាន់តែខែដូចគ្នាទាំង៣នាក់, កើតថ្ងៃរួមស្លាប់ទៅវិញថ្ងៃរួមគ្នា ពិតជាព្រហ្មលិខិតវាសនាបានតាក់តែងមែន, កើតថ្ងៃជាមួយគ្នា បបួលគ្នាស្លាប់ក៏ជាមួយគ្នា ជាតិក្រោយកើតមកជាបងប្អូនចោរជាមួយគ្នាទៀត,…»៕ រក្សាសិទ្ធិដោយ៖ លឹម ហុង
