ភ្នំពេញ: ទីផ្សារនាំចេញ ដំឡូងមីស្រស់ និងក្រៀមនៅដើមឆ្នាំនេះ មានភាពល្អប្រសើរ ក្នុងនោះរបាយការណ៍មួយ បានបង្ហាញថា ការនាំចេញផលិត ផលកសិកម្ម គិតត្រឹមរយៈពេល២ខែ ដើមឆ្នាំ២០២១នេះ មានទំហំប្រមាណជិត ១,៦លានតោន កើនឡើងជាងឆ្នាំមុនប្រមាណ ៥៦ម៉ឺនតោន ស្មើប្រមាណជាង ៥៥ភាគរយ ។
របាយការណ៍អគ្គនាយកដ្ឋានកសិកម្ម បានឱ្យបានដឹងថា ផលិតផលកសិកម្មមានការបញ្ជាទិញ ដូចជា ដំឡូងមីក្រៀមទទួលបានការទិញចំនួនប្រមាណ៨០ម៉ឺនតោន ដំឡូងមីស្រស់ជាង១៥ម៉ឺនតោន ស្រូវជាង២៨ម៉ឺនតោន។ គ្រាប់ស្វាយចន្ទីជាង ៧៩ពាន់តោន គ្រាប់ពោតក្រហមជាង ៧៨ពាន់តោន ផ្លែចេកស្រស់ជាង៧៥ពាន់តោន ផ្លែស្វាយស្រស់ជាង ៤៣ពាន់តោនជាដើម។
សមាគមដំឡូងមីខេត្តបាត់ដំបង បានឱ្យដឹងថា ការនាំចេញដំឡូងមីឆ្នាំនេះ មានទីផ្សារល្អ។ ជាក់ស្តែងការនាំចេញដំឡូងមីក្រៀម ក្នុងខេត្ត មានប្រមាណជាង ៣០ម៉ឺនតោន ក្នុងមួយគីឡូក្រាម ដោយទទួលបាន ៦បាតក្នុង មួយគីឡូ។ សមាគមនេះ បានបញ្ជាក់ថា ទីផ្សារនាំចេញផលិតផលកសិកម្មរបស់កម្ពុជា និងមានទីផ្សារកាន់តែល្អប្រសើរ ស្របពេលដែលរាជរដ្ឋាភិបាលកម្ពុជា បានខិតខំប្រឹងប្រែងស្វែងរកទីផ្សារថ្មីៗបន្ថែមទៀត ដោយផ្តោតជា សំខាន់លើការអភិវឌ្ឍវិស័យកសិកម្ម ដូចជា៖ ការចុះកិច្ចព្រមព្រៀងពាណិជ្ជកម្មសេរីជាមួយចិន និងកូរ៉េជាដើម។
ដំឡូងមី ជាដំណាំកសិ-ពាណិជ្ជកម្មសម្រាប់ការនាំចេញ និងមិនមែនជាអាហារមូលដ្ឋានសម្រាប់ចិញ្ចឹមជីវិតរបស់ប្រជាជនកម្ពុជាឡើយ ប៉ុន្តែវាជាដំណាំសំខាន់បំផុតបន្ទាប់ពីស្រូវ ពោត និងស្រូវសាលី។ ដំឡូងមីត្រូវបានដាំដុះដោយប្រជា-កសិករនៅតាមទីជនបទ។ វាបានក្លាយទៅជាដំណាំសក្តានុពល ដោយសារតំបន់ដាំដុះ និងបរិមាណ ផលិតផល មានការពង្រីកច្រើនឡើងៗ។
ក្នុងឆ្នាំ២០២០កន្លងទៅ ការប្រមូលផល និងការផ្គត់ផ្គង់មើមដំឡូងមីស្រស់ចូលទីផ្សារពិភពលោក មានចំនួនរហូតទៅដល់១២លានតោន ដែលជាពិសេសគឺស្ថិតនៅក្នុងតំបន់អាស៊ីខាងកើត។ ចំណែកនៃការផ្គត់ផ្គង់ទីផ្សារទាំងនេះ កម្ពុជាជាប្រទេសផលិតដំឡូងមីដ៏ធំ ដែលស្ថិតនៅលំដាប់ទី៤ នៅក្នុងតំបន់អាស៊ី និងលំដាប់ទី១០ នៅក្នុងពិភពលោក។ ដំឡូងមី បានដើរតួនាទីយ៉ាងសំខាន់ក្នុងការលើកកម្ពស់ជីវភាពប្រជាជននៅតាមទីជនបទ និងបង្កើតការងារថ្មី ក៏ដូចជាអភិវឌ្ឍន៍វិជ្ជាជីវៈនៅក្នុងការដាំដុះ ការប្រមូលផល ការកែច្នៃ សម្រាប់ការនាំចេញ។
បើតាមរដ្ឋមន្ត្រីក្រសួងពាណិជ្ជកម្ម ឯកឧត្តម ប៉ាន សូរស័ក្តិ បានឱ្យដឹងថា ក្នុងមួយឆ្នាំៗ វិស័យដំឡូងមីបានទទួលការវិនិយោគជាទឹកប្រាក់ប្រមាណ ៣០០លានដុល្លារ ដោយមានផ្ទៃដីដាំដុះជាង ៦ម៉ឺនហិកតា។ ក្នុងឆ្នាំ២០១៩ កម្ពុជា បាននាំចេញដំឡូងមីស្រស់ ក្រៀម និងម្សៅប្រមាណ ៣.៣០លានតោន ដែលគិតជាទឹកប្រាក់មានតម្លៃជាង ២៦.៤០លានដុល្លារ។
គួរបញ្ជាក់ថា ក្នុងរយះពេល២ខែ ដើមឆ្នាំ២០២១នេះដែរ ការនាំចេញផលិតផលកសិកម្មក្រៅពីអង្ករ ដោយផ្អែកលើប្រព័ន្ធទិន្នន័យ ភូតគាមអនាម័យ កម្ពុជាបាននាំចេញទៅកាន់គោលដៅចំនួន ២៥ប្រទេស៕
រក្សាសិទ្ធិដោយ៖CEN
