ខេត្តរតនគិរី ៖ សមត្ថកិច្ចនគរបាលខេត្តរតនគិរី បានឲ្យដឹងថា កាលពីព្រឹកថ្ងៃព្រហស្បតិ៍ ១៥កើត ខែផល្គុន ឆ្នាំរកា នព្វស័ក ព.ស ២៥៦១ ត្រូវនិងថ្ងៃទី០១ ខែមីនា ឆ្នាំ២០១៨ មានស្ត្រីម្នាក់ បានចាក់សាំងដុតសម្លាប់ខ្លួនឯង ដោយគ្រាន់តែមានទំនាស់ពាក្យសម្តីជាមួយប្តី របស់ខ្លួនបន្តិចបន្តួច។
ហេតុការណ៍នេះបាន កើតឡើងនៅភូមិភ្នំស្វាយ សង្កាត់បឹងកន្សែង ក្រុងបានលុង ខេត្តរតនគិរី។ សមត្ថកិច្ចនគរបាល បានឲ្យដឹងថា មុនពេលកើតហេតុខាងលើនេះ គេឃើញស្ត្រីម្នាក់បានឈ្លោះជាមួយប្ដី ដោយប្រើពាក្យសម្តីប្រកែកគ្នាបន្តិចបន្ទួច ហើយបន្តបន្ទាប់ក្រោយមក គេឃើញស្ត្រីជាភរិយា បានស្ទុះទៅយកសាំងចាក់ដុតខ្លួនឯង និងបង្កឲ្យមានការភ្ញាក់ផ្អើលដល់ប្រជាពលរដ្ឋជិតខាង។ មន្ត្រីនគរបាល ប៉ុស្តិ៍រដ្ឋបាលសង្កាត់បឹងកន្សែង បានឲ្យដឹងថា សពស្ត្រីរងគ្រោះឈ្មោះ ឆាយ សុខ អាយុ ៤០ឆ្នាំជនជាតិខ្មែរ និងមានប្ដីឈ្មោះ ខុម នី អាយុ ៣៦ឆ្នាំ ជនជាតិខ្មែរ មុខរបររត់ម៉ូតូកង់បី ឬឡាំប្រ៊ីតា ផលិតនៅប្រទេសឥណ្ឌា និងមានកូនប្រុសស្រីចំនួន ៣នាក់ ក្នុងបន្ទុក។
សមត្ថកិច្ច បន្តថា មុនពេលដុតខ្លួន ស្ត្រីរងគ្រោះបានកោសខ្យល់ និងកោពុកមាត់ឲ្យប្តី ហើយអឡុងពេលនោះ ក៏បានឈ្មោះប្រកែកគ្នា ដោយលើកយកបញ្ហាមួយចំនួនមកតស៊ូមតិជាមួយគ្នា។ ប៉ុន្ដែក្រោយមកខាងបុរសជាប្ដីក៏បានឡើងទៅសំងំដេកនៅលើផ្ទះ ចំណែកប្រពន្ធ ក៏នៅបន្តការផឹកសុីនៅខាងក្រោមផ្ទះ។ នគរបាលមូលដ្ឋាន ឲ្យដឹងទៀតថា ក្រោយមកស្ត្រីជាភរិយា បានដើរចូលទៅយកប្រេងសាំងប្រហែល ៣លីត្រ មកចាក់ពីលើខ្លួនរួចគូសដែកកេះដុតខ្លួនឯងតែម្ដងហើយ ពេលភ្លើងកំពុងឆេះ អ្នកជិតខាង ក៏បានមកជួយពន្លត់ភ្លើងឲ្យរលត់ ហើយសាច់ញាតិ ក៏បានដឹកស្ត្រីរងគ្រោះបញ្ជូនទៅសង្រោះនៅមន្ទីរពេទ្យបង្អែកខេត្តរតនគិរី ប៉ុន្ដែជាអកុសលស្ត្រីរងគ្រោះ បានស្លាប់បាត់ទៅហើយ។
នគរបាល បានបញ្ជាក់ថា នៅជាប់ខ្លួនស្ត្រីរងគ្រោះមានប្រាក់ចំនួន ៥០មុឺនរៀល ដែលនៅជាប់ខ្លួនស្ត្រីរងគ្រោះត្រូវភ្លើងឆេះអស់។ ក្រោយមក សមត្ថកិច្ចមូលដ្ឋាន និងសមត្ថកិច្ចជំនាញ ក៏បានចុះមកពិនិត្យសាកសពស្ត្រីរងគ្រោះ និងបានធ្វើលិខិតប្រគល់សពជូនប្ដី ដើម្បីរៀបចំធ្វើបុណ្យតាមប្រពៃណី៕ ដោយ៖ សមុទ្រឈើ
