ភ្នំពេញ-តារាចម្រៀង ករុណា ពេជ្រ ក្រោយពេលប្រកាសថាមានអ្នកស្អំបេះដូង មិនទាន់បានប៉ុន្មានផង ស្រាប់តែពេលនេះ ដូចជាមិនរវល់រឿងគូស្នេហ៍ដូច គូស្នេហ៍ដទៃទៀតសោះ បែជាលេចមុខមកថា កំពុងមមាញឹកជាមួយនឹងមុខជំនួញទៀតហើយ។
ជាទូទៅគេឧស្សាហ៍ឃើញតារាប្រុសជួរមុខរបស់ផលិតកម្មថោន ករុណា ពេជ្រ ធ្វើដំណើរទៅខេត្តសៀមរាបជាញឹកញាប់ គេក៏បានដាក់បន្ទុកថា បុរសសង្ហាររូបនោះ ពិតជាមានភាគហ៊ុនលើមុខជំនួញថ្មី ដែលគ្រោងនឹងធ្វើឡើងអស់រាប់លានដុល្លារគឺ ផ្សាររាត្រីកុងតឺន័រសៀមរាប ប៉ុន្តែករុណា ពេជ្រ តែងតែច្រានព័ត៌មានទាំងនោះថា ខ្លួនមិនមានភាគហ៊ុនសូម្បីតែបន្តិច។ កាលដែល ករុណា ពេជ្រ តែងតែទៅមើលនោះ គឺការជួយនិងការទទួលខុសត្រូវការងាររបស់ខ្លួនប៉ុណ្ណោះ។
ប៉ុន្តែករុណា ពេជ្រ ទទួលស្គាល់ថា ខ្លួនបានទៅបោះទុនរកស៊ី នៅខេត្តសៀមរាបមែន ប៉ុន្តែមិនមែនជាថៅកែ ផ្សាររាត្រីកុងតឺន័រនឹងទេ គឺខ្លួនបានបើកម៉ាត ២៤ម៉ោង នៅក្នុងផ្សារកុងតឺន័រសៀមរាប និងមានបើកផាប់(Pub) ដើម្បីកំដរអារម្មណ៍ភ្ញៀវទេសចរដែលមកកម្សាន្តនៅក្នុងក្រុងសៀមរាប។
រីឯការចំណាយលើមុខជំនួញទាំងពីរនេះ ករុណា ពេជ្រ បានបោះទុនប្រមាណជិត១០ម៉ឺន ដុល្លារសម្រាប់ ម៉ាត២៤ ម៉ោង និង Pub ការបើកជំនួញថ្មីនេះ គេមិនទាន់ដឹងថា ករុណា ពេជ្រ វេចបង្វេចទៅនៅទីក្រុងបុរាណមួយនេះ ឬយ៉ាងណាទេ គ្រាន់តែលោកបញ្ជាក់ថា ស្រួលមិនស្រួលខ្លួនអាចទៅនៅសៀមរាបដើម្បីទៅមើលមុខជំនួញថ្មីមួយនេះ ឲ្យដើរស្រួលបួលសិន ទើបសម្រចចិត្តថា នឹងត្រូវនៅបន្តឬក៏មកនៅភ្នំពេញវិញ៕ ដោយ-គីម ស្រីរ័ត្ន
