ភ្នំពេញ៖ គម្រោងជួសជុល មហាវិថីព្រះនរោត្ដមដែលខូចខាតដោយទឹកជំនន់របស់រដ្ឋបាលរាជធានីភ្នំពេញ ចាប់ពីរមនីយដ្ឋានវត្តភ្នំរហូតដល់វិមានឯករាជ្យបានអ៊ុតកៅស៊ូACកម្រាស់៥សង់ទីម៉ែត្របញ្ចប់ហើយ កាលពីថ្ងៃទ១១មីនានេះ បើទោះបីកូវីដ១៩កំពុងយាយីក៏ដោយតែការងារអភិវឌ្ឍន៍រាជធានីភ្នំពេញនៅតែបន្តដដែល។
មន្ត្រីរដ្ឋបាលរាជធានីភ្នំពេញបានឲ្យដឹងថា៖ កំណាត់មហាវិថីព្រះនរោត្ដម ចាប់ពីរង្វង់មូលរមណីយដ្ឋានវត្តភ្នំ រហូតដល់វិមានឯករាជ្យ ក្រុមការងារបានធ្វើការជួសជុលសំបុកមាន់ ធ្វើគ្រឹះកាលពីពាក់កណ្តាលខែមករា ឆ្នាំ២០២១ និងបានបញ្ចប់ការជួសជុលគ្រឹះ កាលពីថ្ងៃទី២០ខែកុម្ភៈឆ្នាំ ២០២១ ។ ក្រុមការងារបានចាប់ផ្ដើមធ្វើការអ៊ុតកៅស៊ូAC កាលពីថ្ងៃទី២២ខែកុម្ភៈឆ្នាំ២០២១ ហើយគិតមកដល់ថ្ងៃទី១១ខែមីនាឆ្នាំ២០២១នេះ ការដ្ឋានទាំងមូល បានបញ្ចប់ជាស្ថាពរហើយ ដោយអ៊ុតកៅស៊ូACកម្រាស់៥សង់ទីម៉ែត្រទទឹង ១៦ម៉ែត្រ បណ្តោយប្រវែង២១៥០ម៉ែត្រ ចាប់ពីរង្វង់មូលវត្តភ្នំដល់មានឯករាជ្យ ។
មន្ត្រីដដែលក៏បានបញ្ជាក់ផងដែរថា នៅក្នុងខណ្ឌដូនពេញ គម្រោងជួសជុលផ្លូវដែលខូចខាតដោយទឹកជំនន់កន្លងមកនេះ មានចំនួន១៦ខ្សែ ។ ប៉ុន្តែមកដល់ពេលនេះ ក្រុមការងារបានស្ថាបនារួចរាល់ចំនួន ១១ខ្សែហើយ ពោលគឺកំណាត់មហាវិថីព្រះនរោត្តមនេះ គឺជាកំណាត់ផ្លូវទី១១ របស់គម្រោងរដ្ឋបាលរាជធានីភ្នំពេញ។
មន្ត្រីជំនាញឱ្យដឹងថា រដ្ឋបាលរាជធានីភ្នំពេញ ក្រោមការដឹកនាំរបស់លោកឃួង ស្រេង អភិបាលរាជធានីភ្នំពេញ បើទោះបីស្ថិតក្នុងដំណាក់កាលការរីករាលដាលជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈក្តី តែរដ្ឋបាលរាជធានីភ្នំពេញ ដៃម្ខាងនៅតែធ្វើការអភិវឌ្ឍរាជធានីភ្នំពេញហើយ ដៃម្ខាងទៀតប្រឹងប្រែងទាំងយប់ទាំងថ្ងៃទប់ស្កាត់ការរីករាលដាលនៃជំងឺកូវីដ-១៩៕ រក្សាសិទ្ធិដោយ៖បញ្ញាស័ក្តិ
