អគ្គនាយកដ្ឋានរដ្ឋបាលការពារ និងអភិរក្សធម្មជាតិ សហការជាមួយអង្គការ មូលនិធិសត្វព្រៃពិភពលោក(WWF) ពិគ្រោះយោបល់លើសេចក្តីព្រាងផែនការស្តារសត្វខ្លាធំឡើងវិញ ក្នុងដែន ជម្រកសត្វព្រៃស្រែពក ខេត្តមណ្ឌលគីរី ។
នៅទីស្តីការក្រសួងបរិស្ថាន ថ្ងៃសុក្រ ទី២ ខែមីនា ឆ្នាំ២០១៨ កិច្ចពិភាក្សាផ្តោតសំខាន់ អំពីការស្តារ និងការអភិរក្សសត្វខ្លាធំឡើងវិញ ការអនុវត្តជាជំហ៊ានៗ ក្នុងក្របខ័ណ្ឌជាតិ និងថ្នាក់ខេត្ត ធ្វើយ៉ាងណាអភិរក្សធនធានសត្វព្រៃកម្រ និងជិតផុតពូជអោយគង់វង្ស ដែលកំពុងរស់រានមានជីវិតនៅក្នុងព្រៃឈើ អភិរក្សធនធានធម្មជាតិ និងជីវៈចម្រុះដ៏ សំបូរបែបនៃដែនជម្រកសត្វព្រៃស្រែពក ខេត្តមណ្ឌលគីរី នៃតំបន់ទេសភាពខ្ពង់រាបភាគខាងកើតប្រទេសកម្ពុជា។
លោក សូខន ឬទ្ធីគុណ អនុរដ្ឋលេខាធិការ ក្រសួងបរិស្ថាន បានឱ្យដឹងថា បច្ចុប្បន្ន ប្រព័ន្ធតំបន់ការពារធម្មជាតិកម្ពុជា មានតំបន់ការពារធម្មជាតិ មានចំនួនកើនដល់៥១តំបន់ ដែលមានទំហំដីប្រមាណ ៧,៥លានហិកតា និងរបៀងអភិរក្សជីវៈចម្រុះ(របៀងអភិរក្សចម្រុះឦសាន្ត របៀងអភិរក្សចម្រុះឧត្តរ និងរបៀងអភិរក្សចម្រុះជួរភ្នំក្រវាញ) គឺស្មើនឹង៤១% នៃផ្ទៃប្រទេស។ លោកបន្តដែរថា ផែនការកម្មវិធី នៃការស្តារសត្វខ្លាធំឡើងវិញ ក្នុងដែនជម្រកសត្វព្រៃស្រែពក គឺមានសារសំខាន់ សម្រាប់យើងធ្វើការរួមគ្នាជាមួយដៃគូ ក្នុងការអនុវត្តការងារ ការការពារ និងថែរក្សាសម្បត្តិធម្មជាតិដ៏ អស្ចារ្យនៃតំបន់ខ្ពង់រាបភាគខាងកើតប្រទេសកម្ពុជា ដែលនឹងចូលរួមផ្តល់ផលប្រយោជន៍ ពីសេវាកម្ម បរិស្ថាន ដោយមានចក្ខុវិស័យរួមនៃផែនការកម្មវិធីគឺនៅឆ្នាំ២០២២ នឹងសម្រេចបាននូវតួនាទីប្រព័ន្ធអេកូឡូស៊ីរបស់ពពួកប្រភេទសត្វខ្លាធំ។
លោក ចឹង សុចន្ថា អភិបាលរងខេត្តមណ្ឌលគីរី បានឱ្យដឹងថា តាមការពិគ្រោះ យោបល់លើកនេះ មានសារៈ សំខាន់ណាស់សំរាប់ខេត្តមណ្ឌលគីរី ដែលជាតំបន់ ដែលមានសក្តានុពលធនធានសត្វព្រៃ និងជីរៈចម្រុះគ្រប់ប្រភេទ ក៏ដូចជាការផ្តោតសំខាន់ លើអភិបាលកិច្ច និងការលើកកម្ពស់ គ្រប់គ្រងតំបន់ការពារធម្មជាតិ ការអភិរក្សសត្វខ្លាធំ ដោយជំរុញការ ចូលរួមពីសហគមន៍មូលដ្ឋានផងដែរ។
គូសបញ្ជាក់ថា សេចក្តីព្រាងផែនការប្រតិបត្តិការស្តារសត្វខ្លាធំឡើងវិញនៅខេត្តមណ្ឌលគីរី ត្រូវបានដាក់ ឆ្លង និងចងក្រងធាតុចូលជាបន្តបន្ទាប់ ក្នុងកិច្ចប្រជុំជំនាញជាតិ និងអន្តរជាតិ ការចុះពិនិត្យស្ថានភាព ជាក់ស្តែងដល់កន្លែងដែនជម្រកសត្វព្រៃស្រែពក និងភូមិសាស្ត្រផ្សេងៗទៀតនៅកម្ពុជា៕ ដោយ៖បញ្ញាស័ក្តិ