នេះជាលើកដំបូងហើយដែលមេដឹកនាំកូរ៉េខាងជើង Kim Jong-Un បានជួបជាមួយប្រតិភូជាន់ខ្ពស់កូរ៉េខាងត្បូង គិតតាំងពីឡើងកាន់តំណែងនៅឆ្នាំ ២០១៣។
ប្រតិភូជាន់ខ្ពស់កូរ៉េខាងត្បូងទៅកាន់ក្រុងព្យុងយ៉ាងត្រូវបានមេដឹកនាំកូរ៉េខាងជើងគីម ស្វាគមន៍យ៉ាងកក់ក្តៅ។
ប្រតិភូជាន់ខ្ពស់កូរ៉េខាងត្បូង មានសមាជិក ១០រូប ក្នុងនោះមានមន្ត្រីជាន់ខ្ពស់ ៥រូប និងមន្ត្រីថ្នាក់អ្នកឯកទេស៥រូប ដែលដឹកនាំដោយនាយកការិយាល័យសន្តិសុខជាតិ Chung Eui-yong ។
ប្រតិភូកូរ៉េខាងត្បូង (ឆ្វេង) ពិភាក្សាជាមួយមន្ត្រីកូរ៉េខាងជើង អំពីកម្មវិធីនៃដំណើរបេសកកម្មនេះ ពេលជាន់ទឹកដីកូរ៉េខាងជើងភ្លាម។
ឧត្តមសេនីយកូរ៉េខាងជើង Kim Yong-chol (ឆ្វេង) ទទួលជួបបេសកជនពិសេសនៅកូរ៉េខាងត្បូង នៅសណ្ឋាគារព្យុងយ៉ាងថ្ងៃ ៥ ខែ៣។
ក្រោយមកមេដឹកនាំ Kim Jong-Un បានចេញមកស្វាគមន៍ផ្ទាល់នឹងមន្ត្រីជាន់ខ្ពស់កូរ៉េខាងត្បូង នៅរដ្ឋធានីព្យុងយ៉ាង។ ក្នុងរូបភាពខាងលើលោក Kim Jong-Un បានចាប់ដៃមេដឹកនាំស្ថាប័នសន្តិសុខជាតិកូរ៉េខាងត្បូង Chung Eui-yong ដែលជាប្រធានប្រតិភូ។
បណ្តាមន្ត្រីជាន់ខ្ពស់កូរ៉េខាងត្បូង និងកូរ៉េខាងជើងបានពិភាក្សានូវបញ្ហាក្តៅគគុកជាច្រើន ក្នុងនោះរួមមានទាំងលទ្ធភាពរៀបចំសន្និសីទកំពូលអន្តរកូរ៉េ។ កិច្ចពិភាក្សាប្រព្រឹត្តទៅក្នុងបរិយាកាសស្និទ្ធស្នាល។
មេដឹកនាំកូរ៉េខាងជើងស្វាគមន៍ប្រតិភូជាន់ខ្ពស់កូរ៉េខាងត្បូង។
ភាគីទាំងសងខាងបានប្តូរយោបល់ និងពិភាក្សាក្នុងបរិយាកាសរីករាយ។ ជំនួបនិងពិធីលាងសោយភោជចាប់ផ្តើមពីម៉ោង ១៨ ល្ងាចថ្ងៃទី៥ មីនា អូសបន្លាយជាង៤ម៉ោង។ ទីភ្នាក់ងារសារព័ត៌មានកូរ៉េខាងត្បូងសរសេរថា ៖ “ការដែលលោក Kim Jong-Un ជួបពិភាក្សា និងមន្ត្រីកូរ៉េខាងត្បូងហាក់បង្ហាញឲ្យឃើញថា មេដឹកនាំរូបនេះ បានត្រៀមខ្លួនសម្រាប់ការកែសម្រួលទំនាក់ទំនងជាមួយកូរ៉េខាងត្បូង”។
លោក Kim Jong-Un បានចែករំលែកទស្សនៈសំដៅកាត់បន្ថយភាពតានតឹងក្នុងទំនាក់ទំនងរវាងកូរ៉េទាំង២ ហើយក៏បានផ្តួចផ្តើមឲ្យមានកិច្ចចរចា ការទាក់ទង កិច្ចសហប្រតិបត្តិការ និងការផ្លាស់ប្តូរផ្សេងទៀតរវាងប្រទេសទាំង២។
ក្នុងពិធីពិភាក្សាដោយផ្ទាល់នោះ លោក Chung Eui-yong បានបញ្ជូនសាលិខិតរបស់ប្រធានាធិបតី Moon Jae-in ជូនលោក Kim Jon-Un។ គួរកត់សម្គាល់ថា មុននោះប្អូនស្រីបង្កើតរបស់មេដឹកនាំកូរ៉េខាងជើង Kim Yo-jong ក៏បានបញ្ជូនសាលិខិតដល់ប្រធានាធិបតី Moon Jae-in ក្នុងអំឡុងពេលទស្សនកិច្ចកូរ៉េខាងត្បូងកន្លងមក។
មេដឹកនាំកូរ៉េខាងជើង Kim Jong-Un និងភរិយា Ri Sol-ju បានរៀបចំពិធីលៀងសោយភោជទទួលបេសកជនពិសេសរបស់ប្រធានាធិបតីកូរ៉េខាងត្បូង Moon Jae-in នៅទីស្នាក់ការបក្សពលករកូរ៉េ ក្នុងរដ្ឋធានីព្យុងយ៉ាង។
គួររំលឹកថា លោក Kim Jong-Un មានឥរិយាបថពុំនិយមការជួបប្រាស្រ័យនឹងភ្ញៀវបរទេសជាផ្លូវការ។ លោកតែងបដិសេធមិនជួបសូម្បីតែបេសកជនពិសេសរបស់ប្រធានាធិបតីចិន ស៊ី ជិនពៀន លោក Song Tao កាលពីឆ្នាំ២០១៧។
តាមការិយាល័យប្រធានាធិបតីកូរ៉េខាងត្បូងឲ្យដឹងថា នេះជាលើកដំបូងហើយដែលលោក Kim Jong-Un បានអញ្ជើញមន្ត្រីកូរ៉េខាងត្បូងទៅកាន់ទីស្នាក់ការរបស់បក្សពលករកូរ៉េខាងជើង នៅរដ្ឋធានីព្យុងយ៉ាង វត្តមានរបស់ភរិយាលោក Kim Jong-Un ក្នុងពិធីជប់លៀងដល់ប្រតិភូកូរ៉េខាងត្បូង គឺជារឿងកើតមានជាលើកដំបូង។ លើសពីនេះទៀតក្រុមគ្រួសាររបស់មេដឹកនាំកូរ៉េខាងជើង នៅបានជូនដំណើរប្រតិភូកូរ៉េខាងត្បូងដល់រថយន្តព្រមទាំងលើកដៃគ្រវីជាសញ្ញាលាគ្នាផង។
តាមអ្នកជំនាញការវិភាគមួយចំនួននោះ ឥរិយាបថប្រែប្រួលជាមួយបដិសណ្ឋារកិច្ចស្និទ្ធស្នាលនឹងប្រតិភូកូរ៉េខាងត្បូងបង្ហាញថា មេដឹកនាំកូរ៉េខាងជើងកំពុងស្វែងរកវិធីរំដោះខ្លួនចេញពីការដាក់ទណ្ឌកម្មដ៏តឹងរឹងពីសំណាក់សហគមន៍អន្តរជាតិ៕ សូយន