ភ្នំពេញ៖ មន្ត្រីជាន់ខ្ពស់នៃរាជបណ្ឌិត្យសភាកម្ពុជា អះអាងថា មនុស្សភាគច្រើនថា ជំងឺកូវីដ-១៩សាហាវ ប៉ុន្តែអ្វីដែលសាហាវជាងកូវីដ-១៩នោះ គឺ«មនុស្ស» ពីព្រោះមនុស្សស៊ីទាំងសួតប្រមាត់ ថ្លើម ឈាម ដោយស៊ីទាំងខ្លាំងទាំងខ្សោយ ហើយស៊ីបំបាត់ជម្រករបស់គេថែមទៀត។
លោកបណ្ឌិតសុខ ទូច ប្រធានរាជបណ្ឌិត្យសភាកម្ពុជា បានថ្លែងថាសារលើហ្វេសនាពេលថ្មីៗនឹះថា មនុស្សភាគច្រើនថា កូវីដសាហាវ តែកូវីដស៊ីសួត និងសម្លាប់តែអ្នកខ្សោយប៉ុណ្ណោះ វាមិនសម្លាប់អ្នកខ្លាំងនោះទេ ដោយគេប្រើតែម៉ាស សាប៊ូ អាល់កុល ឬជែល និងរក្សាគម្លាតសុវត្ថិភាព គេអាចការពារ និងយកឈ្នះលើវាបានទៅហើយ ប៉ុន្តែមនុស្សសាហាវជាងកូវីដឆ្ងាយណាស់ មនុស្សស៊ីទាំងសួត ប្រមាត់ ថ្លើម ហើយនិងឈាមគេ ស៊ីទាំងខ្លាំង ស៊ីទាំងខ្សោយ ស៊ីគេហើយ បំបាត់ជម្រកគេទៀត។
ឧទាហរណ៍មនុស្សស៊ីត្រី លុបបឹង លុបសមុទ្រ មនុស្សស៊ីសាច់សត្វព្រៃដូចជា ឈ្លូស ប្រើស ហើយកាប់ព្រៃបំផ្លាញជម្រករបស់គេទៀត តើនេះមិនសាហាវទេ? មនុស្សបានរុករានទៅដល់ក្រោមដីដើម្បីយកហ្គាស យកធ្យូងថ្មមកប្រើ ដែលធ្វើឱ្យផែនដីមានការប្រែប្រួលអាកាសធាតុ បញ្ចេញជាតិពុលតាមរយៈឧស្ម័នកាបូនិច និងឧស្ម័នពុលដទៃទៀតតាមរយៈចំហេះពីរោងចក្រ ក៏ដូចជាគ្រឿងម៉ាស៊ីនជាច្រើន។ មនុស្សសម្លាប់មនុស្ស រហូតដល់សម្លាប់ជាតិសាសន៍ខ្លួនឯង ដោយគ្រាន់តែទំនាស់ផលប្រយោជន៍ ឬមនោគមន៍វិជ្ជា។
លោកថា ហេតុនេះហើយ មនុស្សសាហាវជាងកូវីដរាប់ពាន់ដង ដូច្នេះមនុស្សក៏អាចទប់ស្កាត់កូវីដបាននាពេលខាងមុខបាន តាមរយៈការពាក់ម៉ាស លាងដៃដោយសាប៊ូ អាល់កុល ឬជែល រស់នៅដោយរក្សាគម្លាតក្នុងសង្គម និងចុងក្រោយគឺការចាក់វ៉ាក់សាំងការពារជំងឺកូវីដ-១៩ នោះយើងនឹងអាចយកឈ្នះលើជំងឺកូវីដបានដោយងាយ ប៉ុន្តែសកម្មភាពដែលមនុស្សបានប្រព្រឹត្តខាងលើ មិនងាយនឹងបញ្ចប់នោះឡើយ។
ក្រោយពីទទួលការចាក់វ៉ាក់សាំងហើយ ត្រូវទទួលវេជ្ជបញ្ជាពីលោកគ្រូពេទ្យមិនឲ្យធ្វើកិច្ចការធ្ងន់ក្នុងរយៈពេលមួយអាទិត្យ មិនទទួលទានគ្រឿងស្រវឹង មិនទទួលទានកាហ្វេ មិនឲ្យងូតទឹកមួយថ្ងៃទៀត៕ រក្សាសិទ្ធិដោយ៖បញ្ញាស័ក្តិ
