តាមសារព័ត៌មាន Reuters បានចុះផ្សាយនៅវេលាថ្ងៃត្រង់មុននេះបន្តិច (ថ្ងៃទី០៨ ខែមេសា ឆ្នាំ២០២១) ឲ្យដឹងថា ក្រុមសកម្មជន និងប្រព័ន្ធផ្សព្វផ្សាយ បាននិយាយថា កងទ័ពបានបើកការបាញ់ប្រហារទៅលើក្រុមបាតុករ ដែលគាំទ្រលទ្ធិប្រជាធិបតេយ្យ កាលពីថ្ងៃពុធ ដោយបានសម្លាប់មនុស្សយ៉ាងតិច ១៥ នាក់ និងជាច្រើននាក់ទៀតរងរបួស។
សមាគមជំនួយសម្រាប់អ្នកទោសនយោបាយ (AAPP) បាននិយាយកាលពីថ្ងៃពុធថា ជនស៊ីវិលជិត ៦០០ នាក់ ត្រូវបានសម្លាប់ដោយកម្លាំងសន្តិសុខនៅក្នុងភាពច្របូកច្របល់មួយ ចាប់តាំងពីរបបយោធាបានដណ្តើមអំណាចពីរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី កាលពីខែកុម្ភៈ ឆ្នាំ២០២១ កន្លងទៅនេះ។
ចំណែកក្រុមតស៊ូមតិបាននិយាយថា មនុស្ស ២៨៤៧ នាក់ បច្ចុប្បន្ននេះ កំពុងត្រូវបានឃុំខ្លួន ខណៈដែលអ្នកនាំពាក្យរបបយោធា មិនអាចទាក់ទងសុំការអត្ថាធិប្បាយបានទេ។
ពួកគេក៏បានប្រាប់ឲ្យដឹងថា មានដីការចាប់ខ្លួន ត្រូវបានចេញចាប់ខ្លួនមនុស្សរាប់រយនាក់ ដោយពួកយោធានៅសប្តាហ៍នេះ នឹងធ្វើឡើងបន្ទាប់ទៅលើក្រុមអ្នកមានឥទ្ធិពលល្បីៗ ក្នុងនោះមាន តារាល្បីៗ និងសូម្បីតន្ត្រីករផងដែរ។
ជាក់ស្តែង លោក Paing Takhon ដែលជាតារាបង្ហាញម៉ូត និងជាតារាសម្តែងដ៏មានឈ្មោះល្បីនៅក្នុងប្រទេសមីយ៉ាន់ម៉ា និងថៃ គឺជាមនុស្សម្នាក់ចុងក្រោយ ដែលត្រូវបានគេឃុំខ្លួន ក្នុងចំណោមតារាល្បីៗ នៅក្នុងប្រទេសនេះ។ តារាវ័យ ២៤ ឆ្នាំ រូបនេះ កន្លងមក បានធ្វើការថ្កោលទោសការកាន់កាប់របស់យោធា និងបានសន្យាគាំទ្រលោកស្រី ស៊ូជី។
បងស្រីរបស់គាត់ឈ្មោះ Thi Thi Lwin បានប្រាប់ Reuters ថា យោធាបានចាប់ខ្លួនប្អូនប្រុសរបស់នាងនៅម៉ោង ៤ និង ៣០ នាទីព្រឹក នៅផ្ទះឪពុកម្តាយរបស់ពួកគេ នៅទីក្រុងយ៉ាំងហ្គោន ដែលជាកន្លែងគាត់បានស្នាក់នៅជាច្រើនថ្ងៃ ខណៈពេលគាត់មិនស្រួលខ្លួន។
នាងបាននិយាយទាំងការព្រួយបារម្ភថា កម្លាំងសន្តិសុខបានមកកាន់ផ្ទះរបស់នាង ជាមួយរថយន្ដយោធា ៨ គ្រឿង ផ្ទុកទាហានប្រហែល ៥០ នាក់ ហើយនាងក៏មិនច្បាស់ថាតើ ប្អូនប្រុសរបស់នាងនឹងត្រូវបានគេយកទៅទីណានោះទេ៕
រក្សាសិទ្ធិដោយ៖ លឹម ហុង
