អាជ្ញាធរផ្នែកអាកាសចរណ៍វៀតណាម បានបញ្ជាឱ្យក្រុមហ៊ុនអាកាសចរណ៍ Bamboo Airways បញ្ឈប់ការលក់សំបុត្រសម្រាប់ជើងហោះហើរដោយគ្មានម៉ោងហោះហើរ ក្រោយពេលដែលអ្នកធ្វើដំណើរជាច្រើនបានត្អូញត្អែរ ពីការលុបចោលនិងពន្យារពេលជើងហោះហើររបស់ពួកគេ។
បើយោងទៅតាមអាជ្ញាធរអាកាសចរណ៍ស៊ីវិលវៀតណាម បានប្រាប់ឱ្យដឹងថា ក្រុមហ៊ុនអាកាសចរណ៍នីមួយៗមានចំនួនជើងហោះហើរ ដែលបានបញ្ជាក់ពីម៉ោងដែលយន្តហោះអាចហោះហើរ និងចុះចតនៅក្នុងព្រលានយន្តហោះ ប៉ុន្តែក្រុមហ៊ុនអាកាសចរណ៍ Bamboo Airways បានលក់សំបុត្រដែលមិនមានម៉ោងហោះហើរ។
ក្នុងសប្តាហ៍ថ្មីៗនេះ អតិថិជនបានត្អូញត្អែរ ចំពោះក្រុមហ៊ុនអាកាសចរណ៍ Bamboo Airways ដែលជាញឹកញាប់តែងតែ លុប និងព្យារពេលហោះហើរ ជាពិសេសការហោះហើរទៅកាន់ខេត្ត the Hanoi-Da Nang ។
កាលពីថ្ងៃទី ៤ ខែមីនា កន្លងទៅ ក្រុមហ៊ុនអាកាសចរណ៍ដែលមានតម្លៃទាបបានបង្ហាញ ការសុំទោសជាសាធារណៈជុំវិញការផ្លាស់ប្តូរកាលវិភាគហោះហើររបស់ខ្លួន ដោយបានស្តីបន្ទោសទៅលើការងារថែទាំដែលកំពុងកើតឡើងនៅអាកាសយានដ្ឋានអន្តរជាតិ។ ក៏ប៉ុន្តែ អ្នកតំណាងនៃព្រលានយន្តហោះ Noi Bai បាននិយាយថាការងារថែទាំបានបញ្ចប់មុនពេល ហើយពេលវេលាហោះហើររបស់ក្រុមហ៊ុនខាងលើ មិនមានផលប៉ះពាល់អ្វីដល់ក្រុមហ៊ុននោះទេ។
អាជ្ញាធរអាកាសចរណ៍ស៊ីវិលវៀតណាមបានបញ្ជាក់ថា Bamboo Airways ថាប្រសិនបើនៅប្រងើយកន្តើយចំពោះការព្រមាន ហើយនៅបន្តផ្តល់ជូននូវសំបុត្រដែលខុសជើងហោះហើរទៅកាន់អតិថិជនទៀត ក្រុមហ៊ុននឹងមិនទទួលបានម៉ោងចុះចតរបស់ក្រុមហ៊ុនចំនួន៦ខែ។
ក្នុងខែមករាកន្លងទៅ ក្រុមហ៊ុនអាកាសចរណ៍ VietJet និង Vietnam Airlines បានទទួលបានព្រមានទៅលើការលក់សំបុត្រ ដែលគ្មានម៉ោងហោះហើរសម្រាប់ពិធីបុណ្យ ស្របតាមចន្ទគតិជារៀងរាល់ឆ្នាំ៕
រក្សាសិទ្ធិដោយ៖CEN