ភ្នំពេញ ៖ លោកហេង សួរ រដ្ឋលេខាធិការ និងជាអ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈ បានបញ្ជាក់ថា ចំនួនកម្មករនិយោជិតសរុបនៅក្នុងប្រព័ន្ធទិន្នន័យប្រមាណជា ១លាន ៨សែននាក់ (មានទាំងសេវាផ្សេងៗ ក្រុមហ៊ុនតូច ក្រុមហ៊ុនធំ) ដែលត្រូវចាក់វ៉ាក់សាំងការពារជំងឺកូវីដ១៩ ហើយតាមការប៉ាន់ស្មានកម្មករនិយោជិតប្រហែលជា ១លាន ២សែននាក់ នឹងប្រើរយៈពេល ៦ខែសម្រាប់ធ្វើយុទ្ធនាការនេះ ប៉ុន្តែធ្វើម៉េចក្នុងរយៈពេល ៣ខែនេះ ចាក់ឲ្យបានពី ៤០ម៉ឺននាក់ ទៅ ៦០ម៉ឺននាក់។
អ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈ បានបន្តថា ចាប់ពីថ្ងៃទី៧ ខែមេសា អនុគណៈកម្មការចំពោះកិច្ចរបស់ក្រសួងបានចាប់ផ្តើមចាក់ជូនកម្មករនិយោជិតជាទូទៅ ដោយបានផ្តើមចាក់វ៉ាក់សាំងចំនួន ៣គោលដៅ រួមមាននៅសួនឧស្សាហកម្មកាណាឌីយ៉ា នៅតំបន់សួនឧស្សាហកម្មដំបូលខៀវ អាយអេសអាយ (ISI) និងនៅតំបន់សេដ្ឋកិច្ចពិសេសភ្នំពេញ។ នៅថ្ងៃទី៩ ខែមេសា នេះ ក្រសួងបានចាប់ផ្តើមដំណើរការចាក់វ៉ាក់សាំងជូនកម្មករនិយោជិតចំនួនបីកន្លែងទៀត គឺទី១. នៅក្នុងតំបន់សួនវឌ្ឍនៈ ១ , សួនវឌ្ឍនៈ ២ និងនៅតាមរោងចក្រមួយចំនួន។ ហើយរំពឹងថា នឹងអាចពង្រីកទីតាំងចាក់វ៉ាក់សាំងជូនកម្មករនិយោជិតកាន់តែច្រើនថែមទៀត នៅពេលដែលរោងចក្រនីមួយៗ ផ្តល់នូវលក្ខណៈសម្បត្តិ ផ្តល់នូវបញ្ជីឈ្មោះ និងទីតាំងសម្រាប់ក្រុមការងារដើម្បីចុះទៅចាក់។
លោកហេង សួរ បានបន្តថា នៅសប្តាហ៍ក្រោយនឹងអាចមានចំនួន ៦ទីតាំងបន្ថែមទៀតសម្រាប់ក្រុមការងារចុះទៅចាក់វ៉ាក់សាំងជូនកម្មករនិយោជិត។ ហើយរំពឹងថា នៅក្នុងមួយថ្ងៃអាចចាក់វ៉ាក់សាំងបានពី ៨ពាន់នាក់ ទៅ ១ម៉ឺននាក់៕ រក្សាសិទ្ធិដោយៈ ចេស្តារ
