កណ្តាល ៖ អគ្គីភ័យបានលេបត្របាក់ផ្ទះក្បឿងសង់ថ្មខាងក្រោមឈើលើអស់ចំនួន៣ខ្នងខណៈម្ចាស់ផ្ទះដុតធូបសែនថ្ងៃសីល។
ហេតុការណ៍គ្រោះអគ្គីភ័យខាងលើនេះបានកើតឡើងកាលពីវេលាម៉ោង១០និង៣០នាទីព្រឹកថ្ងៃទី១១ ខែមេសា ឆ្នាំ២០២១ ស្ថិតនៅតាមបណ្តោយផ្លូវជាតិលេខ១ ភូមិដីឥដ្ឋកោះផុស ឃុំដីឥដ្ឋ ស្រុកកៀនស្វាយ ខេត្តកណ្តាល។
ផ្ទះក្បឿង៣ខ្នងខាងលើប្តីឈ្មោះ ហ៊ុយ ប្រពន្ធឈ្មោះធូ ពួកគាត់មានមុខរបរជាគ្រូបង្រៀននិងជាអ្នកគួកជេដីផងដែរ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុម្ចាស់ផ្ទះបានដុតធូបសែនថ្ងៃសីលនៅជាន់ខាងលើ រួចក៏នាំគ្នាចុះមកអង្គុយលេងនៅខាងក្រោម ខណៈពេលនោះភ្លើងធូបបានធ្លាក់មកលើកម្រាលពូកបង្កឲ្យមានអណ្តាតភ្លើងឆាបឆេះយ៉ាងសន្ធោរសន្ធៅបង្កឲ្យមានការភ្ញាក់ផ្អើលដល់ផ្ទះប្រជាពលរដ្ឋនៅក្បែរៗនោះ ភ្លាមៗនោះរថយន្តពន្លត់អគ្គីភ័យរបស់ស្នងការដ្ឋាននគរបាលខេត្តកណ្តាលបានចេញទៅអន្តរាគមន៍ទប់ស្កាត់ដើម្បីកុំឲ្យឆ្លងរីករាលដាលដល់ផ្ទះប្រជាពលរដ្ឋដែលនៅជាប់ៗគ្នា តែដោយសារតែផ្លូវច្រកចូលចូលតូចពេកធ្វើឲ្យរថយន្តរថយន្តពន្លត់អគ្គីភ័យពិបាកបត់ចូលពេកទើបបណ្តាលឲ្យឆេះផ្ទះក្បឿង៣ខ្នងនេះខូចខាតទាំងស្រុងតែម្តង។
ក្នុងហេតុការណ៍អគ្គីភ័យខាងលើនេះពុំមានបណ្តាលឲ្យណាម្នាក់រងរបួសនោះទេ បើតាមការបញ្ជាក់ពីម្ចាស់ផ្ទះដែលអះអាងថាអគ្គីភ័យបានលេបត្របាក់ទ្រព្យសម្បត្តិរបស់គាត់សរុបជិត១០ម៉ឺនដុល្លារឯណោះ៕
រក្សាសិទ្ធិ ដោយ-សួង សាម
