ភ្នំពេញ ÷ អគ្គិភ័យបានឆាបឆេះតូបលក់ចាប់ហួយមួយតូប និងបន្ទប់ជួលអស់២បន្ទប់ថែមទៀត រួមទាំងសម្ភារៈមួយចំនួននៅក្នុងនោះ ស្ទើរទាំងស្រុងបង្កឡើងដោយឆ្លងចរន្តអគ្គិសនី។
ហេតុការណ៍ភ្ញាក់ផ្អើលនេះដែរ បានកើតឡើងនៅវេលាម៉ោង ៣ និង៤០នាទីទៀបភ្លឺ ឈានចូលថ្ងៃពុធទី១៤ ខែមេសា ឆ្នាំ២០២១ ស្ថិតនៅតាមបណ្តោយផ្លូវជាតិលេខ៤ ចំណុចជាប់និងស្តុបទំនប់កប់ស្រូវ ក្នុងភូមិព្រៃស្វាយ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
បើយោងតាមការបញ្ជាក់ពីម្ចាស់តូប មានឈ្មោះ ហូក ធារី ភេទស្រីអាយុ៤១ ឆ្នាំ មុខរបរលក់គ្រឿងភេសជ្ជៈបានរៀបរាប់ឲ្យដឹងថា នៅមុនពេលកើតហេតុខាងលើ រូបគាត់បានចាក់សោតូបចោលរួចចេញទៅសំរាកនៅផ្ទះមួយទៀត ជិតបន្ទប់លក់ដូរខាងលើ បន្ទាប់មកស្រាប់តែដល់ម៉ោងកើតហេតុ បានបងប្អូនប្រជាពលរដ្ឋរសនៅជិតផ្ទះ បានរត់ទៅគោះទ្វារប្រាប់រូបគាត់ថាភ្លើងកំពុងតែឆេះតូប និងបន្ទប់ជួល២បន្ទប់ទៀតរបស់គាត់អស់ហើយ ឮបែបនេះគាត់ក៏ប្រញាប់ប្រញាលស្រែកឲ្យអ្នកជិតខាងជួយ យកបំពង់ពន្លត់អគ្គិភ័យ និងទាញទុយោទឹកជួយបាញ់ទប់ស្កាត់សិន ដោយសភាពអណ្តាតភ្លើងនៅតែឆាបឆេះឡើង សន្ធោសន្ធៅពេកទើបរូបគាត់បានទាក់ទងទៅ សមត្ថកិច្ចសុំរថយន្តពន្លត់អគ្គិភ័យឲ្យចុះមកជួយបាញ់ពន្លត់ភ្លាមៗផងដែរ។
ក្រោយពេលបាញ់ពន្លត់ប្រើប្រាសរថយន្តអស់៣គ្រឿង។ ហើយមិនមានអ្នកស្លាប់ និងមិនមានអ្នករបួសនោះទេ។
ចំណែកឯការខូចខាតវិញ ឆេះអស់មួយតូប និងបន្ទប់ជួលអស់២បន្ទប់ រួមមានគ្រឿងកំប៉ុងនៅក្នុងតូបនោះឆេះអស់ស្ទើរទាំងស្រុង៕ រក្សាសិទ្ធិដោយ៖សា មេត
