ភ្នំពេញ ៖ ដូចដែលប្រិយមិត្តបានជ្រាបហើយ ពីចោរស្រីរូបស្រស់ម្នាក់ តែងខ្លួនស្លៀកពាក់ឡើងហំហួន តែដើរបោកគេ ជាពិសេសប្រើល្បិចចូលទិញទូរស័ព្ទ រួចបន្លំលួចដាក់ក្នុងកាបូបតែម្តង។ ជាក់ស្តែង កាលពីថ្មីៗនេះ ម្ចាស់ហាងទូរស័ព្ទមួយកន្លែង បានចាប់បានចោរស្រីរូបនេះ បន្ទាប់ចូលទិញទូរស័ព្ទ២គ្រឿង ដែលមានតម្លៃ ៥០០ ដុល្លារ។
នេះតាមម្ចាស់ហាងទូរស័ព្ទដែលមានគណនីហ្វេសប៊ុកឈ្មោះ Sithi Na បានបង្ហោះ ករណីនេះ កាលពីថ្ងៃទី ០៨ ខែមេសា ឆ្នាំ ២០២១ ឲ្យដឹងថា ៖ «សូមបងប្អូនប្រុងប្រយត្ន័ទាំងអស់គ្នា ជនខិលខូចមួយនេះបានចូលមកបន្លំយកទូរស័ព្ទពីរគ្រឿងពីរហាងខ្ញុំ តែខ្ញុំចាប់បាន សូមបងប្អូនប្រយ័ត្នផង ល្បិចខ្ពស់ណាស់(កំពុងកូវីដផងមកធ្វើបាបឯងទៀត)»។
ដោយឡែកថ្មីៗនេះ ម្ចាស់ហាងខាងលើ ក៏បានភ្ជាប់ផុសមួយដែលបានបញ្ជាក់ថា ចោរស្រីនេះត្រូវបានវាស់កម្ពស់ហើយ និងអបអរសាទរយ៉ាងដូច្នេះថា៖ «Hmm លួចគេរហូតម៉ង រៀងរាល់ថ្ងៃតែម្តង ខំលើកលែងឱ្យហើយ តែមិនកែខ្លួនសោះ ម្នាក់នេះហើយដែលចូលបន្លំលួចទូរស័ព្ទនៅហាងខ្ញុំថ្ងៃមុន ឥឡូវត្រូវគេចាប់បានសម្រេចហើយ អបអរសាទរអ្នកចាប់បាន»។
ក្នុងនោះតាមរយៈគណនីឈ្មោះ TYTY Modern Phone Shop បានរៀបរាប់ឲ្យដឹងថា៖ «នារីរូបស្រស់ដើរឆបោកប្រើល្បិចទិញទូរស័ព្ទហើយទៅយកលុយមកឲ្យតាមក្រោយ ប្រញ៉ាប់យកមួយហើយទុកមួយសិនបានអោយលុយសរុប ឥលូវវាស់កម្ពស់ធ្វើកិច្ចសន្យា និងធ្វើការអប់រំដោយពូៗសមត្ថកិច្ច។ បងប្អូនគួរតែបន្តការប្រុងប្រយ័ត្នចំពោះនារីម្នាក់នេះបន្ថែមទៀត»៕ រក្សាសិទ្ធិដោយ៖ លឹម ហុង
