មេដឹកនាំមីយ៉ានម៉ា អ្នកស្រី អ៊ុងសាន ស៊ូជី ត្រូវបានសារមន្ទីរមួយក្នុងអាមេរិច ដកយកពានរង្វាន់កិត្តិយសដ៏ល្បីល្បាញ ដោយសារតែសកម្មភាពបន្តហឹង្សាប្រឆាំងនឹងក្រុមជនជាតិដើមភាគតិចរ៉ូហ៊ីងយ៉ា នៅក្នុងរដ្ឋរ៉ាឃីន ប្រទេសមីយ៉ាន់ម៉ា។ នេះបើតាមការចេញផ្សាយរបស់ CNN នៅថ្ងៃព្រហស្បតិ៍នេះ។
អ្នកស្រី អ៊ុងសាន ស៊ូជី ធ្លាប់ជាអ្នកតស៊ូស្វែងរកសិទ្ធិសេរីភាពដ៏ខ្លាំងក្លា និងត្រូវសហគមន៏អន្តរជាតិមើលឃើញអ្នកស្រីថាជាមនុស្សអស្ចារ្យ ប៉ុន្តែ នៅថ្ងៃពុធម្សិលមិញនេះ សារមន្ទីរ (Holocaust Memorial Museum) បានប្រកាសថា ខ្លួនបានរំលាយពានរង្វាន់ Elie Wiesel Award នោះចោលវិញ ក្រោយពេលពួកគេប្រគល់ឲ្យអ្នកស្រី កាលពីឆ្នាំ ២០១២។
នៅក្នុងសំបុត្រមួយច្បាប់ទៅកាន់មេដឹកនាំមីយ៉ានម៉ា លោក Sara Bloomfield ដែលជាប្រធានសារមន្ទីរខាងលើ បានបញ្ជាក់ថា ពួកយើ់ងចាត់ទុកបញ្ហាជារឿងធ្ងន់ធ្ងរ និងត្រូវបង្ខំចាត់វិធានការ ដោយសារការបណ្តេញចេញ និងការសម្លាប់ ពីសំណាក់កងកំលាំងរដ្ឋាភិបាលមីយ៉ានម៉ា លើជនជាតិដើមភាគតិចរ៉ូហ៊ីងយ៉ា។
សូមរំលឹកផងដែរថា កាលពីខែវិច្ឆការ សលវិទ្យាល័យដ៏ល្បីល្បាយមួយរបស់អាមេរិចក៏បានសម្រេចចិត្តដកពានរង្វាន់កិត្តិយសពីអ្នកស្រីផងដែរ ដោយសារបញ្ហាសម្លាប់យ៉ាងសាហាវឃោរឃៅទៅលើជនជាតិដើមទាំងនោះ៕ សុភ័ក្ត្រ