កំពង់ធំ ៖ ប្រិយមិត្តជាច្រើន ជាពិសេសបងប្អូនអ្នកប្រើប្រាស់បណ្តាញសង្គម ប្រាកដណាស់បានឃើញហើយ ពីទង្វើដ៏មហាផ្គើនរបស់យុវជនមួយក្រុម ពុំត្រឹមតែនាំគ្នាផឹកស៊ីបង្ហោះតាមបណ្តាញសង្គម Tik Tok ផ្គើននឹងបម្រាមរបស់រាជរដ្ឋាភិបាលប៉ុណ្ណោះទេ តែថែមឌឺដាក់ក្រសួងសុខាភិបាល ឲ្យមកព្រមានទៀតផង។
តែទោះយ៉ាងណា ជាមួយនឹងទង្វើដ៏ផ្គើន និងក៏ជាគំរូដ៏អាក្រក់របស់ក្រុមនេះ បានធ្វើឲ្យមហាជនជាច្រើនក្តៅក្រហាយ ស្នើឲ្យសមត្ថកិច្ចចាត់វិធានការកុំឲ្យរួចខ្លួន នៅទីបំផុត សមត្ថកិច្ចបានធ្វើការកំណត់មុខសញ្ញា និងឈានឃាត់ខ្លួនពួកគេ ដែលមានគ្នីគ្នាទាំងប្រុសនិងស្រីសរុបចំនួន ១៤ នាក់។
នេះបើយោងតាមគណនីហ្វេសប៊ុកឈ្មោះ Sok Lou បានបង្ហោះប្រាប់ឲ្យដឹងថា «រដ្ឋបាលខេត្តកំពង់ធំ កាលពីព្រឹកថ្ងៃទី១៨ ខែមេសា ឆ្នាំ២០២១ បានសម្រេចអនុវត្តពិន័យអន្តរការណ៍ និងធ្វើការអប់រំយុវជនចំនួន០៩នាក់ និងស្រាវជ្រាវមុខសញ្ញា០៥នាក់ បន្ថែមទៀត ដែលមិនគោរពវិធានការរដ្ឋបាល ក្នុងការទប់ស្កាត់ការឆ្លងរាលដាលនៃជំងឺកូវីដ១៩ ដោយបានធ្វើការជួបជុំប្រមូលផ្ដុំគ្នាទទួលទានគ្រឿងស្រវឹង និងបានធ្វើការផុសផ្សព្វផ្សាយលើបណ្ដាញសង្គម (Tik Tok) យ៉ាងគឃ្លើន ដោយមិនគោរពតាមបម្រាមរបស់រាជរដ្ឋាភិបាល និងសេចក្ដីសម្រេចរបស់រដ្ឋបាលខេត្ត ក្នុងការហាមឃាត់មិនឲ្យមានការជួបជុំ ផឹកសុី…។
រដ្ឋបាលខេត្តកំពង់ធំ សូមធ្វើការអំពាវនាវដល់បងប្អូនប្រជាពលរដ្ឋឲ្យបន្តគោរព និងយកចិត្តទុកដាក់ ចូលរួមជាមួយវិធានការ «៣ការពារ ៣កុំ» ហើយអនុវត្តឲ្យមានប្រសិទ្ធភាពខ្ពស់ នូវសេចក្តីសម្រេចរបស់រាជរដ្ឋាភិបាល សេចក្តីណែនាំ របស់ក្រសួងសុខាភិបាល និងសេចក្តីសម្រេចនានាស្តីពីវិធានការរដ្ឋបាល ក្នុងការទប់ស្កាត់ជំងឺកូវីដ១៩ ដើម្បីចៀសផុតការឆ្លងរាលដាល ដល់ក្រុមគ្រួសារ និងសហគមន៍។»៕ រក្សាសិទ្ធិដោយ៖ លឹម ហុង
