ប្រទេសចិនបាននិយាយថា ខ្លួនអបអរសាទរចំពោះប្រទេសកូរ៉េខាងជើង និងខាងត្បូង ក្រោយពេលពួកគេបានព្រមព្រៀងគ្នាធ្វើកិច្ចប្រជុំកំពូល ដើម្បីកាត់បន្ថយភាពតានតឹងនៅឧបទ្វីប។ នេះបើតាមការចេញផ្សាយរបស់ BBC នៅថ្ងៃរសៀលនេះ។
ទោះយ៉ាងណា មន្ត្រីការបរទេសចិន បានសំដែងការប្រុងប្រយ័ត្នថា វាដូចជាឆាប់ពេកហើយក្នុង ការសន្និដ្ឋានថាការចរចារនឹងអាចនឹងនាំឲ្យកិច្ចប្រជុំចុងក្រោយនេះ ដោះស្រាយបញ្ហាសំខាន់បាន។
ការថ្លែងបែបនេះរបស់មន្ត្រីចិនធ្វើឡើង ក្រោយពេលមន្ត្រីជាន់ខ្ពស់កូរ៉េខាងត្បូង បានទៅចូលរួមកិច្ចប្រជុំជាមួយនឹងមេដឹកនាំកំពូលកូរ៉េខាងជើង គីម ជុងអ៊ុន ក្នុងទីក្រុងព្យុងយ៉ាងនៅដើមសប្តាហ៏នេះ។
មន្ត្រីជាន់ខ្ពស់កូរ៉េខាងត្បូង ដែលបានជួបចរចារជាមួយនឹង គីម ជុងអ៊ុន បច្ចុប្បន្ន កំពុងធ្វើដំណើរទៅកាន់សហរដ្ឋអាមេរិច ហើយត្រូវគេរំពឹងថា មន្ត្រីទាំងនោះនឹងនាំសាររបស់លោក គីម ជុងអ៊ុន ប្រាប់ដល់មន្ត្រីអាមេរិច។
កូរ៉េខាងត្បូង បាននិយាយថា កូរ៉េខាងជើងបានបញ្ជាក់ថា ខ្លួនត្រៀមខ្លួនរួចរាល់ក្នុងការបោះបង់កម្មវិធីនុយក្លេអ៊ែរ ប្រសិនជាសហរដ្ឋអាមេរិចធានាបញ្ហាសន្តិសុខរបស់ខ្លួន។
ប្រធានសន្តិសុខជាតិកូរ៉េខាងត្បូង Chung Eui-yong បានថ្លែងប្រាប់អ្នកសារព៌តមានដូច្នេះថា “ពួកយើងមិនអាចលាតត្រដាងអ្វីៗទាំងអស់ទៅកាន់ប្រព័ន្ធផ្សព្វផ្សាយបានទេ ប៉ុន្តែពួកយើងមានសាររបស់កូរ៉េខាងជើង ហើយពួកយើងនឹងបញ្ជូនតទៅកាន់អាមេរិច នៅពេលយើងដល់ទីនោះ”៕ សុភ័ក្ត្រ