រាជធានីភ្នំពេញ ៖ បុរសម្នាក់ឈ្មោះ លាន់ ឡា ត្រូវបានសមត្ថកិច្ចនៃស្នងការដ្ឋាននគរបាលរាជធានីភ្នំពេញ ចាប់ឃាត់ខ្លួនបញ្ជូនទៅតុលាការនៅវេលាម៉ោង ០៣និង៤០នាទីរសៀលថ្ងៃទី២៤នេះ លើករណីល្មើសនឹងវិធានសុខាភិបាល ដោយបានយកសំណាកហើយមិនព្រមធ្វើចត្តាឡីស័ក និងបានទៅចូលរួមមង្គលការនៅខេត្តកំពត ។
ដោយមានការសហការរវាងកម្លាំងជំនាញ ផែនការងារសន្តិសុខ នៃស្នងការដ្ឋាននគរបាលរាធានីភ្នំពេញ ជាមួយគណកម្មការអន្តរក្រសួង ដើម្បីប្រយុទ្ធការឆ្លងរាលដាលវីរុសកូវីដ១៩ សមត្ថកិច្ចផែនការងារសន្តិសុខ នៃស្នងការដ្ឋាននគបាលរាជធានីភ្នំពេញ នៅរសៀលថ្ងៃទី២៤ ខែមេសា ឆ្នាំ២០២១ បានធ្វេីការឃាត់ខ្លួនបុរសម្នាក់ឈ្មោះ លាន់ ឡា ដើម្បីរៀបចំសំណុំរឿងបញ្ជូនទៅសាលាដំបូងរាជធានីភ្នំពេញ ដែលបានល្មើសនឹងវិធានការសុខាភិបាល នៅថ្ងៃទី២៤ ខែមេសា ឆ្នាំ២០២១ វេលាម៉ោង ០៨:៣៦នាទីព្រឹក កម្លាំងជំនាញការិយាល័យប្រឆាំងបទល្មើសបច្ចេកវិទ្យាផែនការងារសន្តិសុខនៃស្នងការដ្ឋាននគរបាលរាជធានីភ្នំពេញ បាននាំខ្លួនឈ្មោះ លាន់ ឡា ភេទប្រុស អាយុ២៣ឆ្នាំ ស្នាក់នៅផ្ទះជួល ផ្លូវ១០០៥ កែង៣៦៥ សង្កាត់បឹងកេងកង៣ ខណ្ឌបឹងកេងកង មកពីមជ្ឈមណ្ឌលចត្តាឡីស័ករាជធានីភ្នំពេញ ក្នុងខណ្ឌព្រែកព្នៅ ដែលមានវិជ្ជមានកូវិដ-១៩ ហើយបានព្យាបាលជាសះស្បើយ និងធ្វើចក្តាឡីស័កបន្តរយៈពេល១៤ថ្ងៃរួចរាល់ យកមកការិយាល័យប្រឆាំងបទល្មើសបច្ចេកវិទ្យា ដើម្បីអនុវត្តតាមនីតិវិធីច្បាប់ ក្នុង ករណីល្មើសវិធានការរដ្ឋបាល ទប់ស្កាត់ការឆ្លងរាលដាលជំងឺកូវិដ-១៩ ។
ដំណើររឿង កាលពីថ្ងៃទី១២ ខែមីនា ឆ្នាំ២០២១ បុគ្គលនេះមានអាការៈក្តៅខ្លួន ក្អក និងឈឺបំពង់ក ហើយបានទៅយកសំណាក នៅមន្ទីរពេទ្យមិត្តភាពខ្មែរ-សូវៀត ហើយគ្រូពេទ្យតម្រូវឱ្យធ្វើចក្តាឡីស័ក១៤ថ្ងៃនៅផ្ទះ ប៉ុន្តែនៅថ្ងៃទី១៣ ខែមីនា ឆ្នាំ២០២១ បុគ្គលឈ្មោះ លាន់ ឡា និងមិត្តភ័ក្ត បានទៅស្ទីម និងស្ប៉ានៅ Arthur and Paul ផ្ទះលេខ២៧ ផ្លូវ៧១ សង្កាត់បឹងកេងកង៣ ខណ្ឌបឹងកេងកង៣ ខណ្ឌបឹងកេងកង រាជធានីភ្នំពេញ លុះថ្ងៃទី១៤ ខែមីនា ឆ្នាំ២០២១ បុគ្គលខាងលើ រួមនឹងមិត្តភក្តិ បានជិះរថយន្តឈ្នួល ទៅចូលរួមពិធីមង្គលការ នៅភូមិដំណាក់ទ្រព្យ ឃុំក្រាំងស្នាយ ស្រុកឈូក ខេត្តកំពត ។
រហូតដល់វេលាម៉ោង១៩និង៣០នាទី ក្នុងថ្ងៃខែឆ្នាំដដែល ក្រុមគ្រូពេទ្យបានទំនាក់ទំនងទៅឈ្មោះ លាន់ ឡា ថា ខ្លួនមានវិជ្ជមានកូវិដ-១៩ ៕រក្សាសិទ្ធិដោយ៖បញ្ញាស័ក្តិ
