ប្រធានាធិបតីអាមេរិច ដូណាល់ ត្រាំ ទទួលបានការគាំទ្រពីចិនក្នុងការបន្តការដាក់សម្ពាធលើប្រទេសកូរ៉េខាងជើង ក្រោយពេលមានការព្រួយបារម្ភថា ការប្រថុយលេងល្បែងការទូតជាមួយនឹងកូរ៉េខាងជើងអាចនាំស្ថាន ភាពធ្លាក់ទៅកាន់ភាពអាក្រក់ដូចដើម។
ការប្តេជ្ញាចិត្តរបស់មេដឹកនាំមហាអំណាចទាំងពីរក្នុងការបន្តទណ្ឌកម្មប្រឆាំងកូរ៉េខាងជើង ធ្វើឡើងក្នុងជំនួប តាមទូរស័ព្ទកាលពីថ្ងៃសុក្រម្សិលមិញនេះ។ នេះបើតាមការបញ្ជាក់របស់សេត វិមានអាមេរិច។
សេតវិមានបញ្ជាក់ថា លោក ត្រាំ និង ស៊ី ជីងពីងប្តេជ្ញាចិត្តរក្សាការដាក់សម្ពាធ និងទណ្ឌកម្ម រហូតទាល់តែកូរ៉េខាងជើងមានចំណាត់ការជាក់ស្តែងឆ្ពោះទៅកាន់ការលុបបំបាត់អាវុធនុយក្លេអ៊ែរយ៉ាងពិតប្រាកដ។
សូមបញ្ជាក់ថា លោក ដូណាល់ ត្រាំ បានធ្វើឲ្យពិភពលោកមានការភ្ញាក់ផ្អើល ក្រោយពេលលោកទទួលយកការអញ្ជើញដើម្បីធ្វើកិច្ចប្រជុំកំពូលជាមួយនឹងមេដឹកនាំជាន់ខ្ពស់បំផុតរបស់កូរ៉េខាងជើង គីម ជុងអ៊ុន នៅក្នុងខែមេសាខាងមុខ។
ការទទួលយកការសុំចរចារនេះ កើតឡើងក្រោយពេលមន្ត្រីជាន់ខ្ពស់កូរ៉េខាងត្បូង ដែលបានជួបប្រជុំជាមួយនឹង គីម ជុងអ៊ុន បានបញ្ជាក់ថា កូរ៉េខាងជើងបញ្ជាក់ថា ខ្លួនសន្យាលុបបំបាត់អាវុធនុយក្លេអ៊ែរ និងបញ្ឍប់បាញ់សាកល្បងមីស៊ីល។
ជាការកត់សម្គាល់ ប្រទេសកូរ៉េខាងជើង មិនបានបាញ់សាកល្បងមីស៊ីលនោះឡើយចាប់តាំងពីខែវិច្ឆិការមក៕ សុភ័ក្ត្រ