ខេត្តសៀមរាប ៖ រដ្ឋបាលខេត្តបិទខ្ទប់តំបន់មួយចំនួនមុខបរិវេណមន្ទីរពេទ្យបង្អែកខេត្ត និងបរិវេណជុំវិញផ្សារកណ្តាល ស្ថិតនៅភូមិមណ្ឌល១ សង្កាត់ស្វាយដង្គំ ក្រុងសៀមរាប និងករណីរកឃើញអ្នកវិជ្ជមានជំងឺកូវីដ-១៩ ថ្មី ១នាក់នៅថ្ងៃទី២៨ ខែមេសា ឆ្នាំ២០២១។
រដ្ឋបាលខេត្តសៀមរាប មានកិត្តិយស សូមជម្រាបជូនសាធារណជនឱ្យបានជ្រាបថា៖ ក្នុងព្រឹត្តិការណ៍ការឆ្លងរាលដាលជំងឺកូវីដ-១៩ ចូលក្នុងសហគមន៍ ២០កុម្ភៈនេះ ខេត្តសៀមរាប បានរកឃើញវិជ្ជមានជំងឺកូវីដ-១៩ថ្មី ចំនួន១នាក់ នៅថ្ងៃទី២៨ ខែមេសា ឆ្នាំ២០២១ ឈ្មោះ ស៊ាង គឹមសាន ភេទប្រុស អាយុ៤៧ឆ្នាំ រស់នៅភូមិលាបទង ឃុំកំពង់ចិនត្បូង ស្រុកស្ទោង ខេត្តកំពង់ធំ ដោយបានធ្វើដំណើរមកជាមួយសមាជិកគ្រួសារ៣រូប រួមមាន៖
១. លោក លី ចាន់ថា ត្រូវជាប្អូនថ្លៃ បានជូនលោក ស៊ាង គឹមសាន មកដល់មន្ទីរពេទ្យខេត្តសៀមរាប នាយប់ថ្ងៃទី២៦ ខែមេសា ឆ្នាំ២០២១ ហើយក៏បានធ្វើដំណើរវិលត្រឡប់ទៅស្រុកស្ទោង ខេត្តកំពង់ធំវិញទាំងយប់ រហូតដល់ល្ងាចថ្ងៃទី២៨ ខែមេសា ឆ្នាំ២០២១ ត្រូវបានក្រុមគ្រូពេទ្យខេត្តកំពង់ធំ យកសំណាកធ្វើតេស្តទទួលបានលទ្ធផលវិជ្ជមានជំងឺកូវីដ-១៩។
២. ប្រពន្ធរបស់លោក ស៊ាង គឹមសាន កំពុងធ្វើចត្តាឡីស័កនៅសាលាគរុកោសល្យខេត្តសៀមរាប និងបានយកសំណាកធ្វើតេស្តលើកទី១ លទ្ធផលអវិជ្ជមាន។
៣. កូនរបស់លោក ស៊ាង គឹមសាន បានធ្វើដំណើរពីមន្ទីរពេទ្យខេត្តដោយជិះម៉ូតូឌុបទៅម្តុំផ្សារលើ និងបានបន្តដំណើរតាមរថយន្តក្រុងទៅកាន់ស្រុកស្ទោង ខេត្តកំពង់ធំ វិញនារសៀលថ្ងៃទី២៧ ខែមេសា ឆ្នាំ២០២១ ហើយត្រូវបានក្រុមគ្រូពេទ្យខេត្តកំពង់ធំយកសំណាកធ្វើតេស្តលើកទី១ទទួលបានលទ្ធផលអវិជ្ជមាន ។
រដ្ឋបាលខេត្ត សូមបញ្ជាក់ជូនបន្ថែមថា លោក ស៊ាន គឹមសាន បានធ្វើដំណើរទៅមន្ទីរពេទ្យបង្អែកខេត្តសៀមរាប ដើម្បីលាងឈាម កាលពីថ្ងៃទី២៣ ខែមេសា ឆ្នាំ២០២១ និងបានវិលត្រឡប់មកម្តងទៀត នៅថ្ងៃទី២៦ ខែមេសា ឆ្នាំ២០២១ តែដោយមានរោគសញ្ញាសង្ស័យ ទើបក្រុមគ្រូពេទ្យនៅមន្ទីរពេទ្យបង្អែកខេត្តសៀមរាប បាននាំទៅយកសំណាកធ្វើតេស្តស្រាវជ្រាវ។ ដោយឡែកក្រុមគ្រូពេទ្យដែលពាក់ព័ន្ធ ត្រូវបាន យកសំណាកធ្វើតេស្តស្រាវជ្រាវ និងទទួលបានលទ្ធផលអវិជ្ជមាន។
ចំពោះករណីនេះ គណៈបញ្ជាការឯកភាពរដ្ឋបាលខេត្ត សម្រេចបិទខ្ទប់បរិវេណមុខមន្ទីរពេទ្យបង្អែកខេត្តសៀមរាប ផ្សារកណ្តាល និងតំបន់ជុំវិញផ្សារកណ្តាល ដែលស្ថិតនៅភូមិមណ្ឌល១ សង្កាត់ស្វាយដង្គំ ក្រុងសៀមរាប ចាប់ពីកាលបរិច្ឆេទជូនដំណឹងនេះតទៅ រហូតដល់មានការជូនដំណឹងជាថ្មីឡើងវិញ។
ជាមួយគ្នានេះ រដ្ឋបាលខេត្តសៀមរាប សូមជម្រាបជូនបងប្អូនប្រជាពលរដ្ឋ អំពីមុខសញ្ញាពាក់ព័ន្ធដោយផ្ទាល់ ឬដោយប្រយោលជាមួយអ្នកវិជ្ជមានខាងលើ ឬទីតាំងដែលបានបិទខ្ទប់ខាងលើ ចាប់ពីថ្ងៃទី២៣ ខែមេសា ឆ្នាំ២០២១ សូមរួសរាន់ធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួន ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត។ ប្រសិនបើមានការប្រែប្រួលសុខភាព សូមផ្តល់ព័ត៌មានមកកាន់លេខទូរស័ព្ទ ០១២ ៩៥៥ ៤៧៤/០៧៧ ៧៨៩ ០០៧ ដើម្បីក្រុមការងារចាត់វិធានការក្នុងការយកសំណាកធ្វើតេស្តស្រាវជ្រាវ។
រដ្ឋបាលខេត្តសៀមរាប សង្ឃឹមយ៉ាងមុតមាំថា បងប្អូនប្រជាពលរដ្ឋទាំងអស់ ចូលរួមអនុវត្តឱ្យបានម៉ឺងមាត់ និងអនុវត្តនូវវិធានការការពាររបស់រាជរដ្ឋាភិបាល និងការណែនាំរបស់ក្រសួងសុខាភិបាល៕រក្សាសិទ្ធិដោយ៖បញ្ញាស័ក្តិ
