រាជធានីភ្នំពេញ ៖ ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ បានឲ្យដឹងថា បុរសម្នាក់ឈ្មោះ ឈួន ពុទ្ធា ដែលបើករថយន្តល្មេីសនឹងវិធាការរដ្ឋបាលក្នុងពេលបិទខ្ទប់ ហើយបង្កហិង្សាមកលើសមត្ថកិច្ច ត្រូវបានឃាត់ខ្លួន និងបញ្ជូនទៅតុលាការនៅរសៀលថ្ងៃទី១ ខែឧសភា ឆ្នាំ២០២១នេះ ដើម្បីអនុវត្តបន្តតាមនីតិវិធីច្បាប់។
កាលពីថ្ងៃទី៣០ ខែមេសា ឆ្នាំ២០២១ កម្លាំងនគរបាលនៃអធិការដ្ឋាននគរបាលខណ្ឌពោធិ៍សែនជ័យ បានធ្វើការឃាត់ខ្លួនជនសង្ស័យចំនួន ០១ នាក់ ពីបទល្មើសនឹងបម្រាមគោចររបស់ច្បាប់រដ្ឋបាល និងបង្កហិង្សា ដោយវាយមកលេីសមត្ថកិច្ច កំពុងអនុវត្តច្បាប់ ដែលទីតាំងស្ថិតនៅភូមិ ត្រពាំងទា សង្កាត់សំរោងក្រោម ខណ្ឌពោធិ៍សែនជ័យ។
ដំណើររឿង ៖ នៅមុនពេលកើតហេតុ កម្លាំងនគរបាលនៃអធិការខណ្ឌពោធិ៍សែនជ័យ បានដាក់គោលដៅត្រួតពិនិត្យ ដើម្បីទប់ស្កាត់ការរីករាលដាលជំងឺកូវីឌ ១៩ តាមការណែនាំរបស់រាជរដ្ឋាភិបាល និងក្រសួងសុខាភិបាល ស្ថិតនៅតាមបណ្ដោយផ្លូវវិមានឈ្នះ ឈ្នះ ក្នុងភូមិត្រពាំងទា សង្កាត់សំរោងក្រោម ខណ្ឌពោធិ៍សែនជ័យ ស្រាប់តែជនសង្ស័យឈ្មោះ ឈួន ពុទ្ធា ភេទប្រុស បានបើករថយន្តមួយគ្រឿង ម៉ាក Nissan ពណ៌ខៀវ ពាក់ស្លាកលេខ ភ្នំពេញ 3 A8709 មានសណ្ដោងទូរកង់តឺន័រ ឆ្លងកាត់គោលដៅខាងលើដោយគ្មានការអនុញ្ញាត ទេីបកម្លាំងនគរបាលយើងដេញតាមជនសង្ស័យដែលកំពុងបេីករថយន្តចូលក្នុងផែស្ងួតអ៊ុយញ៊ុង ដែលមានចំងាយប្រហែល២០០មែត្រពីគោលដៅ។
ពេលនោះកម្លាំងនគរបាលនៃអធិការដ្ឋាននគរបាលខណ្ឌ បានចូលទៅឃាត់ខ្លួនជនសង្ស័យ ក៏ត្រូវជនសង្ស័យវាយមកលេីសមត្ថកិច្ច បណ្ដាលឲ្យកម្លាំងនគរបាលម្នាក់រងរបួស ទើបកម្លាំងនគរបាលធ្វើការឃាត់ខ្លួនយកមកសាកសួរនៅអធិការខណ្ឌ៕ រក្សាសិទ្ធិដោយ៖បញ្ញាស័ក្តិ
