ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានផ្តល់អំណោយដល់គ្រួសារនិវត្តន៍ជន នៃសមាគមអតីតយុទ្ធជនកម្ពុជា ខណ្ឌ៧មករា រាជធានីភ្នំពេញ មកពីចំនួន០៨សង្កាត់ សរុប១១១គ្រួសារ ដែលមានជីវភាពលំបាក មិនអាចចេញប្រកបមុខរបររកស៊ីបាននៅ ក្នុងដំណាក់កាលរាជធានីភ្នំពេញ ផ្ទុះរីករាលជំងឺកូវីដ១៩ និងរងការបិតខ្ទប់។
ការផ្តល់អំណោយដល់គ្រួសារនិវត្តន៍ជន នៃសមាគមអតីតយុទ្ធជនកម្ពុជា គឺតាមរយៈលោក ឃួង ស្រេង អភិបាលរាជធានីភ្នំពេញ និងជាប្រធានកិត្តិយសមាគមអតីតយុទ្ធជនកម្ពុជារាជធានីភ្នំពេញ។
អំណោយស្បៀងអាហារទាំងនេះ ត្រូវបានអាជ្ញាធរខណ្ឌ៧មករា ធ្វើការប្រគល់ជូនស្ថិតនៅរដ្ឋបាលខណ្ឌមករា កាលពីថ្ងៃទី០៤ ខែឧសភា ដោយក្នុង០១គ្រួសារទទួលបាន អង្ករ២៥គីឡូក្រាម , មី១កេស,ទឹកស៊ីអ៊ីវ០១យួរ និងទឹកត្រី១យួរ។
ការផ្តល់ជូនអំណោយជូនដល់គ្រួសារនិវត្តន៍ជន នៅក្នុងរាជធានីភ្នំពេញ គឺជាការឆ្លើយតបជាបន្ទាន់ ក្នុងដោះស្រាយឱ្យទាន់ពេលវេលាក្នុងការផ្គត់ផ្គង់ជីវភាពប្រចាំថ្ងៃ របស់ប្រជាពលរដ្ឋដែលរងផលប៉ះពាល់ដោយកូវីដ១៩ នៅគ្រាដែលប្រមុខរាជរដ្ឋាភិបាលកម្ពុជា បញ្ជាឱ្យទាហានដឹកជញ្ជូនស្បៀង ជួយសង្រ្គោះប្រជពលរដ្ឋ ដែលប្រឈមការខ្វះខាតស្បៀងអាហារនៅក្នុងតំបន់ក្រហម ដែលរងការបិទខ្ទប់រយៈពេល០៧ថ្ងៃ ដែលត្រូវបានអនុវត្តជំហ៊ានទី២ កាលពីថ្ងៃទី២៩ មេសា រហូតដល់ថ្ងៃទី០៥ ខែឧសភា ។ តំបន់ក្រហមនោះ ជាតំបន់ផ្ទុះរីករាលដាលកូវីដ១៩ ត្រូវបានហាមឃាត់មិនឱ្យប្រជាពលរដ្ឋ ធ្វើដំណើរចេញ-ចូលបាននោះឡើយ៕ រក្សាសិទ្ធិដោយៈ ចេស្តារ