ភ្នំពេញ ÷ មុននេះបន្ទិចមានមេឃភ្លៀងមួយមេយ៉ាងធំ និងលាយឡំខ្យលកន្រ្តាក់យ៉ាងខ្លាំង បណ្តាលឲ្យស្លាកប៉ាណូមួយដើម បាក់ធ្លាក់រាបដល់ដី សំណាងល្អមិនមាននរណាម្នាក់គ្រោះថ្នាក់នោះទេ។
ហេតុការណ៍នេះបានកើតឡើងកាលពីវេលាម៉ោង ៥និង០០នាទីល្ងាច ថ្ងៃព្រហស្បតិ៍ទី៦ ខែឧសភា ឆ្នាំ២០២១ ស្ថិតនៅតាមបណ្តោយផ្លូវជាតិលេខ២ ក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
យោងតាមសំដីប្រជាពលរដ្ឋរស់នៅជិតកន្លែងកើតហេតុ បានឲ្យដឹងថា នៅមុនពេលកើតហេតុខាងលើ ដោយស្ថានភាពខ្យល់បោកបក់យ៉ាងខ្លាំង និងបន្ទាប់មកក៏ភ្លៀងធ្លាក់មួយមេយ៉ាងធំ ស្រាប់តែគាត់ឃើញស្លាកប៉ាណូបានប៉ើងបង្គោលមួយចំហៀង រួចរលំធ្លាក់មកដល់ដីកាត់ទទឹងផ្លូវ ដោយក្នុងហេតុការណ៍នេះ មិនមានគ្រោះថ្នាក់ទៅដល់ប្រជាពលរដ្ឋ ដែលគាត់កំពុងតែធ្វើរដំណើរឆ្លងកាត់នោះទេ រងការខូចខាតតែបង្គោលស្លាកប៉ាណូមួយដើមតែប៉ុណ្ណោះ។
បន្ទាប់ពីកើតហេតុខាងលើ សមត្ថកិច្ចមូលដ្ឋានបានចុះមកដល់ រួចបានទំនាក់ទំនងទៅខាងជំនាញ ឲ្យចុះមកពិនិត្យដើម្បីកាត់ចេញកុំឲ្យមានការកកស្ទះ ដល់ប្រជាពលរដ្ឋកំពុងឆ្លងកាត់៕ រក្សាសិទ្ធិដោយ៖ សា មេត
