ភ្នំពេញ ៖ ប្រិយមិត្ត និងមហាជនបានទទួលជ្រាបហើយថា ករណីគ្រោះធម្មជាតិភ្លៀងធ្លាក់លាយឡំខ្យល់កន្រ្តាក់ បានចាប់ផ្តើមកាលពីល្ងាចថ្ងៃទី៥ ខែឧសភា ឆ្នាំ២០២១ គឺបានវាយប្រហារផ្តួលរំលំដើមឈើមួយចំនួន ក្នុងនោះសូម្បីតែដើមត្នោត និងធ្វើឲ្យផ្ទះសំបែងរបស់ប្រជាពលរដ្ឋរងការខូចខាតយ៉ាងដំណំ ជាពិសេសមកលើបងប្អូនប្រជាពលរដ្ឋ នៅក្នុងស្រុកឧត្តង្គ ខេត្តកំពង់ស្ពឺ តែម្តង។
ដោយឡែក នៅល្ងាចថ្ងៃទី៦ ខែឧសភា ឆ្នាំ២០២១ ភ្លៀងលាយឡំខ្យលក់កន្រ្តាក់ដ៏ខ្លាំងក្លានេះ ក៏បានបន្តកើតឡើង ដែលគេជឿថា នឹងបង្កផលប៉ះពាល់ដល់ទ្រព្យសម្បត្តិ របស់ប្រជាពលរដ្ឋជាច្រើនផ្សេងទៀត ជាក់ជាមិនខាន។ ពិតណាស់ ក្រៅពីខ្យល់កន្រ្តាក់ អាកាសធាតុដ៏អាក្រក់នេះ បង្កឲ្យមានផ្គររន្ទះគួរឲ្យខ្លាចផងដែរ។ ជាក់ស្តែង កាលពីល្ងាចមិញនេះ គ្រោះធម្មជាតិរន្ទះបាញ់ ក៏បានឆក់យកជីវិតស្រ្តីជាម្តាយម្នាក់នៅក្នុងខេត្តកំពង់ចាម ស្លាប់ចាកចោលកូនតូចៗពីរនាក់ ឲ្យកំព្រាម្តាយទាំងមិនទាន់ដឹងក្តីគួរឲ្យអាសូរ។ យ៉ាងណាមិញ ស្រ្តីរូបនោះក៏ត្រូវបានដឹងថា គឺជាក្មួយស្រីបង្កើតឪពុករបស់តារាចម្រៀង យឿន ពិសី ផងដែរ។
នេះបើតាមតារាចម្រៀងប្អូនប្រុស យឿន ពិសី ម្ចាស់ពានក្នុងកម្មវិធី «Cambodia’s Got Talent» បានបង្ហោះនូវទុក្ខដ៏ក្រៀមក្រំ ចំពោះការបាត់បង់បងស្រីជីដូនមួយរបស់ខ្លួន ដោយបានរៀបរាប់ឲ្យដឹងថា៖ «ចែរបស់ខ្ញុំគាត់ត្រូវរន្ទះបាញ់ស្លាប់ល្ងាចមិញ មិនគួរណាមានរឿងបែបនេះកើតឡើងទេ អាសូរកូនតូចទាំងពីរដែលមិនទាន់ដឹងក្ដីឡើយ បែរជាមកជួបរឿងអាណោចអាធ័មបែបនេះ សូមចែទៅកាន់សុខគតិភពឲ្យបានស្ងប់សុខ កុំអាឡោះអាល័យឡើយណាចែ»៕ រក្សាសិទ្ធិដោយ៖ លឹម ហុង
