ភ្នំពេញ ៖ ជឿជាក់ថា ប្រិយមិត្តជាច្រើន បានឃើញ និងក៏ដូចសម្តែងនូវក្តីអាសូររួជាខ្លាំងរួចហើយ ចំពោះបុរសម្នាក់ដែលផ្ទះរបស់គាត់ ត្រូវបានខ្យល់កន្រ្តាក់ឆក់យកដំបូលស័ង្កសី ប៉ើងគ្មានសល់ និងសូម្បីបំផ្លិចបំផ្លាញរបស់របរ ទ្រព្យសម្បត្តិ នៅក្នុងផ្ទះឡើងខ្ទេចខ្ទីតែម្តង។
នេះបើតាមបុរសជាម្ចាស់ផ្ទះ ដែលមានគណនីហ្វេសប៊ុកឈ្មោះ Na Roth បានបង្ហោះរូបភាពជាច្រើនសន្លឹក និងសរសេររៀបរាប់ទាំងអារម្មណ៍ក្តុកក្តួលថា៖ «មានទុក្ខធំហើយ ចេញពីធ្វើការមកផ្ទះ ស្រាប់តែឃើញដំបូលស័ង្កសីយ៉ាងធំនៅលើថ្នល់ ខ្ញុំក៏បានសួរអ្នកជិតខាងថា ដំបូលផ្ទះអ្នកណាហោះធ្លាក់មកដោយមិនដឹងថា ជាដំបូលផ្ទះខ្លួនឯងនេាះទេ លុះដល់ពេលចូលក្នុងផ្ទះបានដឹងថាជាដំបូលផ្ទះខ្លួនឯងស្លុតចិត្ត កូវីតរកលុយមិនបានផង ចឹងមានតែយកមេឃធ្វើដំបូលហើយ សង្ឃឹមថាលែងមានភ្លៀងចុះ ចាំមានលុយធ្វើហើយចាំភ្លៀង បើមិនចឹងទេមានតែគេងហាលភ្លៀងហើយ ឱខ្យល់អើយ ធ្វើបាបខ្ញុំហើយ មហាវេទនា»។
តែយ៉ាងណា ក្រោយពីបានឃើញបែបនេះ និងមានក្តីអាណិតខ្លាំងពេក មហាជននៅក្នុងបណ្តាញសង្គម ក៏បានចាប់ផ្តើមចូលរួមបរិច្ចាគថវិកាបន្តិចបន្តួចទៅតាមលទ្ធភាព ជាបន្តបន្ទាប់ ដើម្បីជួយសម្រួលទុក្ខលំបាករបស់ម្ចាស់ផ្ទះខាងលើបានខ្លះ ដែលឃើញហើយ យើងពិតជាគួរឲ្យរំភើបជំនួសជាខ្លាំង ដែលនេះគឺជាវប្បធម៌ចែករំលែកដ៏ប្រពៃថ្លៃថ្លាណាស់ សម្រាប់បងប្អូនដែលកំពុងជួបទុក្ខលំបាក មិនថាតែដោយសារកូវីដ១៩ ឬ គ្រោះមហន្តរាយធម្មជាតិ ដែលកំពុងចាប់ផ្តើមវាយប្រហារក្នុងប្រទេសកម្ពុជា នាពេលនេះ៕ រក្សាសិទ្ធិដោយ៖ លឹម ហុង
