មេរោគរាតត្បាត Covid-19 បានបណ្តាលឱ្យមនុស្សជាច្រើននៅជុំវិញពិភពលោក ត្រូវលុបចោល ឬពន្យារពេលនូវកម្មវិធីផ្សេងៗ ក្នុងនោះជាក់ស្តែងដូចជាមង្គលការជាដើម។ តែទោះជាយ៉ាងណាក៏ដោយ មនុស្សមួយចំនួននៅតែព្យាយាមរកវិធីច្នៃប្រឌិត ព្រោះតែមិនចង់រំសាយ ឬលុបចោលផែនការរបស់ពួកគេ។
ជាក់ស្តែង វីដេអូថ្មីមួយនេះ បានកំពុងទទួលការចាប់អារម្មណ៍ និងបង្កឲ្យភ្ញាក់ផ្អើលជាខ្លាំង គ្រាដែលគេបានឃេីញគូស្វាមីភរិយាជនជាតិឥណ្ឌាមួយគូ បានប្រថុយរៀបមង្គលការរបស់ពួកគេ ដោយអនុវត្តការរក្សាគម្លាតពីគ្នារបស់ពួកគេ តាមរយៈវិធីប្រើដំបងឬស្សី ដើម្បីដោះដូរកំរងផ្កាឲ្យគ្នាទៅវិញទៅមក។
នៅក្នុងវីដេអូឃ្លីបរយៈពេល ១៩ វិនាទី ដែលត្រូវបានចែករំលែកនៅលើបណ្តាញសង្គម Twitter កូនកំលោះ និងកូនក្រមុំ ត្រូវបានឃើញពាក់របាំង និងម៉ាស់មុខ ហើយពួកគេបានប្រើឈើប្ញស្សី ដើម្បីបំពាក់កំរងផ្កាឲ្យគា្នទៅវិញទៅវិញទៅមក ដើម្បីរក្សាគម្លាតពីគ្នា។ មង្គលការនេះត្រូវបានគេនិយាយថា បានធ្វើឡើងនៅក្នុងទីក្រុង Begusarai ស្ថិតនៅរដ្ឋ Bihar ភាគខាងជើងនៃប្រទេសឥណ្ឌា កាលពីថ្ងៃទី៣០ ខែមេសា កន្លងទៅនេះ។
វីដេអូដែលត្រូវបានផ្សព្វផ្សាយនៅលើបណ្តាញសង្គម នៅពេលនេះ បានទាក់ទាញការទស្សនារាប់ម៉ឺនសែន View ។ ក្នុងនោះ អ្នកលេងអុីនធើរណែតមួយចំនួន បានគាំទ្រចំពោះវិធីរបស់ពួកគេ ប៉ុន្តែ អ្នកខ្លះទៀត បានរិះគន់ថា ពួកគេមិនគួរណាមិនពន្យារពេលរៀបការសិនទេ គ្រាពេលដែលប្រទេសជាតិកំពុងជួបវិបត្តិកូវីដ-១៩ ដ៏ធ្ងន់ធ្ងរ ខណៈអ្នកឆ្លងកាន់តែកើនឡើង រីឯអ្នកស្លាប់ក៏ត្រូវបានបូជាច្រើនលើសលុបពីថ្ងៃទៅមួយថ្ងៃ៕
រក្សាសិទ្ធិដោយ៖ លឹម ហុង
