កាលពីយប់មិញនេះ ថ្ងៃទី១០ ខែឧសភា ឆ្នាំ២០២១ តាមរយៈទំព័រហ្វេសប៊ុក TYDA – គ្រូពេទ្យស្ម័គ្រចិត្តយុវជនសម្តេចតេជោ បានបង្ហោះនូវដំណឹងដ៏រីករាយថា អ្នកជំងឺកូវីដ១៩ ចំនួន ១២០ នាក់ បន្ថែមទៀត ដែលសម្រាកព្យាបាលជំងឺនៅមណ្ឌលព្យាបាលជំងឺកូវីដ-១៩ កម្រិតស្រាលកោះពេជ្រ បានជាសះស្បើយ និងត្រូវបានអនុញ្ញាតឲ្យវិលត្រឡប់ទៅលំនៅដ្ឋានវិញ ក្រោយពីទទួលការព្យាបាលយ៉ាងយកចិត្តទុកដាក់ខ្ពស់ពីសំណាក់ ក្រុមគ្រូពេទ្យសម្តេចតេជោប្រឆាំងជំងឺកូវីដ១៩។ តែទោះយ៉ាងណា អ្នកដែលបានជាសះស្បើយទាំងនេះ នឹងត្រូវធ្វើចត្តាឡីស័កខ្លួនឯងដាច់ដោយឡែករយៈពេល១៤ថ្ងៃបន្តទៀត ដើម្បីតាមដានសុខភាព។
យ៉ាងណាមិញ អ្វីដែលចាប់អារម្មណ៍នោះ គឺនៅថ្ងៃអ្នកជំងឺដែលបានជាសះស្បើយទាំង ១២០ នាក់ ក៏មានក្មេងស្រីតូចម្នាក់ក៏បានជាផងដែរ។ ហើយមុនពេលចាកចេញពីមណ្ឌលសម្រាកព្យាបាលកោះពេជ្រវិញ ក្មេងស្រីដ៏គួរឲ្យស្រឡាញ់ បានបង្ហាញអារម្មណ៍រំភើបយ៉ាងខ្លាំង ដោយនាងតូចបានលើកដៃសំពះអរគុណលោកគ្រូ អ្នកគ្រូពេទ្យ ដែលបានខិតខំជួយមើលថែ និងព្យាបាលឲ្យនាង និងក៏ដូចបងប្អូនប្រជាពលរដ្ឋអ្នកជំងឺយ៉ាងច្រើនទៀត បានជាសះស្បើយ។
តែយ៉ាងណា ទន្ទឹមនឹងលទ្ធផលជាសះស្បើយដ៏ច្រើនជាបន្តបន្ទាប់គួរឲ្យរំភើបនេះផងដែរ ក៏អាស្រ័យដោយសារមានការខិតខំប្រឹងដោយយកចិត្តទុកដាក់របស់ប្រមុខថ្នាក់ដឹកនាំ ជាពិសេសពីសំណាក់ឯកឧត្តម ហ៊ុន ម៉ាណែត និងភរិយាលោកជំទាវ ពេជ ចន្ទមុនី ដែលបានចុះបំពេញការងារយ៉ាងសកម្ម ជាមួយក្រុមការងារផ្នែកពាក់ព័ន្ធ ក្រុមកងទ័ពឈុតស កងកម្លាំងសមត្ថកិច្ច និងដឹកនាំក្រុមគ្រូពេទ្យស្ម័គ្រចិត្តសម្តេចតេជោ ដើម្បីប្រយុទ្ធប្រឆាំងជំងឺកូវី១៩ ក្នុងការរៀបចំមន្ទីរពេទ្យ មណ្ឌលធំៗមានលក្ខណៈធំទូលាយប្រកបដោយផាសុខភាព ជូនចំពោះបងប្អូនអ្នកជំងឺ៕
រក្សាសិទ្ធិដោយ៖ លឹម ហុង
