វេជ្ជបណ្ឌិតនៅប្រទេសឥណ្ឌាកំពុងព្រមានប្រឆាំង នឹងការអនុវត្តការប្រើប្រាស់លាមកគោមកលាបលើខ្លួន ដោយជឿជាក់ថាវានឹងអាចការពារកូវីដ-១៩។ ការព្រមានរបស់លោកវេជ្ជបណ្ឌិត គឺនៅពេលដែលលោកនិយាយថាលាមកគោ មិនទាន់មានភស្តុតាងវិទ្យាសាស្ត្រណាមួយបង្ហាញពីប្រសិទ្ធភាពរបស់វានៅឡើយទេ ហើយវាក៏អាចមានហានិភ័យក្នុងការរាលដាលជំងឺផ្សេងៗថែមទៀត។
ជំងឺរីករាលដាលកូរ៉ូណា បានបង្កការបំផ្លិចបំផ្លាញទៅលើប្រទេសឥណ្ឌាដោយបច្ចុប្បន្នករណីកូវីដ១៩មានចំនួន ២២,៦៦ លានករណី និងចំនួន ២៤៦.១១៦ នាក់បានស្លាប់។ ក្រុមអ្នកជំនាញនិយាយថាចំនួនជាក់ស្តែងអាចនឹងខ្ពស់ជាង ៥ ទៅ ១០ ដង ហើយពលរដ្ឋនៅទូទាំងប្រទេសកំពុងព្យាយាមតាមស្វែងរកគ្រែមន្ទីរពេទ្យ អុកស៊ីហ្សែន ឬថ្នាំ ហើយភាពកង្វៈនេះបានធ្វើឱ្យមនុស្សជាច្រើនស្លាប់ដោយសារខ្វះការព្យាបាល។
យ៉ាងណាមិញ នៅក្នុង រដ្ឋហ្គូចារាដ Gujarat នៅភាគខាងលិចនៃប្រទេសឥណ្ឌា មានក្រុមអ្នកជឿជំនឿមួយចំនួនបានទៅកន្លែងចិញ្ចឹមសត្វគោ ក្នុងមួយសប្តាហ៍ ដើម្បីយកលាមកគោ និងទឹកនោមមកលាបលើខ្លួនរបស់ពួកគេ ដោយសង្ឃឹមថាវានឹងជួយបង្កើនភាពស៊ាំរបស់ពួកគេប្រឆាំង និងជួយឱ្យជាសះស្បើយពីជំងឺឆ្លង។
លោក Gautam Manilal Borisa នាយករងនៃក្រុមហ៊ុនឱសថបានមានប្រសាសន៍ថា៖“ យើងឃើញហើយសូម្បីតែគ្រូពេទ្យក៏មកទីនេះដែរ ហើយជំនឿរបស់ពួកគេគឺថាការព្យាបាលនេះ ធ្វើឲ្យប្រសើរឡើងនូវភាពស៊ាំរបស់ពួកគេ ហើយពួកគេអាចទៅ ដោយគ្មានការភ័យខ្លាច។លោកបាននិយាយថែមទៀតថា៖«ការធ្វើបែបនេះបានជួយគាត់ឱ្យជាសះស្បើយពីជំងឺកូវីដ១៩ កាលពីឆ្នាំមុន។»
វេជ្ជបណ្ឌិត និងអ្នកវិទ្យាសាស្ត្រនៅក្នុងប្រទេសឥណ្ឌា និងនៅទូទាំងពិភពលោកបានព្រមានម្តងហើយម្តងទៀត ពីការប្រឆាំងនឹងការអនុវត្តវិធីព្យាបាលជំនួសសម្រាប់ការព្យាបាលកូវីដ១៩ ដោយនិយាយថា ពួកគេអាចនាំឱ្យមានអារម្មណ៍មិនត្រឹមត្រូវចំពោះសន្តិសុខ និងធ្វើឱ្យស្មុគស្មាញដល់បញ្ហាសុខភាព។
វេជ្ជបណ្ឌិត JA Jayalal ប្រធានសមាគមវេជ្ជសាស្ត្រឥណ្ឌាបាននិយាយថា“ មិនមានភស្តុតាងវិទ្យាសាស្ត្រ ជាក់លាក់ណាមួយដែលថា លាមកគោឬទឹកនោម ធ្វើឱ្យមានភាពស៊ាំប្រឆាំងនឹងកូវីដ -១៩ នោះទេវាពឹងផ្អែកលើជំនឿទាំងស្រុង” ។
លោកថា៖ វាក៏មានហានិភ័យសុខភាពផងដែរពាក់ព័ន្ធនឹងការលាបឬប្រើប្រាស់របស់ទាំងនេះ – ហើយជំងឺផ្សេងទៀតក៏អាចឆ្លងពីសត្វទៅមនុស្សផងដែរ៕
ប្រភព៖ រ៉យទ័រ
រក្សាសិទ្ធិដោយ៖CEN