ជឿថាប្រិយមិត្តបានជ្រាបច្បាស់ហើយ ចំពោះរឿងរ៉ាវកំពុងផ្ទុះកក្រើកនៅលើបណ្តាញសង្គម ពាក់ព័ន្ធនឹងករណីប្តឹងផ្តល់រវាងកញ្ញា មាន ពេជ្រវីតា និងលោកឧកញ៉ាម្នាក់ឈ្មោះ ហេង សៀ ដែលកំពុងធ្វើឲ្យមហាជនចាប់អារម្មណ៍តាមដានយ៉ាងខ្លាំងថា តើករណីនេះនឹងវិវត្តន៍យ៉ាងណា ខណៈដែលពេលនេះកញ្ញា មាន ពេជ្រវីតា ដែលបានអះអាងខ្លួននាងជាជនរងគ្រោះ ហើយក៏បានដាក់ពាក្យបណ្តឹងប្តឹងបកឧកញ៉ារូបនេះពីបទ «ប៉ុនប៉ងរំលោភសេពសន្ថវៈ» រួចហើយ តែនៅទីបំផុត បែរជារូបនាងត្រូវជាប់ខ្នោះ។
គួរបញ្ជាក់ថា មូលហេតុដែលកញ្ញា មាន ពេជ្រវីតា នៅតែក្លាយជាជនរងគ្រោះបែបនេះ គឺដោយសារឧកញ៉ា ហេង សៀ បានប្តឹងនាងមុនពីបទលួចទូរស័ព្ទ និងបង្ករបួសស្នាម នៅក្នុងរថយន្ត ខណៈដែលអ្នកទាំងពីរបានធ្វើដំណើរជាមួយគ្នា កាលពីអំឡុងរសៀលថ្ងៃទី៤ ខែឧសភា ឆ្នាំ២០២១។
យ៉ាងណាមិញ ទន្ទឹមនឹងមហាជនកំពុងមានងឿងឆ្ងល់ និងក៏ដូចមានការប្រតិកម្មយ៉ាងខ្លាំង ចំពោះភាពអយុត្តិធម៌នេះ ខណៈដែលចោទថានាងចាក់ឧកញ៉ា ហេង សៀ ឲ្យរងរបួស ក៏ស្រាប់តែបែកធ្លាយវីដេអូកាមេរ៉ាសុវត្ថិភាព បានបង្ហាញអ្នកទាំងពីរ បានផ្ទុះជម្លោះនឹងគ្នាក្នុងរថយន្តដ៏គួរឲ្យភ្ញាក់ផ្អើល។ ហើយក្នុងនោះផងដែរ អ្វីដែលចាប់អារម្មណ៍នោះ គឺគ្រាដែលឧកញ៉ា ហេង សៀ ត្រូវដួលផ្ងាកក្រោយចេញពីរថយន្ត និងរត់ចេញយ៉ាងលឿន គេក៏បានឃើញកញ្ញា មាន ពេជ្រវីតា បានចាកចេញពីក្នុងរថយន្តតាមក្រោយ ជាមួយវត្ថុស្រួចម្យ៉ាងនៅនឹងដៃខាងស្តាំ ដែលទំនឹងជាកាំបិត និងរូបភាពមួយផ្សេងទៀត គឺបង្ហាញនាងកាន់ទូរស័ព្ទផងដែរ ប៉ុន្តែ គេក៏មិនដឹងថានោះជាទូរស័ព្ទរបស់នាង ឬទូរស័ព្ទឧកញ៉ា ហេង សៀ នោះទេ។
តែទោះយ៉ាងណាក្តី មតិមហាជនបានលើកឡើងថា នេះក៏ជាអ្វីដែលនាងត្រូវការពារខ្លួន ពីជនដែលប៉ុន ប៉ងរំលោភបំពាន។ ព្រោះថា ប្រសិនបើនាងពុំមាន «របស់នេះ» តាមខ្លួននោះទេ សួរថានាងនឹងអាចជួបរឿងបែបណា!? ខណៈទាំងដែលនាងជាស្ត្រីទន់ខ្សោយ៕
រក្សាសិទ្ធិដោយ៖ លឹម ហុង
