ខេត្តកំពង់ឆ្នាំង ៖ កាលពីថ្ងៃទី១៣ ខែឧសភា នៅវេលាម៉ោង១០ ជនជាប់ចោតឈ្មោះ នន់ សារ៉េត អាយុ២៨ឆ្នាំ ត្រូវបានតុលាការខេត្តកំពង់ឆ្នាំង ផ្តន្ទាទោសពីបទឃាតកម្មគិតទុកជាមុន ទៅលើជនរងគ្រោះ៥នាក់ និងបទលាក់បំបាំងភស្តុតាង ចែងក្នុងមាត្រាទី២០០ នៃក្រមព្រហ្មទណ្ឌ បទល្មើសឃាតកម្មគិតទុកជាមុន គឺមានពិន័យជាប់ពន្ធនាគារអស់មួយជីវិត។
ព្រឹត្តការណ៍ដែលបានកើតឡើងពិតប្រាកដ។ ដោយមានការស្នើសុំយ៉ាងច្រើនពីមហាជន យើងអាចបញ្ចេញបន្ថែមនូវព័ត៌មានមួយចំនួនពាក់ព័ន្ធទៅនឹងភស្តុតាងដែលយើងបានរកឃើញនៅកន្លែងកើតហេតុ។
នៅវេលាម៉ោង០៨យប់ ថ្ងៃទី០៩ ខែឧសភា ឆ្នាំ២០២១ ជនល្មើសបានមានជម្លោះយ៉ាងខ្លាំង ជាមួយប្រពន្ធអាយុ៣៨ឆ្នាំរបស់ខ្លួន នៅផ្ទះរបស់ពួកគេ ដែលស្ថិតនៅក្នុងឃុំខុនរ៉ង ស្រុកបរិបូរណ៍។ នៅពេលនោះក៏ជនល្មើស បានយកកន្រ្តៃទៅចាក់ប្រពន្ធរបស់ខ្លួនជាច្រើនលើក នៅលើផ្នែកទ្រូង បង្កអោយគាត់រងរបួសធ្ងន់ធ្ងរ បន្ទាប់មកជនល្មើសបានបន្តហឹង្សាទៅលើកូនរបស់ខ្លួនដែលមានអាយុ៣ឆ្នាំ បង្កអោយបាត់បង់ជីវិត។
ភស្តុតាងបានបង្ហាញយើងថា ជនល្មើសបានបន្តប្រហារទៅលើកូនចុងរបស់ខ្លួន អាយុ៩ឆ្នាំ ដោយច្របាច់ក។ កូនភ្លោះពីរនាក់ទៀតដែលមានអាយុ៧ឆ្នាំ បានប្រទះឃើញអំពើទាំងនេះក៏រត់ចូលទៅក្នុងបន្ទប់គេងហើយកាន់ ឬអោបគ្នាដោយមានការភ័យខ្លាច។ ភស្តុតាងបានបង្ហាញយើងថាជនល្មើសបានខ្ទាស់សោរបន្ទប់គេងពីខាងក្រៅ។
បន្ទាប់មកជនល្មើសបានដុតពូក និងខោអាវដើម្បីផ្តើមអគ្គិភ័យ។ ជនល្មើសបានរង់ចាំនៅក្នុងផ្ទះ រហូតដល់ពេលអគ្គិភ័យចាប់ផ្តើមរីករាលដាល ទាំងដឹងថាកូនភ្លោះពីរនាក់ នៅមានជីវិតនៅឡើយ ហើយជាប់សោនៅក្នុងបន្ទប់គេង។ ពេលដែលអគ្គិភ័យបានឆាបឆេះផ្ទះទាំងស្រុង ជនល្មើសបានចេញក្រៅផ្ទះ និងរង់ចាំរហូតដល់អ្នកជិតខាងប្រទះឃើញ។
ជនរងគ្រោះខ្លះបានស្លាប់ដោយរងរបួសមុនពេលអគ្គិភ័យ ហើយមួយចំនួនទៀតបានស្លាប់នៅក្នុងអគ្គិភ័យ។ សាកសពកូនភ្លោះត្រូវបានរកឃើញក្នុងស្ថានភាពអោបគ្នា។
ជនល្មើសត្រូវបានកម្លាំងសមត្ថកិច្ចឃាត់ខ្លួននៅយប់កើតហេតុ ហើយបានផ្តល់សេចក្តីបំភ្លឺមួយចំនួន ទៅកម្លាំងសមត្ថកិច្ចរៀបរាប់ អំពីការផ្តើមនូវអគ្គិភ័យនេះ។ ក្នុងពេលនោះ ក្រុមការងារជំនាញក៏បានចាប់ផ្តើមធ្វើកោសល្យវិច័យ ទៅលើសាកសព និងកន្លែងកើតហេតុទាំងស្រុង។ ពេលដែលក្រុមការងារបានរៀបរាប់ និងសួរអំពីភស្តុតាងវិទ្យាសាស្រ្តមួយចំនួនទៅកាន់ជនល្មើស គេក៏ចាប់ផ្តើមសារភាពពីអំពើឃាតកម្ម និងអគ្គិភ័យ។
នេះគឺជាអំពើដ៏ឃោរឃៅលើសពីការស្មានរបស់អ្នកណាទាំងអស់។
អង្គភាពការពារកុមារ (CPU) បានបញ្ជាក់ថា ខ្ញុំសូមថ្លែងអំណរគុណ ទៅដល់កម្លាំងសមត្ថកិច្ចទាំងអស់គ្នា ដែលបានជ្រោមជ្រែងក្នុងការស៊ើបអង្កេតមួយនេះ។ នាយកដ្ឋាននគរបាលព្រហ្មទណ្ឌ និងនាយកដ្ឋាននគរបាលបច្ចេកទេស និងវិទ្យាសាស្រ្ត នៃក្រសួងមហាផ្ទៃ, នាយកដ្ឋាននគរបាលព្រហ្មទណ្ឌ និងនាយកដ្ឋាននគរបាលបច្ចេកទេស និងវិទ្យាសាស្រ្ត នៃស្នងការដ្ឋាននគរបាលខេត្តកំពង់ឆ្នាំង, សមាជិកនៃក្រុមការងារស៊ើបអង្កេតបទល្មើសមនុស្សឃាត (HIT) និងក្រុមការងារបច្ចេកទេស និងវិទ្យាសាស្រ្ត (FST) នៃអង្គភាពការពារកុមារ (CPU), និងអ្នកជំនាញនៅប្រទេសអូស្រ្តាលីទាំងអស់គ្នា ដែលបានរួមសហការជាមួយគ្នា និងធ្វើការបានយ៉ាងល្អប្រសើរ ដើម្បីស្វែងរកភាពពិតប្រាកដ និងយុត្តិធម៌ជូនជនរងគ្រោះ៕រក្សាសិទ្ធិដោយ៖បញ្ញាស័ក្តិ
