ភ្នំពេញ ៖ នៅថ្ងៃទី១៣ ខែឧសភា ឆ្នាំ២០២១ ឯកឧត្តម ជិន ម៉ាលីន អនុប្រធាន និងជាអ្នកនាំពាក្យ
គណៈកម្មាធិការសិទ្ធិមនុស្សកម្ពុជា បានឆ្លើយសំណួរអ្នកសារព័ត៌មាន តើការកំណត់វ៉ាក់សាំងកាតព្វកិច្ចសម្រាប់មន្ត្រីរាជការនិងជាលក្ខខណ្ឌសម្រាប់ធ្វើជាមន្ត្រី ជាការរំលោភបំពានសិទ្ធិស្មើភាពគ្នាចំពោះមុខច្បាប់ ដូចការចោទប្រកាន់របស់សង្គមស៊ីវីលមួយចំនួន ដែរឬទេ?
ឯកឧត្តម ជិន ម៉ាលីនបានថ្លែងថា ផ្អែកលើគោលការណ៍ច្បាប់សិទ្ធិមនុស្សជាតិនិងអន្តរជាតិ អាជ្ញាធរសាធារណៈ អាចកំណត់នូវលក្ខខណ្ឌមួយចំនួនបានក្នុងការជ្រើសរើសមន្ត្រី ដូចជាលក្ខខណ្ឌអាយុ បទពិសោធន៍ សញ្ញាបត្រ ពិរុទ្ធភាព ការចាក់វ៉ាក់សាំង ជាដើម។ល។ រួមទាំងលក្ខខណ្ឌផ្សេងទៀតផងដែរ ដែលមានភាពចាំបាច់ និងដើម្បីធានាបាននូវគុណភាព ប្រសិទ្ធិភាព និងសុវត្ថិភាពរបស់ស្ថាប័ន ដែលការកំណត់នេះមិនមែនជាការរំលោភបំពានសិទ្ធិស្មើភាពគ្នាចំពោះមុខច្បាប់នោះទេ ព្រោះថា វាធ្វើឡើងដើម្បីប្រយោជន៍សាធារណៈ ហើយជាពិសេសលក្ខខណ្ឌវ៉ាក់សាំងនេះ គឺដើម្បីទប់ស្កាត់និងប្រយុទ្ធប្រឆាំងការឆ្លងរាលដាលកូវីដ-១៩ មិនមែនដើម្បីប្រយោជន៍ឯកជននោះទេ។
អ្នកនាំពាក្យគណៈកម្មាធិការសិទ្ធិមនុស្សកម្ពុជា បានលើកឡើងទៀតថា ប្រសិនបើការកំណត់លក្ខខណ្ឌវ៉ាក់សាំងកាតព្វកិច្ចនេះ ជាការរំលោភបំពានសិទ្ធិស្មើភាពគ្នាចំពោះមុខច្បាប់ ដូចសង្គមស៊ីវិលចោទប្រកាន់មែននោះ ហេតុអ្វីក៏មិនលើកពីលក្ខណ្ឌផ្សេងទៀតដូចជាអាយុ បទពិសោធន៍ និងសញ្ញាបត្រ ជាដើម។ល។ ថាជាការរំលោភបំពានសិទ្ធិស្មើភាពគ្នាចំពោះមុខច្បាប់ផងដែរទៅ ព្រោះថាអ្នកដែលមិនអាចបំពេញបានលក្ខខណ្ឌទាំងនេះ មិនអាចប្រឡងធ្វើជាមន្ត្រីបាននោះទេ។
សិទ្ធិស្មើភាពគ្នាចំពោះមុខច្បាប់ មិនមែនមានន័យថា ពលរដ្ឋត្រូវទទួលបាននូវលក្ខខណ្ឌដូចគ្នាទាំងអស់ពីររដ្ឋនៅគ្រប់ករណីនិងគ្រប់កាលៈទេសៈនោះទេ គឺអាចមានការលើកលែង ហើយដែលករណីលើកលែងនេះ ធ្វើឡើងក្នុងស្ថានភាពចាំបាច់ និងដើម្បីប្រយោជន៍សាធារណៈ ដូចជាអនីតិជនមិនអាចបោះឆ្នោតបាន អ្នកធ្លាប់មានទោសពីបទឧក្រឹដ្ឋមិនត្រូវបានអនុញ្ញាតឱ្យធ្វើជាមន្ត្រីរាជការ និងលោកសង្ឃមិនអាចបង្កើតបក្សនយោបាយបាន ជាដើម។ល។ ដែលការកំណត់ទាំងនេះមិនមែនជាការបំពានសិទ្ធិស្មើភាពគ្នាចំពោះមុខច្បាប់នោះទេ។
សូមបញ្ជាក់ថា ក្រសួងមុខងារសាធារណៈ បានចេញសេចក្តីជូនដំណឹងមួយថា បេក្ខជនដែលបានដាក់ពាក្យសុំសិទ្ធិប្រឡងចូលបម្រើការងារក្នុងក្របខ័ណ្ឌក្រសួង ស្ថាប័ន ចំនួន៦ ត្រូវចាក់វ៉ាក់សាំងការពារជំងឺកូវីដ-១៩ ទាំង២លើកឲ្យបានរួចហើយ។
ក្រសួងមុខងារសាធារណៈ បានលើកឡើងថា អនុលោមតាមប្រសាសន៍ណែនាំដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ នាយករដ្ឋមន្តី នៃព្រះរាជាណាចក្រកម្ពុជា គណៈកម្មការរៀបចំការប្រឡងប្រជែងជ្រើសរើសសិស្ស និស្សិត និងមន្ត្រីរាជការស៊ីវិល ឱ្យចូលបម្រើការងារក្នុងក្របខ័ណ្ឌក្រសួងមុខងារសាធារណៈ ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ក្រសួងកសិកម្ម រុក្ខាប្រមាញ់និងនេសាទ ក្រសួងពាណិជ្ជកម្ម ក្រសួងធនធានទឹកនិងឧតុនិយម និងរដ្ឋលេខាធិការដ្ឋាន អាកាសចរស៊ីវិល សម្រាប់ឆ្នាំ២០២១ មេត្តាជ្រាបថា៖
១. បេក្ខជនដែលបានដាក់ពាក្យសុំសិទ្ធីប្រឡងចូលបម្រើការងារក្នុងក្របខ័ណ្ឌក្រសួង ស្ថាប័ន ទាំង៦ខាងលើ ធានាឱ្យបានក្នុងការចាក់វ៉ាក់សាំងការពារជំងឺកូវីដ-១៩ ទាំង២លើករួចហើយ។
២. នៅថ្ងៃប្រឡងបេក្ខជនទាំងអស់ត្រូវភ្ជាប់មកជាមួយនូវកាតសម្គាល់ដែលសាមីខ្លួនបានទទួលវ៉ាក់សាំង។
៣. ក្នុងករណីដែលបេក្ខជនមិនអាចទទួលវ៉ាក់សាំងការពារជំងឺកូវីដ-១៩បាន ត្រូវមានលិខិតបញ្ជាក់ជាផ្លូវការពីមន្ទីរសុខាភិបាលរាជធានី ខេត្ត។
៤. ក្នុងករណីបេក្ខជនណាដែលមិនមានប័ណ្ណទទួលវ៉ាក់សាំងការពារជំងឺកូវី-១៩ ឬលិខិតបញ្ជាក់របស់មន្ទីរ សុខាភិបាលរាជធានី ខេត្ត គណៈកម្មការរៀបចំការប្រឡងមិនអនុញ្ញាតឱ្យបេក្ខជននោះចូលរួមប្រឡងឡើយ។
៥. គណៈកម្មការរៀបចំការប្រឡង នឹងធ្វើការបិទផ្សាយបញ្ជីឈ្មោះបេក្ខជន ដើម្បីទុកសិទ្ធិឱ្យតវ៉ាក្នុងករណី ដែលមិនមានឈ្មោះប្រឡង នៅពេលដែលព្រឹត្តិការណ៍សហគមន៍ថ្ងៃ២០ កុម្ភៈ ត្រូវបានបិទបញ្ចប់។
៦. ចំពោះសេចក្តីសម្រេចស្តីពីការអនុញ្ញាតឱ្យបេក្ខជនចូលរួមប្រឡង កាលបរិច្ឆេទប្រឡង និងមណ្ឌលប្រឡង គណៈកម្មការរៀបចំការប្រឡងនឹងជូនដំណឹងពេលក្រោយ។ សេចក្តីដូចបានជម្រាបជូនខាងលើ សូមសាធារណៈជន សិស្ស និស្សិត និងមន្ត្រីរាជការស៊ីវិល មេត្តាជ្រាប។
ពាក់ព័ន្ធនឹងករណីខាងលើនេះសង្គមស៊ីវិលបានចេញសេចក្តីថ្លែងការណ៍រួម ស្តីពី ស្នើលុបចោល ការកំណត់ ឱ្យបេក្ខជន ប្រឡង ក្របខ័ណ្ឌ មន្ត្រីរាជការ ត្រូវចាក់វ៉ាក់សាំង បង្ការជំងឺកូវីដ-១៩ ឱ្យបាន ពីរដូសជាមុន។ សមាគម សហជីព អង្គការសង្គមស៊ីវិល មានកង្វល់យ៉ាងខ្លាំងចំពោះសេចក្តីជូនដំណឹងរបស់ក្រសួង មុខងារសាធារណៈ បានតម្រូវឱ្យបេក្ខជនដែលបានដាក់ពាក្យស្នើសុំសិទ្ធិ ប្រឡងចូលបម្រើការងារក្នុងក្របខ័ណ្ឌក្រសួង ស្ថាប័ន ចំនួន៦ រួមមាន ក្រសួងមុខងារសាធារណៈ ក្រសួង ទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ក្រសួងកសិកម្ម រុក្ខាប្រមាញ់និងនេសាទ ក្រសួង ពាណិជ្ជកម្ម ក្រសួងធនធានទឹកនិងឧតុនិយម និងរដ្ឋលេខាធិកាដ្ឋានអាកាសចរស៊ីវិល ត្រូវចាក់វ៉ាក់សាំង
ចំនួនពីរដងរួចរាល់ជាមុនសិន។ ចំពោះបេក្ខជនណាដែលមិនបានចាក់វ៉ាក់សាំងបង្ការជំងឺកូវីដ-១៩ ឬគ្មាន លិខិតបញ្ជាក់ពីករណីដែលពុំអាចចាក់វ៉ាក់សាំងបានពីមន្ទីរសុខាភិបាលរាជធានី-ខេត្ត នឹងពុំអនុញ្ញាតឱ្យ បេក្ខជនរូបនោះចូលរួមប្រឡងឡើយ៕
រក្សាសិទ្ធិដោយ៖បញ្ញាស័ក្តិ