ករណីប្ដឹងផ្ដល់រវាង ឧកញ៉ា ហេង សៀជាមួយតារាម៉ូដែល អតីតពិធីការិនីទូរទស្សន៍ My TV និងជាបេក្ខនារី Miss Grand Cambodia បានឈានចូលមកដល់ដំណាក់កាល សមត្ថកិច្ចឃាត់ខ្លួនបុរសឈ្មោះ ឃន ឈុនតារា និងស្ត្រីឈ្មោះ តាំង គីមហៀង (ប្ដី-ប្រពន្ធ , ត្រូវជាកូនស្រីបង្កើត និងកូនប្រសារបស់ឧកញ៉ា ហេង សៀ) កាលពីថ្ងៃទី១៥ ខែឧសភា ពាក់ព័ន្ធអំពីការជ្រើសរើសមនុស្សថតរូបអាសអាភាស ភ្ជាប់ទៅនឹងករណី កញ្ញា មាន ពេជ្ររីតា និងឧកញ៉ា ហេង សៀ, ហើយឈានមកដល់ព្រឹកថ្ងៃទី១៧ ខែឧសភា ឆ្នាំ២០២១ ជនជាប់សង្ស័យទាំងពីរ ត្រូវបានបញ្ជូនមកសាលាដំបូង ដើម្បីសួរនាំ និងបំភ្លឺ , ប៉ុន្មានម៉ោងក្រោយមក ស្រាប់តែតុលាការក៏បានសម្រេចដោះលែងជនទាំងពីរឲ្យស្ថិតនៅក្រៅឃុំ (សូមអានសេចក្តីថ្លែងការណ៍របស់សាលាដំបូងរាជធានីភ្នំពេញ) ដោយសម្អាងថា ការជ្រើសរើសមនុស្សថតរូបអាសអាភាស ភ្ជាប់ទៅនឹងករណីកញ្ញា មាន ពេជ្ររីតា និងឧកញ៉ាហេង សៀ នោះ គឺជាការថតសម្ដែងត្រាប់ទៅវិញ។
ដំណើរវិវឌ្ឍន៍មួយឈុតនេះ ធ្វើឲ្យមហាជនសិក្សាយល់ឃើញថា ÷
១-ការប្រព្រឹត្តបង្កើតរូបភាពអាសអាភាសនេះ មិនមែនហៅថា ថតសម្ដែងត្រាប់លើអង្គហេតុនៃជម្លោះដែលកើតមានរវាងកញ្ញា មាន ពេជ្ររីតា និងឧកញ៉ា ហេង សៀ ដូចដែលតុលាការយល់ឃើញ នោះទេ?!
២- តាមការពិត គំនិតទុច្ចរិត (បង្កើតរូបភាពអាភាស ឬថតសម្ដែងប្រាប់) របស់ពួកគេ គឺចង់ប្រឌិតភស្តុតាងតែប៉ុណ្ណោះ ដើម្បីផ្ដល់សក្ខីកម្មទម្លាក់កំហុសទៅលើ កញ្ញា មាន ពេជ្ររីតា ធ្វើឲ្យមហាជនស្លុងអារម្មណ៍យល់ថា ÷
ក – នាងពិតជាត្រូវបានគេស៊ីនំឲ្យលុយមែន ,
ខ- បើមិនដូច្នោះទេ នាងមិនមែនប្រតាយប្រតប់ដណ្ដើមយកទូរស័ព្ទដើម្បីលុបរូបភាពពីក្នុងទូរសព្ទឡើយ,
គ- អត្ថន័យខាងលើនេះ ត្រូវបានបង្ហាញឬក៏ផុសនៅក្នុង account facebook របស់ជនជាប់សង្ស័យ ដារ៉ា ខាន់ ឬ ឃន ឈុនតារា,
៣- លុះសមត្ថកិច្ចតាមទាន់ ឬចាប់ថ្នាក់បានចំពោះការប្រព្រឹត្តក្នុងគំនិតទុច្ចរិតមួយនេះ ស្រាប់តែត្រូវបានតុលាការបកស្រាយថា ” គ្រាន់តែជាការថតសម្ដែងត្រាប់ប៉ុណ្ណោះ និងបន្តស្រាវជ្រាវរកប្រភពអ្នកផលិតរូបអាភាសដែលត្រូវបានចែកចាយលើបណ្ដាញសង្គម ” រួចហើយស្រាប់តែដោះលែងជនដែលប្រឌិតភស្តុតាង ឲ្យស្ថិតនៅក្រៅឃុំទៅវិញ។
៤- ហេតុអ្វីតុលាការមិននាំគ្នាវិភាគសិក្សារកឲ្យឃើញថា ទង្វើនេះ គឺជាការប្រឌិតភស្តុតាង ដើម្បីផ្ដល់សក្ខីកម្មបំភ័ន្តភ្នែកមហាជន និងតុលាការខ្លួនឯង?
–ជាបន្តទៅមុខទៀត មានតែរង់ចាំមើលការរើបង្រះ ការបកស្រាយ ពីក្រុមមេធាវីភាគីខាងកញ្ញា មាន ពេជ្ររីតា ម្ដងវិញ តើក្រុមមេធាវីយល់យ៉ាងណា ចំពោះការប្រឌិតរូបអាសអាភាស បែរទៅជាថតសម្ដែងប្រាប់ទៅវិញនោះ ?!
គួររំលឹកថា រឿងក្តីក្តាំនេះ បានកើតឡើងនៅថ្ងៃទី០៤ ខែឧសភា ឆ្នាំ២០២១ ក្នុងសង្កាត់ទឹកល្អក់២ ខណ្ឌទួលគោក រាជធានីភ្នំពេញ ខណៈដែលកញ្ញា មានពេជ្ររីតា បានមកជួប លោកឧកញ៉ា ហេង សៀ ដើម្បីនិយាយពីរឿងទិញអំណោយចែកជូនជនខ្វះខាតនៅក្នុងតំបន់ក្រហម ឬតំបន់បិទខ្ទប់ ហើយគ្រានោះក៏កើតមានរឿងចោទប្រកាន់គ្នាទៅវិញទៅមក។
ដំបូងឡើយ ដើម្បីជាការយកប្រៀប លោកឧកញ៉ា ហេង សៀ បានប្ដឹងកញ្ញាមាន ពេជ្ររីតា ជាមុន នៅថ្ងៃទី១០ ខែឧសភា ឆ្នាំ២០២១, លុះស្អែកឡើង គឺថ្ងៃទី១១ ខែឧសភា ឆ្នាំ២០២១ មន្ត្រីនគរបាលក៏រហ័សទៅនាំខ្លួនកញ្ញា មានពេជ្ររីតា ដើម្បីចូលបំភ្លឺសួរនាំរឿងបណ្ដឹងរបស់ឧកញ៉ា ហេង សៀ ចោទប្រកាន់ ” លួចទូរស័ព្ទ (លួចមានស្ថានទម្ងន់ទោស) និងបង្ករបួសស្នាម “។ មិនបានប៉ុន្មានម៉ោងផង ករណីបណ្ដឹងក៏បានទៅដល់ដៃតុលាការ ហើយតុលាការបានបង្គាប់ឲ្យឃុំខ្លួនជាបណ្ដោះអាសន្នភ្លាមៗ។
ជាការធ្វើបដិការនៃបណ្ដឹងរបស់ឧកញ៉ាហេង សៀ , កញ្ញា មាន ពេជ្ររីតា បានដាក់ពាក្យបណ្ដឹងចូលទៅសាលាដំបូងរាជធានីភ្នំពេញវិញ គឺប្ដឹងលោកឧកញ៉ាហេង សៀ ពីបទប៉ុនប៉ងរំលោភសេពសន្ថវៈនាងក្នុងរថយន្ត ខណៈលោកឧកញ៉ា ហេង សៀ ហៅឲ្យចូលជជែកគ្នាពីរឿងទិញអំណោយជូនជនក្រីក្រក្នុងតំបន់បិទខ្ទប់អំឡុងកូវីដ-១៩។
សម្ដេចតេជោ ហ៊ុន សែន បានបញ្ជាឲ្យក្រុមមេធាវីស្ម័គ្រចិត្តរបស់សម្ដេចតស៊ូរឿងក្តីនេះ ការពារយុត្តិធម៌ជូន កញ្ញា មានពេជ្ររីតា រហូតដល់ទីបញ្ចប់ , ហើយទន្ទឹមគ្នានេះ ក្រសួងកិច្ចការនារីក៏កំពុងធ្វើការស៊ើបអង្កេត និងចាត់នីតិវិធីរឿងក្តីនេះជាមួយអគ្គស្នងការនគរបាលជាតិផងដែរ។
គួរបញ្ជាក់ថា កាលពីថ្ងៃទី១៣ ខែឧសភាឆ្នាំ២០២១ កញ្ញា មាន ពេជ្ររីតា ត្រូវបានតុលាការសម្រេចដោះលែងឲ្យស្ថិតនៅក្រៅឃុំតាមផ្លូវតុលាការ ខណៈក្រុមមេធាវីការពារក្តីស្ម័គ្រចិត្តរបស់ សម្ដេចតេជោ ហ៊ុន សែន ដឹកនាំដោយ លោក គី តិច ចូលអន្តរាគមន៍តស៊ូរឿងក្តីនេះ និងដាក់ពាក្យស្នើសុំតុលាការ ឱ្យកញ្ញា មាន ពេជ្ររីតា បានស្ថិតនៅក្រៅឃុំ៕ ពិសិដ្ឋ CEN
