នៅមុននេះបន្តិច ថ្ងៃទី១៧ ខែឧសភា ឆ្នាំ២០២១ នេះ តាមរយៈហ្វេសប៊ុករបស់ខ្លួន អន្ទិត ឌួង ឆាយ បានបង្ហោះឲ្យពុកម៉ែបងប្អូនពីការលាចាកសិក្ខាបទយ៉ាងដូច្នេះថា៖ «ព្រះករុណា ខ្ញុំបាទ ឌួង ឆាយ បានលាចាកសិក្ខាបទមកជាឃរាវាសវិញហើយទាំងក្តីអាឡោះអាល័យជាទីបំផុត។ សូមអរព្រះគុណ និងអរគុណចំពោះព្រះគុណម្ចាស់គ្រប់ព្រះអង្គ លោកយាយ លោកតា ពូមីង ពុកម៉ែ បងប្អូនទាំងឡាយ ដែលតែងតែស្រលាញ់រាប់អាន និងគាំទ្រខ្ញុំព្រះករុណា ខ្ញុំបាទរហូតមក។
សូមអរព្រះគុណ និងអរគុណ ចំពោះព្រះគុណម្ចាស់គ្រប់ព្រះអង្គ លោកអាចារ្យ គណៈកម្មការ វត្តមុនីប្រសិទ្ធីវង្ស ជាពិសេសខ្ញុំព្រះករុណាសូមថ្លែងអំណរព្រះករុណាទិគុណយ៉ាងជ្រាលជ្រៅបំផុតចំពោះសម្តេចព្រះឧត្តមវង្សា កិតិ្តបណ្ឌិត មួង រ៉ា (លោកឪ) សម្តេចព្រះសង្ឃនាយករងទី៣ នៃព្រះរាជាណាចក្រកម្ពុជា ដែលមានព្រះទ័យសណ្តោសប្រោសប្រទានដល់ខ្ញុំព្រះករុណាបានស្នាក់អាស្រ័យក្នុងកំឡុងពេលសាងផ្នួស គុណបំណាច់ដ៏ធំធេងមួយនេះ ខ្ញុំព្រះករុណានឹងចងចាំទុកក្នុងបេះដូងជារៀងរហូត។
ជាចុងក្រោយ សូមប្រគេនពរ និងជូនពរបានរួចចាកផុតទុក្ខទាំងពួងគ្រប់ៗព្រះអង្គ គ្រប់ៗគ្នាប្រកបដោយសេចក្តីសុខជានិច្ចនិរន្តរ៍តរៀងទៅ។
សូមឱ្យពិភពលោកទាំងមូល ជាពិសេសប្រទេសកម្ពុជាបានរួចចាកផុតពីជំងឺរាតត្បាតកូវីដ-១៩ ក្នុងពេលឆាប់នេះ។ ឌួង ឆាយ»។
តែយ៉ាងណាមិញ ជាមួយនឹងការលាចាកសិក្ខាបទរបស់ អន្ទិត ឌួង ឆាយ នៅពេលនេះ ក៏បានធ្វើឲ្យមហាជនមានការភ្ញាក់ផ្អើលជាខ្លាំង ព្រោះថា វាហាក់ដូចជាស្របពេល ខណៈដែលម្តាយរបស់ខ្លួនបានចេញមុខធ្វើសន្និសីទសារព័ត៌មានថ្មីៗនេះ ដើម្បីទម្លាយខ្ទេចពីឪពុករបស់ខ្លួនឧកញ៉ា ឌួង ងៀប មានស្រីលួចលាក់ និងថែមទាំងរៀបចំផែនការធ្វើបាបខ្លួន ឲ្យបាត់បង់កិត្តិយសដល់ថ្នាក់នេះ ដោយសារខ្លួនឈរនៅខាងម្តាយ ដើម្បីរកអ្នកច្បាប់ប្តឹងផ្តល់យកទ្រព្យសម្បត្តិមួយចំនួនធំរាប់លានដុល្លារ ទៅសង់ភូមិគ្រឹះ និងទិញឡានទំនើបឲ្យស្រីឈ្មោះ ប្រាក់ ស៊ីណា៕ រក្សាសិទ្ធិដោយ៖ លឹម ហុង
