យោងតាមការចុះផ្សាយរបស់កាសែត bangkokpost នៅថ្ងៃទី១៧ ខែឧសភា ឆ្នាំ២០២១ បានឲ្យដឹងថា វត្ថុមូលដែលគេជឿថា ជាកម្ទេចកម្ទីពីការបាញ់បង្ហោះផ្កាយរណប ឬយានអវកាស ត្រូវបានរកឃើញបាតសមុទ្រ ក្បែរកោះមួយនៅឆ្នេរសមុទ្រភូកេត។
ប្រតិបត្ដិការនេះរកឃើញនេះ ត្រូវបានពិពណ៌នាដោយមេបញ្ជាការតំបន់កងនាវាចរទី៣ លោកឧត្តមនាវីឯក Choengchai Chomchoengpaet នៅក្នុងសន្និសីទសារព័ត៌មានមួយ កាលពីថ្ងៃចន្ទ។
លោកឧត្តមនាវីឯក Choengchai បាននិយាយថា វត្ថុនោះត្រូវបានរកឃើញដោយអ្នកនេសាទក្នុងស្រុក កាលពីដើមខែនេះ។ វាជាវត្ថុប្រហោងស្រដៀងទៅនឹងអាលុយមីញ៉ូម ដែលមានអង្កត់ផ្ចិតប្រហែល ៤៥ សង់ទីម៉ែត្រ។
វាស្ថិតនៅលើបាតសមុទ្រប្រហែល ៦ ម៉ែត្រ ក្រោមផ្ទៃដី ចម្ងាយ ២០ ម៉ែត្រពីឆ្នេរសមុទ្រកោះ Koh Ael នៅឃុំ Chalong ស្រុក Muang ខេត្តភូកេត។
លោកបាននិយាយថា អ្នកឯកទេស មកពីអង្គភាពកំចាត់ជាតិផ្ទុះ នៃតំបន់កងនាវាចរទី៣ បានទៅពិនិត្យមើលវា។ ពួកគេបានថតរូប ហើយបញ្ជូនវាទៅនាយកដ្ឋាននាវាចរណ៍កងទ័ពជើងទឹក ដើម្បីពិនិត្យ។
នាយកដ្ឋានគ្រាប់បែកបានសម្រេចថា វាប្រហែលជាផ្នែកមួយ នៃធុងប្រេងពីរ៉ុក្កែត ដែលត្រូវបានប្រើ ដើម្បីបាញ់បង្ហោះផ្កាយរណប ឬយានអវកាស។ ការស្រាវជ្រាវតាមអ៊ីនធឺណិតបានបង្ហាញថា វត្ថុស្រដៀងគ្នាត្រូវបានគេរកឃើញនៅកន្លែងជាច្រើន នៅលើផ្ទៃផែនដី។
នាយកដ្ឋាននេះបានទាក់ទងទៅទីភ្នាក់ងារអភិវឌ្ឍន៍បច្ចេកវិទ្យាព័ត៌មានវិទ្យា និងអវកាស (GISTDA) និងវិទ្យាស្ថានស្រាវជ្រាវតារាសាស្រ្តជាតិថៃ ដែលបានបញ្ជាក់ថា វត្ថុនោះប្រហែលជាផ្នែកមួយនៃធុងផ្ទុកប្រេងរ៉ុក្កែត។
ទីភ្នាក់ងារ GISTDA បាននិយាយថា វត្ថុប្រភេទនេះ ជាធម្មតាផ្ទុកនូវសារធាតុគីមីដូចជា អាម៉ូញាក់ ឬអ៊ីដ្រូសែន ដែលអាចបង្កគ្រោះថ្នាក់ ដល់សុខភាពផងដែរ៕ រក្សាសិទ្ធិដោយ៖ លឹម ហុង