ភ្នំពេញ ៖ វគ្គបណ្តុះបណ្តាលពង្រឹងសមត្ថភាពជនបង្គោលយេនឌ័រតាមអង្គភាពក្រោមឱវាទ ក្រសួងការងារ និងបណ្តុះបណ្តាលវិជ្ជាជីវៈ រៀបចំឡើងដោយក្រុមការងារយេនឌ័រ របស់ក្រសួងការងារ និងបណ្តុះបណ្តាលវិជ្ជាជីវៈ រយៈពេលបីថ្ងៃ ក្រោមអធិបតីបើកវគ្គបណ្តុះបណ្តាល លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នាព្រឹក ថ្ងៃពុធ ទី១៤ ខែមីនា ឆ្នាំ ២០១៨ នៅទីស្តីការក្រសួង ។
លោករដ្ឋមន្ត្រី មានប្រសាសន៍លើកឡើងថា ការពង្រឹងសមត្ថភាពរបស់ជនបង្គោលយេនឌ័រ ជាការងារមួយ ចាំបាច់ដែលទាមទារនូវការពង្រឹងសមត្ថភាពជាប្រចាំ ជាក់ស្តែងវគ្គបណ្តុះបណ្តាលរយៈពេល ៣ថ្ងៃនេះ រៀបចំឡើងក្នុងគោលបំណង ដើម្បីពង្រឹង សមត្ថភាពជនបង្គោលយេនឌ័រ តាមអង្គភាពក្រោមឱវាទក្រសួងការងារ និង បណ្តុះបណ្តាលវិជ្ជាជីវៈ ឱ្យយល់ច្បាស់ពីអនុសាសន៍ទាំង១១ចំណុចរបស់ សម្តេចអគ្គមហាសេនាតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាអនុប្រធានកិតិ្តយសនៃក្រុមប្រឹក្សាជាតិកម្ពុជាដើម្បីស្ត្រី ដែលបាន ដាក់ចេញនៅក្នុងអំឡុងពេលកិច្ចប្រជុំបូកសរុបលទ្ធផលការងារ ប្រចាំឆ្នាំ២០១៧ និងលើកទិសដៅសកម្មភាពការងារឆ្នាំ២០១៨របស់ក្រុមប្រឹក្សាជាតិកម្ពុជាដើម្បី ស្ត្រី គោលគំនិតនៃការបញ្ជ្រាបយេនឌ័រ បច្ចុប្បន្នភាពអនុសញ្ញាស៊ី-ដ នៃអង្គការ សហប្រជាជាតិ ពិធីសារតាមជម្រើស ក្របខណ្ឌគោលនយោបាយលើកកម្ពស់ ស្ត្រីភាពជាអ្នក ដឹកនាំឆ្នាំ២០១៨ គោលនយោបាយយេនឌ័រក្នុងវិស័យ TVET ស្ថានភាពស្ត្រី ក្នុងវិស័យបេឡាជាតិរបបសន្តិសុខសង្គម ព្រមទាំងផែនការ ថវិកាឆ្លើយតបនឹងយេនឌ័រ ហើយប្រែក្លាយការយល់ដឹងដែលទទួលបាននាពេលនេះ ឲ្យទៅជាសកម្មភាពជាក់ស្តែងពិតប្រាកដ ។
រាជរដ្ឋាភិបាលកម្ពុជានីតិកាលទី៥ នៃរដ្ឋសភានេះ ផ្តោតការយកចិត្តទុកដាក់ជាពិសេសទៅលើសារសំខាន់របស់ស្ត្រី ក្នុងការចូលរួម អភិវឌ្ឍន៍សេដ្ឋកិច្ច និងសង្គមជាតិ ។ ជាក់ស្តែងរាជរដ្ឋាភិបាលមាន “ យុទ្ធសាស្ត្រចតុកោណ “ ដែលបានកំណត់ នូវគោលដៅនៃការជំរុញ កំណើនសេដ្ឋកិច្ច ការបង្កើតការងារ ជូនពលករកម្ពុជា ឲ្យបានពេញលេញ ការលើកស្ទួយ សមធម៌ និងយុត្តិធម៌សង្គម ព្រមទាំងការ ពង្រឹង ប្រសិទ្ធភាព ក្នុងវិស័យមុខងារសាធារណៈ។ តាមរយៈការអនុវត្តកម្មវិធី កែទម្រង់ផ្សេងៗ ដែលមានលក្ខណៈស៊ីជម្រៅ និងគ្រប់ជ្រុងជ្រោយក្នុងយុទ្ធសាស្ត្រ នេះ ក៏បានគូសបញ្ជាក់ច្បាស់ថា “ ស្ត្រីគឺជាឆ្អឹងខ្នង “ នៃសេដ្ឋកិច្ច និងសង្គមជាតិយើង ។
ទន្ទឹមនឹងនេះ ដើម្បីអភិវឌ្ឍលម្អិតបន្ថែមលើចក្ខុវិស័យ ដែលមាននៅក្នុង យុទ្ធសាស្ត្រចតុកោណនេះ រាជរដ្ឋាភិបាលបានរៀបចំឯកសារផែនការសំខាន់មួយទៀត គឺ “ផែនការយុទ្ធសាស្ត្រអភិវឌ្ឍន៍ជាតិសម្រាប់ឆ្នាំ២០១៤-២០១៨” ដែលបានសំយោគបញ្ចូលគ្នា នូវផែនការយុទ្ធសាស្ត្រជាតិកាត់បន្ថយភាពក្រីក្រ និង ផែនការសកម្មភាពអភិបាលកិច្ចដែលមានរួមបញ្ចូលទាំង កំណែទម្រង់រដ្ឋបាលសាធារណៈថ្នាក់ជាតិផងដែរ។ ក្រៅពីនេះ រាជរដ្ឋាភិបាលមានគោលនយោបាយ និងផែនការនៅតាមក្រសួងស្ថាប័នដែលឆ្លើយតបទៅនឹង តម្រូវការរបស់ស្ត្រីនៅ ក្នុងគ្រប់វិស័យ។
តាមរយៈយុទ្ធសាស្ត្រខាងលើនេះ រាជរដ្ឋាភិបាល បានផ្តោតទៅលើការធ្វើ អោយមានសមភាពយេនឌ័រ នៅក្នុងដំណើរការអភិវឌ្ឍន៍សេដ្ឋកិច្ច និងសង្គម តាមរយៈការកសាងសមត្ថភាពស្ត្រី ការកែប្រែឥរិយាបថសង្គមដែលមានការរើស អើងចំពោះស្ត្រី និងការធានានូវសិទ្ធ និងឱកាសទទួលបាននូវការថែទាំសុខភាព ការអប់រំ ការបណ្តុះបណ្តាលមុខជំនាញ ការទទួលបានធនធានសេដ្ឋកិច្ច និង ឱកាសចូលរួមប្រាស្រ័យដោយស្មើភាពក្នុងកិច្ចការអភិវឌ្ឍន៍ សេដ្ឋកិច្ច – សង្គម ក៏ដូចជាការទទួលបានកិច្ចការពារតាមផ្លូវច្បាប់ប្រកបដោយយុត្តិធម៌ ដើម្បីអោយ ស្ត្រីអាចជៀសផុតពីអំពើហឹង្សា ការជួញដូរ ការរំលោភសេពសន្ធវៈ និងរាល់ទម្រង់ ដ៏ទៃទៀតនៃអំពើហឹង្សា។ ចំណែកដ៏សំខាន់មួយទៀត ក្នុងកិច្ចការនេះ គឺការយក ចិត្តទុកដាក់បង្កើនសមមាត្រនៃការចូលរួមរបស់ស្ត្រីអោយបានច្រើនជាអតិបរិមា ក្នុងស្ថាប័នជាតិគ្រប់កម្រិតតាំងពីថ្នាក់កណ្តាលរហូតដល់ថ្នាក់មូលដ្ឋាន។
សម្រាប់ឆ្នាំ២០១៨នេះ ក្នុងការចូលរួមអនុវត្តអនុសាសន៍ ១១ចំណុច របស់ សម្តេចអគ្គមហាសេនាតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ កម្ពុជា ក្រសួងការងារ និង បណ្តុះបណ្តាលវិជ្ជាជីវៈ មានចំណុចពាក់ព័ន្ធចំនួន ៤ ក្នុងនោះអនុសាសន៏ទី១ អនុសាសន៏ទី៦ ទី៩ និងទី១១ ដែលតម្រូវឱ្យគ្រប់ អង្គភាពក្រោមឱវាទចូលរួម អនុវត្តអោយមានប្រសិទ្ធភាព ហើយសិក្ខាសាលា នាថ្ងៃនេះ គឺជាសារមួយ បង្ហាញពីការចូលរួមក្នុងការអនុវត្ត អនុសាសន៍ទាំង១១ ចំណុចរបស់ សម្តេចអគ្គមហាសេនាតេជោ ហ៊ុន សែន នាយករដ្ឋមន្ត្រី នៃ ព្រះរាជាណាចក្រកម្ពុជា ផងដែរ៕ ដោយ ៖ បញ្ញាស័ក្តិ
