ខេត្តកណ្តាល៖ រដ្ឋបាលខេត្តកណ្តាល បានចេញសេចក្តីសម្រេច ការបញ្ចប់ការអនុវត្តវិធានការរដ្ឋបាល សម្រាប់ភូមិសាស្ត្រក្នុងតាខ្មៅ នៃខេត្តកណ្តាល ដោយបានកំណត់ជា “តំបន់លឿងទុំ” និង “តំបន់លឿង ” ចាប់ពីថ្ងៃទី២០ ខែឧសភា ឆ្នាំ២០២១ តទៅ។
បើតាមរដ្ឋបាលខេត្តកណ្តាល ត្រូវបញ្ចប់ការអនុវត្តវិធានការរដ្ឋបាល សម្រាប់ភូមិសាស្ត្រក្រុងតាខ្មៅ នៃខេត្តកណ្តាល ដោយបានកំណត់ជា “តំបន់លឿងទុំ” និង “តំបន់លឿង” ដែលត្រូវបានសម្រេចដោយសេចក្តីសម្រេចលេខ ០៩០ សសរ ចុះថ្ងៃទី១២ ខែឧសភា ឆ្នាំ២០២១ របស់រដ្ឋបាលខេត្តកណ្តាល ចាប់ពីថ្ងៃទី២០ ខែឧសភា ឆ្នាំ២០២១ តទៅ។
រដ្ឋបាលក្រុងតាខ្មៅ ត្រូវទទួលបន្ទុកអនុវត្ត និងសម្របសម្រួលការងារចាំបាច់ ដូចជា៖
- ការងារផ្នែកសន្តិសុខ សណ្តាប់ធ្នាប់ និងរបៀបរៀបរយសាធារណៈ ក្នុងភូមិសាស្ត្រក្រុងតាខ្មៅ
- សម្របសម្រួលលើកិច្ចការចាក់វ៉ាក់សាំងកូវីដ-១៩ ឱ្យបានលឿន និងឆាប់រហ័ស ដោយធានាឱ្យបាននូវ ការគោរព និងអនុវត្តវិធានការសុខាភិបាល ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩
- ដឹកនាំ ត្រួតពិនិត្យ និងសហការជាមួយគណៈកម្មការគ្រប់គ្រងផ្សារ ដើម្បីណែនាំដល់បងប្អូនអាជីវករលក់ដូរ ទាំងអស់ ត្រូវរៀបចំខ្សែសុវត្ថិភាពចងព័ន្ធជុំវិញទីតាំង ឬកន្លែងលក់ដូរនីមួយៗ ដើម្បីរក្សាគម្លាតសុវត្ថិភាព បុគ្គល ព្រមទាំងរៀបចំដាក់អាល់កុល ឬដែលសម្រាប់អតិថិជនលាងដៃគ្រប់ៗគ្នា
- ការងារត្រួតពិនិត្យ និងគ្រប់គ្រងកន្លែងលក់ម្ហូបអាហារ ហាងទំនិញ ការផ្គត់ផ្គង់ទំនិញ អាជីវកម្មដ្ឋាន និងសេវាកម្ម ដែលជាតម្រូវការចាំបាច់ប្រចាំថ្ងៃរបស់ប្រជាពលរដ្ឋ ដោយអនុវត្តតាមវិធានការសុខាភិបាលនិងសេចក្តីណែនាំរបស់រដ្ឋបាលខេត្ត ជាធរមាន
- លើកទឹកចិត្ត និងណែនាំដល់បងប្អូនអាជីវករ និង ប្រជាពលរដ្ឋឱ្យប្រើប្រាស់ការទូទាត់សាច់ប្រាក់តាម ប្រព័ន្ធធនាគារ(ឬអនឡាញ) ឬឆ្លងកាត់ការសម្លាប់មេរោគត្រឹមត្រូវ
- កំណត់គោលការណ៍ចាំបាច់ ដើម្បីធានាប្រសិទ្ធភាពការងារទប់ស្កាត់ និងប្រយុទ្ធប្រឆាំងការឆ្លងរាលដាល
នៃជំងឺកូវីដ-១៩។
ក្នុងករណីរកឃើញ ឬ មានការសង្ស័យថា មានការឆ្លងរាលដាលនៃជំងឺកូវីដ-១៩ នៅទីតាំងលំនៅឋាន អគារស្នាក់នៅ ឬទីតាំងសកម្មភាពការងារ មុខរបរ ឬអាជីវកម្មដ្ឋាន ជាពិសេសផ្សារ និងទីកន្លែងលក់ដូរគ្រឿង ឧបភោគបរិភោគ និងភោជនីយដ្ឋាន អាហារដ្ឋាន រដ្ឋបាលក្រុងតាខ្មៅ ត្រូវអនុវត្តការហាមឃាត់ ឬ ផ្អាកជាដាច់ខាត នូវទីតាំង ឬទីកន្លែងទាំងនោះ ជាបណ្ដោះអាសន្ន និងរាយការណ៍ជូន ឯកឧត្តមអភិបាលខេត្ត ដើម្បីស្នើសុំកិច្ច អន្តរាគមន៍ និងចាត់វិធានការឆ្លើយតបឱ្យបានឆាប់រហ័ស សំដៅទប់ស្កាត់និងកាត់ផ្តាច់កុំឱ្យមានការឆ្លងរាលដាល នៃជំងឺកូវីដ-១៩ ទៅទីតាំង ឬកន្លែងផ្សេងទៀត៕ រក្សាសិទ្ធិដោយ៖បញ្ញាស័ក្តិ
